Kamate i Samuel
25
Dopa nasae naliu haitu,
namatemo i Samuel.
Pura-pura toIsrael nasiromu nombatangisi ia.
I Samuel nitana ri tanana mboto ri ngata Rama.
Naupu haitu i Daud nolinja hau ri karava bai Paran.
I Daud, i Nabal bo i Abigail
2 Tempo haitu,
naria saito langgai dako ri ngata Maon,
ia topogimpu nompatuvu binata nadea napara ngata Karmel.
Tona haitu nakalumana mpuu,
bimbana talunjobu bo tovauna sanjobu kadeana.
Ia naria ri Karmel tempo pogunji bulu bimbanaa.
3 Sanga ntona haitu i Nabal muli i Kaleb,
bo bereina i Abigail.
I Abigail natau nompekiri bo nagaya,
tapi i Nabal nadaa gauna bo nadaa pokaingguna.
4 Tempo i Daud ri karava bai,
niepena i Nabal da nogunji bulu bimbana.
5 Jadi nituduna sapulu tona hau ri Karmel mosinggavaka i Nabal manguli salandoana ivei:
6 “Salandoa ka komiu sambanua bo kambou pura-pura anu naria nte komiu rapoporasi nTupu.
7 Niepeku komiu da nogunji bulu bimba.
Ane musani,
tempo topoevu binatamu noevu napara nte kami,
ledo ria nikuya-kuya kami bo ledoria sanggania nuapara nalipo tempo ira ri Karmel.
8 Pekutanamo nte ira,
tantu raulira nakana.
Sabana haitu kuperapi,
roaku ratarima mabelo ri banuamu.
Kami nakava tempo komiu novia posusa mbaso.
Dekeimo bara nuapa rapoluu raramu ka batua-batuamu hitu bo ka anamu i Daud,
roa belomu.”
9 Nakavapa ira ri Karmel,
niulira ka i Nabal puramo petevai i Daud,
bo nipopeara.
10 Tapi nesana i Nabal,
“Isema i Daud?
Doparia niepeku tona tutu!
Nggapuri-puri hitu nadea batua nalai dako nte tona niponturona.
11 Berimba bo kudekei roti,
uve inu bo bau anu nipasadiaku ka topogunji bulu bimbaku,
bo kudekei ka tona anu ledo nisaniku dako ri umba ponturona.”
12 Tona nitudu i Daud haitu nanjili bo niulikara i Daud pura anu niuli i Nabal.
13 I Daud nanguli ka todeana,
“Takamo gumamiu!”
Todea i Daud kaliu nangoseaka parenta haitu.
I Daud nantaka gumana munimo.
Ira neanggataka hau mombasuu i Nabal nitasere pataatu kadeana,
bo roatu naboli nojaga mbara-mbara.
14 Tempo haitu saito batua i Nabal nanguli ka i Abigail berei i Nabal,
ivei,
“Niepemiumo?
I Daud nombatudu tona dako ri karava bai manguli salandoana ka i Nabal,
tapi ira aga nipokarau bo niburarasi i Nabal.
15 Ira nabelo nte kita.
Ledo ria kami nibagora,
bo ledo muni naria anu kami nalipo tempo kami noevu napara nte ira ri karava bai.
16 Eo bongi ira nombajagai kami tempo kami noevu bimba bo tovau napara nte ira.
17 Kami merapi nte komiu,
pekirimiu pakabelo-belo,
bo botusimo anu mamala rapoviamiu.
Natantumo kana makava pebalasi ka i Nabal bo ka pura-pura sampesuvuna.
Nakaa gaga baga i Nabal sampe ia ledo nadota nangepe pepatotosi tona ntanina.”
18 Nangepe tesa haitu kaliu-liu niala i Abigailmo roatu roti,
randua kanto kuli naponu uve anggur,
lima mbaa bimba nitapa,
sapulu pitu kilo gando nisole,
saatuu mpaa vua anggur nangau bo roatu mbungu vua ara nangau.
Pura-pura haitu niulaya keledai i Abigail.
19 Nangulimo ia ka batua-batuana,
“Polipamo komiu mokolu,
damo metuntuni ri puri yaku.”
I Abigail ledo nopakaana nte bereina.
20 I Abigail notua nesavi keledai.
Tempo ia nakava ri peteko nu dala ri kente nu bulu,
nipeintanamo i Daud nte todeana notua,
nangose dala nosintomu nte ia.
21 Tempo haitu i Daud da nompekiri,
“Ledoria gunana yaku nombajagai anu ntona haitu ri karava bai!
Ledoria sakidea nuapana nalipo,
bo hitu beloku nibalasina nte kadaa!
22 Damo Alatala mompatesi yaku ane ledo kupatesi pura langgai rumai dopame eo mebonda!”
23 Nipeintapa i Abigail i Daud,
nanaumo ia dako ri keledai nekanaede bo nantaputu.
24 Ia nantaputu napara kada i Daud bo nanguli,
“Pua,
epemo!
Dekeikamo sala hitu kusimbuaka saitoku!
Dekeimo loga ka batuamu motesa nte komiu bo epemo tesa batuamu hitu.
25 Pua,
tumo rapekirikamiu i Nabal,
tona haitu ledo ria gunana!
Ia tona nambongo nasimbayu nte batua nu sangana ‘nambongo.’
Tona nitudu i pua pangane,
ledo nipeintaku.
26 TUPU nombataamaka i pua mombabalasi bo mompatesi bali i pua.
Hitupa,
pua,
yaku mosumpa ante sanga nTUPU anu Natuvu sampe ri kasae-saena bo mosumpa muni ante katuvu i pua,
aginamo uere bali i pua bo tona nonia nadaa nte i pua masimbayu mpo uere i Nabal.
27 Sabana haitu tarimamo anu nikeniku hitu radekei ka tona nantuntuni i pua.
28 Ampungimo salaku.
I pua bo muli i pua kana rapajadi nTUPU magau ri Israel,
sabana i pua nosieva nantuntuni parenta nTUPU bo i pua ledoria nokainggu nadaa.
29 Rapana ane maria tona mangeva i pua bo madota mompatesi i pua,
natantumo i pua kana rajagai bo rasaliku nTUPU Alatala anu nisombata,
evamo tona nombajagai mbara-mbarana anu noali.
Tapi bali i pua kana rarempetaka nTUPU pakavao-vao,
eva vatu nirempetaka nompake suvai.
30 TUPU mombadekei belo anu nijanjiNa ka i pua,
bo domo masae i pua rapajadiNa magau ri Israel.
31 Tempo i pua ngena majadi magau,
ledo masusa bo ledo manjoso rara i pua,
sabana i pua ledo nombalasi pokainggu ntona nangoseaka dota rara i pua mboto bo ledo nompatesi tona anu ledoria sabana.
Bo tempo TUPU mombadekei belo ka i pua,
neemo ranga rakalingasi yaku batuamiu hitu.”
32 Nangulimo i Daud ka i Abigail,
“Ratoiyamo TUPU,
Alatala anu nisomba ntoIsrael,
anu nombatudu iko mosinggavaka yaku eo hitu!
33 Ratoiyamo katau mpekirimu bo ratoiyamo iko sabana iko nombataamaka yaku mombalasi pokainggu ntona nangoseaka dota raraku mboto bo iko nombataamaka yaku mompatesi tona anu ledo ria sabana.
34 TUPU nombataamaka yaku mokainggu madaa nte iko.
Yaku nosumpa ante sanga nTUPU,
Alatala nisomba ntoIsrael,
anu Natuvu sampe ri kasae-saena,
ane ledo nasalisa iko nosinggavaka yaku,
natantumo dako mebonda mata nu eo mamate puramo todea i Nabal!”
35 Naupu haitu nitarima i Daudmo anu nikeni i Abigail,
bo nangulimo ia ka i Abigail,
“Panjilimo hau ri banuamu bo tumo makini raramu!
Pomperapimu tutu kupoiyo.”
36 Tempo i Abigail hau nanjili nte i Nabal,
tano mai i Nabal novia posusa mbaso ri banuana,
eva posusa nu magau.
I Nabal nalimpuno bo nadamba-damba,
jadi i Abigail dopa notesa nuapa-nuapa ka ia sampe kamailena.
37 Naeo mpadondo,
nalipomo limpunona,
nitesa bereina ka ia puramo anu najadi haitu.
Naliu haitu,
i Nabal nirumpa dua njule sampe ia nakoyo njumanggaro.
38 Nitasere da sapulu eo kaliuna haitu,
nipaloga nTUPU vaimo dua njule nanggava i Nabal bo sampe nipomatenamo.
39 Niepepa i Daud i Nabal namatemo,
nangulimo ia,
“Ratoiyamo TUPU!
Nisani nTUPU i Nabal nompakaeya yaku bo TUPU nombataamaka yaku mokainggu madaa.
I Nabal nihuku nTUPU sabana pokaingguna nadaa.”
Pade nitudu i Daudmo suro hau mombaduta i Abigail rapobereina.
40 Nakavapa suro i Daud nte i Abigail ri Karmel,
nangulimo ira,
“Kami nitudu i Daud mosinggavaka komiu,
sabana ia madota mombaduta bo mompoberei komiu.”
41 I Abigail neangga,
pade nekanaede,
nantaputu bo nanguli,
“Yaku hii aga batua i Daud,
yaku masadia mangoseaka parentana nau aga motoposi kada batua-batuana.”
42 Pade kaliu nanggalivomo i Abigail.
Naupu haitu nesavi keledaimo ia nipanuntu alima batuana mombine,
nantuntuni tona nitudu i Daud nombaduta ia majadi bereina.
43 Dopame haitu i Daud noberei mamimo nte i Ahinoam dako ri ngata Yizreel,
bo hitupa i Abigail najadi bereina munimo.
44 Tapi i Mikhal ana i Saul berei i Daud pamulana,
nipopoberei i Saul nte i Palti ana i Lais dako ri ngata Galim.