I Daud ledo nadota nompatesi i Saul
24
Dako rahaitu i Daud hau ri ngata En-Gedi,
bo netabuni ra bolo.
2 Dako navoli ntoto i Saul dako ri posieva nangeva toFilistin,
ia nangepe kareba,
i Daud naria ri karava bai napara ngata En-Gedi.
3 Kaliu nipelisinamo talunjobu tantara tobelona ri njumangu Israel bo haumo ira nangelo i Daud nte todeana ri sabingga mpandake bulu vatu nosanga Tovau Nggakayu.
4 Nakavamo i Saul napara ri gimpu bimba ri soso nu dala.
Rahaitu naria sangu bolo nu vatu,
bo i Saul nesua hau mototai.
Ledo nisanina i Daud bo todeana netabuni ra bolo haitu muni,
haunapa dako ri pototai i Saul.
5 Nangulimo todea i Daud ka ia,
“Hitumo loga ka komiu!
Apa ledo niuli nTUPUmo ka komiu ivei:
‘Balimu Kudekei ka iko,
poviamo nuapa mupodota ka ia!’ ”
Pade nisombe i Daud nggalinomo sambite baju i Saul.
6 Tapi naupu haitu,
nanjoso raramo i Daud.
7 Ia nanguli ka todeana,
“Damo TUPU mombajagai yaku ala nemo yaku mokainggu madaa ka magauku anu nipelisi nTUPU.
Ledo ntoto mamala kupakadua ia sakidea,
sabana ia magau anu nipelisi nTUPU.”
8 Ivesiamo i Daud nombataamaka todeana,
bo ledo nidekeina ira mompatesi i Saul.
I Saul neangga bo nalaimo dako rabolo haitu,
pade nompapola polipana.
9 Nesuvu munimo i Daud dako rabolo haitu bo nompongare i Saul dako ri bengo,
ivei,
“Pua!”
Neilimo i Saul,
i Daud nekanaede bo nantaputu nombasomba i Saul.
10 Nanguli ia,
“Nakuya i pua nangepe tesa ntona nanguli yaku mompakadaa i pua?
11 Nipeintamiu mboto pua,
komiu nidekei nTUPU ka yakumo riara bolo pangane.
Tapi nau nipadidisi ntona,
yaku ledo nadota mompatesi i pua,
sabana yaku ledo madota mompakadua magauku,
anu nipelisi nTUPU.
12 Peintamo,
pua!
Peinta bite baju i pua nikingisiku hitu!
Kakanana mamala kupatesi i pua,
tapi aga doe baju i pua nisombeku sambite.
Jadi,
natantumo yaku ledo mopatuju madaa.
I pua nombaraga-raga yaku madota mompatesi yaku nau yaku ledo nasala sakidea nte i pua.
13 Damo TUPU mombabotusi isema masala kita randua,
bo damo Ia mombabalasi panggavia i pua nte yaku,
tapi yaku ledo madota mompakadua i pua.
14 Nisani i pua porapa nggaulu nanguli ivei:
‘Aga tona nadaa nokainggu nadaa.’
Sabana haitu ledo kupakadua i pua.
15 Parantaikamo yaku anu niraga-raga magau ntoIsrael rapatesina!
Peintamo yaku,
ledo ntoto naria batuana.
Yaku aga eva sambaa asu mate,
bo aga eva sambaa kutu.
16 TUPU mombatangara i pua bo yaku.
Damo Ia manggita pokaingguku hitu.
Damo Ia mombasaliku bo mompakasalama yaku dako nte i pua.”
17 Naupupa i Daud nanguli tesa haitu,
nangulimo i Saul,
“Ikomo tutu,
Daud,
anaku?”
Bo notumangimo ia.
18 Nanguli ia ka i Daud,
“Nakana nte iko sabana iko nokainggu nabelo nte yaku,
naupa yaku nadaa nte iko.
19 Eo hitu nipopakitamumo belomu nte yaku,
sabana yaku ledo nipatesimu,
naupa yaku nidekei nTUPUmo ka iko.
20 Doparia tona nosinggavaka balina nipalambana balina natuvu!
Jadi,
damo TUPU mombadekei belo ka iko sabana pokainggumu nabelo nte yaku eo hitu!
21 Hitupa nisanikumo iko natantumo kana majadi magau ri Israel,
bo todea Israel kana batena maroso riara pomparentamu.
22 Hitupa pojanjimo nte yaku ante sanga nTUPU,
ledo mupatesi muliku,
bo ledo mulalisi sangaku dako nte sampesuvuku!”
23 Pade nojanjimo i Daud.
Naupu haitu navolimo i Saul hau ri banuana,
bo i Daud nte todeana navoli munimo hau ri petabunira.