I Daud nianggataka najadi magau ri Yehuda
2
Naupu haitu nekutana i Daud nte TUPU, “PUE, rapokonoMiu yaku molinja hau ri sangu ngata ri Yehuda?”Nesana TUPU, “Koimo.”
Nekutana vai i Daud, “Ngata umbana?”
Nesana TUPU, “Ngata Hebron.” 2 Jadi haumo i Daud monturo ri ngata Hebron nosinggani-nggani nte bereina randua, iamo i Ahinoam mombine dako ri Yizreel, bo i Abigail timbala i Nabal toKarmel. 3 Ivesia muni nte todeana, pura-pura njamboko ntaliana nantuntuni i Daud. Ira naroo ri ngata Hebron bo ri ngata sinjorina. 4 Naliu haitu nakavamo toYehuda ri ngata Hebron bo nianggatakara i Daud najadi magau ntoYehuda.
Tempo i Daud nangepe toYabesh ri bagia Gilead naupumo nombatana mboa i Saul, 5 nitudunamo suro hau manguli petevaina, ivei, “Perapi TUPU mombadekei belo ka komiu toYabesh, sabana nabelo mpuu raramiu nombatana mboa magaumiu. 6 Sabana haitu, perapi TUPU bate-batena mompotove bo mombatulungi komiu. Yaku muni movia belo ka komiu sabana anu nipoviamiu haitu. 7 Pakaroso raramiu bo pokainggumo mpo tantara naroso! Nakana i Saul magaumiu namatemo, tapi yaku nianggataka ntoYehudamo najadi magaura.”
I Isyboset nianggataka majadi magau ntoIsrael
8 Pakeni ntantara i Saul, iamo i Abner ana i Ner. Ia nalai nosinggani nte i Isyboset ana i Saul, hau ri ngata Mahanaim ri sambote binangga Yordan. 9 Hamaimo i Abner nanganggataka i Isyboset najadi magau ri bagia Gilead, Asyuri, Yizreel, Efraim bo Benyamin bo sampe njumangu ngata ntoIsrael. 10 Tempo i Isyboset nipajadi magau ri Israel umuruna patapulu mpae, bo ia nomparenta rompae kasaena.
Tapi toYehuda batena nompokono i Daud, 11 bo i Daud nomparenta toYehuda ri ngata Hebron pitu mpae santanga kasaena.
Posieva toIsrael bo toYehuda
12 Naria saeo i Abner neanggataka dako ri ngata Mahanaim, hau ri ngata Gibeon, nosinggani nte todea i Isyboset. 13 I Yoab pakeni ntantara i Daud (tinana nosanga i Zeruya). Ia nosinggani nte todeana hau ri ngata haitu muni. Ira rontagu anu nosipobali haitu nosintomu ri rano kodi Gibeon. I Abner bo todeana nonturo ri sambote sii, bo i Yoab ante todeana nonturo ri sambote hamai. 14 Nangulimo i Abner ka i Yoab, “Anumo, ratuduta todeata mosieva!
“Nesana i Yoab, “Anumo.”
15 Bo nipelisira sapulu randua tona dako ri valaa toBenyamin anu nosabingga ka i Isyboset, ana i Saul, bo sapulu randua muni dako ri todea i Daud. 16 Ira nosigarangutu bulua bo nositosu tai ante guma bo namate singganimo ira. Sabana haitu, posievara niuli ntona “Helkat-Hazurim.a” Posievara haitu napara ngata Gibeon. 17 Naupu haitu najadimo posieva mbaso bo todea i Daud nombadagi i Abner bo tantara ntoIsrael. 18 Tatalu ana i Zeruya, haitumo i Yoab, i Abisai bo i Asael naria muni rahaitu. I Asael nagasi nangova eva kagasi rusa. 19 Jadipa niragana njuumo i Abner. 20 I Abner neili hau ri bengo bo nekutana, “Ikomo i Asael?”
Nesana ia, “Iyo.”
21 Nanguli vai i Abner, “Nee muraga yaku. Coba saka saito tantara haitu bo alasi pareva posievana!” Tapi i Asael batena nombaraga i Abner. 22 Nanguli i Abner sangganipa ka ia, “Nee muraga yaku! Nee sampe kupatesi ngena iko. Ane kupatesi iko berimba ngena yaku mamala mangganoto lenje ntuakamu i Yoab?” 23 Tapi kana ledo nadota i Asael nenonto nombaraga i Abner. Jadipa nitosu i Abner ntaliku ante tavalamo i Asael, nambela tai i Asael nelosa ri bengona. I Asael nadungga bo namate ri belana haitumo. Jadi pura-pura tona nakava bo netaa ri kamate i Asael.
24 Tapi i Yoab bo i Abisai nombaraga i Abner njuu. Nasolopa eo, nakavamo ira ri Bulu Ama, ri sabingga mpandake Giah, norona hau ri karava bai Gibeon. 25 Hamaimo tona dako ri valaa toBenyamin nompakasangu vai nte i Abner bo nompasiayu baresira ri bavo bulu. 26 Dako hamai i Abner nompongare i Yoab, “Berimba? Kana mosieva njuu tano kita? Ledo nanoto raramu posieva hitu aga mompakasusa kita? Kami hii sampesuvumu sangata. Sampe maipia pade nupopenonto todeamu mombaraga kami?”
27 Nesana i Yoab, “Yaku mosumpa ante sanga nu Alatala anu natuvu sampe ri kasae-saena, ane rapana iko ledo notesa mami pangane, natantumo todeaku mombaraga komiu sampe maile mpadondo.” 28 Pade nitavusi i Yoabmo tabuena mompopetaa todeana mombaraga toIsrael, bo netaa mpuumo posieva haitu.
29 I Abner bo todeana sambongi ntua nolipa ri lemba Yordan, pade nivotera binangga Yordan bo nolipa njuu eona sampe nakava ri ngata Mahanaim.
30 Netaapa i Yoab nombaraga i Abner, nipasiromuna puramo todeana. Ledo aga i Asael namate tapi sapulu sasiopa anu ntanina domo naria. 31 Tapi todea i Abner dako ri valaa ntoBenyamin anu namate nipatesi todea i Daud, taluatu onopulu kadeana. 32 Naupu haitu i Yoab ante todeana nokova mboa i Asael bo nitanara ri tana nipodayo ntomana ri ngata Betlehem. Njambongi-mbongi haitu ira nolipa, naeo mpadondo pade nakava ira hamai ri ngata Hebron.