3
Posieva ntona anu nosabingga ka sampesuvu i Saul bo tona anu nosabingga ka i Daud da nosieva njuu. I Daud nantambai karosona bo balina nantambai kalentena.Ana-ana langgai i Daud
2 Ana-ana langgai i Daud anu nipoanaka ri ngata Hebron nangoseaka sunju pompoanaka ira iamo:
i Amnon, tinana nosanga i Ahinoam dako ri bagia Yizreel.
3 I Kileab, tinana i Abigail, timbala i Nabal dako ri ngata Karmel.
I Absalom, tinana iamo i Maaka, ana mombine Magau Talmai dako ri kamagaua Gesur.
4 I Adonia ana i Hagit.
I Sefaca ana i Abital.
5 I Yitram ana i Egla.
Aono anana langgai gahaitu nipoanaka ri ngata Hebron.
I Abner nosabingga ka i Daud.
6 Tona anu nosabingga nte i Daud nosieva njuu ante tona nosabingga nte sampesuvu i Saul. Tempo haitu i Abner nompasimbuku nangala rara ntodea anu nosabingga ka i Saul ala mambaso sangana.
7 Naria saeo, i Isyboset ana i Saul, nombarai i Abner nosampaturu nte berei piara i Saul anu nosanga i Rizpa, ana i Aya. 8 Jadipa narau mpuu i Abner bo nanguli, “Nisarumakamiu yaku hii nombanavusaka sampesuvu i Saul bo nosabingga nte i Daud magau Yehuda? Dako ri pamulaname yaku nosabingga nte tuamamiu i Saul, sampesuvuna bo roa-roana. Nitulungikumo komiu ala ledo radagi i Daud. Tapi naupa ivesia, komiu nombarai yaku novia sala nte mombine! 9-10 Aginapa i Daud kutulungi, nemopa nijanji nTUPUmo raalasiNa kamagaua hitu dako nte i Saul bo muli-mulina, bo raanggatakaNa i Daud majadi magau ka pura-pura toIsrael bo toYehuda. Damo Alatala mompatesi yaku, ane janji Alatala haitu ledo kupovia!” 11 Ledoria sambelaa tesa nipesanaka i Isyboset, sabana naeka ka i Abner.
12 I Abner nompakatu surona hau nte i Daud, ante petevai ivei, “Pua, komiu masipato momparenta njumangu ngata Israel hitu! Pojanjimo ante yaku, bo kutulungi komiu ala pura-pura todea Israel mosabingga nte komiu!”
13 Nesana i Daud, “Nabelomo! Ulika petevaiku hitu ka i Abner: Yaku madota mojanji nte iko, tapi naria sangaya kuperapi nte iko. Ane tumai iko, kana mukeni i Mikhal, ana i Saul mombine mantingayo yaku.” 14 Naupu haitu nitudu i Daud muni tona hau nte i Isyboset manguli petevaina ivei, “Popanjili ka yaku i Mikhal bereiku. Nialikumo ia ante saatu kuli nu vuntu kaeya ntoFilistin.” 15 Jadi i Isyboset nombatudu tona hau mangala i Mikhal dako nte berei baruna anu nosanga i Paltiel ana i Lais. 16 Tapi i Paltiel notumangi bo nituntunina njuu i Mikhal. Nakavapa ira ri ngata Bahurim, nangulimo i Abner ka ia, “Panjilimo, Paltiel, tumo metuntuni!” Jadi nanjili mpuumo ia.
17 Tempo haitu i Abner nolibu nte tomaoge Israel bo nanguli, “Nasaemo dotamiu i Daud majadi magau. 18 Jadi hitumo loga ka komiu. Toramo, TUPU nojanjimo nte i Daud, Ia mompake i Daud mompakasalama todeaNa toIsrael dako nte toFilistin bo dako nte pura-pura balina ntanina.” 19 I Abner nolibu muni ante toBenyamin pade hau muni ri ngata Hebron, manguli ka i Daud nuapa niposintuvu toBenyamin bo toIsrael haitu.
20 Tempo i Abner hau mosinggava nte i Daud ri Hebron, nikenina ropulu todeana bo i Daud novia posusa ka ira. 21 Naupu haitu nopalakanamo i Abner, “Pua, palogamo yaku hau mangulika toIsrael ala mompakasangu nte komiu. Ratarimara komiu majadi magau bo komiu momparenta njumangu ngata Israel nangoseaka dotamiu mboto.” Naupu haitu nidekei i Daudmo i Abner hau bo nijanjina i Abner ledo rakuya-kuya ri dala.
I Abner nipatesi i Yoab
22 Nalaipa i Abner, i Yoab ante tantara i Daud ntanina nanjilimo dako ri posieva bo nanggeni mbara-mbara anu niagosira. 23 I Yoab nipopaepeka kareba i Abner nakava nosintomuka magau Daud bo nipopanjilina belo-belo. 24 Pade haumo i Yoab nosintomu bo nangulika magau, “Pua, nuapa nipoviamiu? I Abner nakavamo nte komiu. Nakuya nidekeimiu ia malai nggoo? 25 Tantu nisanimiu ia aga nakava nombabagiu komiu bo nompomata-mata nuapa nipoviamiu ala rasanina niamiu.”
26 Nalaipa i Yoab dako nte i Daud, nituduna tona hau mombaronde i Abner. Nituntunira i Abner sampe ri sinjori buvu Sira bo nikenira mpanjili. Pura-pura anu najadi haitu ledoria nisani i Daud. 27 Nanjilipa i Abner ri ngata Hebron, niunaka i Yoabmo i Abner hau ri sabinggana napara bobaa, evamo motesa anu ledo mamala raepe ntona. Sampesanika nijalo i Yoabmo tai i Abner sampe namate. Ivesiamo i Abner namate nipatesi i Yoab nombabalasi rau rarana ante kamate ntueina i Asael. 28 Tempo niepe i Daud kareba haitu, nangulimo ia, “Nisani nTUPU yaku bo todeaku mpuu-mpuu ledo nasala pompatesi i Abner haitu. 29 Kambou i Yoab ante muli-mulina rahuku sabana pokaingguna haitu. Aginamo vei i Yoab ante sampesuvuna, ana-anana sampe muli-mulina kana rapetaka dua oge, bara baka tuvu, bara damo motoko, bara mamate riara mposieva bara makura pangandera!”
30 I Yoab bo tueina i Abisai nompatesi i Abner sabana i Abner nompatesi tueira i Asael riara mposieva ri ngata Gibeon.
Popatana i Abner
31 Naupu haitu i Daud nombatudu i Yoab bo tantarana nobitesi pakeara mantangisi i Abner, bo mompake baju nipovia dako ri karu tandana nabuku rarara. Tempo nanggeni mboa i Abner, Magau Daud mboto nolipa ri puri ntopokova nu peti haitu. 32 I Abner nitana ri ngata Hebron, bo magau nte todea namangga notumangi ri dayo haitu. 33 I Daud nantangisi i Abner bo niulina ivei,
“O ranga, Abner! Nakuya iko namate mpo tona nambongo?
34 Palemu ledo nipou bo kadamu ledo nibalanggu.
Iko namate nipatesi ntona nadaa.”
Pura-pura todea anu nantangisi i Abner nantambai kamanggana notumangi.
35 Njumaeo todea nompadidisi i Daud ala mangande sakide, tapi ledo nadota ia. Ia aga nosumpa, “Kambou yaku rahuku nu Alatala, ane yaku mangande dopame masolo eo.” 36 Nangepe haitu nasanamo rara ntodea. Apa nuapa-nuapa nipovia Magau Daud nompakasana rarara. 37 Eo haitu, pura-pura todea i Daud bo njumangu toIsrael nisaniramo i Daud mpuu-mpuu ledo nompokono pompatesi i Abner haitu. 38 Nangulimo magau ka tona nikeniakana, “Ledo nisanimiu? Eo hitu namatemo saito tadulako ntoIsrael! 39 Naupa yaku hii magau nipelisi nu Alatala, tapi nirasaiku yaku hii nalente. Nadaa gaga pokainggu i Yoab bo i Abisai ana i Zeruya haitu. Ledo nipakuleku nomparenta ira. Damo TUPU mombahuku tona nadaa gahaitu, nangoseaka pokainggura!”