I Isyboset nipatesi
4
1-4 Naria saito muli i Saul nosanga i Mefiboset, ana langgai i Yonatan. Tempo kamate i Saul bo i Yonatan, i Mefiboset noumuru lima mpae. Ia nakejo sabana nanavu. Tempo nangepe kareba kamate i Saul bo i Yonatan ri Yizreel, mombine topopaa i Mefiboset nopauba ia bo nikenina mpangova. Mombine haitu nompari-mpari sampe ngana nipaubana haitu nanavu bo najadi nakejo.Tempo i Isyboset ana langgai i Saul nangepe kareba i Abner nipatesi ri ngata Hebron, nalentemo rarana bo pura-pura toIsrael naimbi. Naria randua pakeni ntantara i Isyboset anu najadi pakeni mpesuu, saito nosanga i Baana bo saitopa vai nosanga i Rekhab. Ira ana i Rimon, toBenyamin dako ri Beerot. a
5 I Rekhab bo i Baana hau ri banua i Isyboset bo nakava hamai tongo eo, tempo Isyboset da naturu. 6 Mombine anu nojaga banua notapi gando. Naroyo matana sampe namonjomo. Sabana haitu namalamo i Baana bo i Rekhab nesua nggalino ra banua. e 7 Ira kapola-pola hau nesua ri tombi paturu i Isyboset, tempo ia da naluru namonjo. Nijalosiramo i Isyboset sampe namate. Nipudusira tambolona bo nikenisira balenggana. Sambongi ntua ira nolipa nodala ri lemba Yordan. 8 Naupu haitu nidekeiramo balengga i Isyboset haitu ka i Daud hamai ri ngata Hebron bo niuliramo, “Hitumo balengga i Isyboset ana langgai i Saul, balimiu anu madota mompatesi komiu. Eo hitu TUPU nombabalasi pokainggu i Saul bo mulina.”
9 Tapi nesana i Daud, “TUPU Natuvu sampe ri kasae-saena, nompakasalama yaku dako ri pura-pura kasusa. NisaniNa anu kuuli hitu nakana. 10 Ri ngata Ziklag baipia naria tona nanggeni kareba kamate i Saul ka yaku. Nisarumakana kareba belo nikenina. Tapi nisakaku tona haitu bo nipatesiku ia. Haitumo balasina anu nidekeiku ka ia rapombayari kareba nikenina haitu. 11 Mantamopa vai pehuku kupambela ka tona nadaa, anu nompatesi tona ledo nasala bo da ranja nggamonjo ri banuana mboto! Hitupa kana kutuntu pombabalasi ka komiu sabana pepatesi haitu, bo mombaropusi komiu dako ri dunia hitu.” 12 Naupu haitu niparenta i Daudmo tantarana mompatesi i Rekhab bo i Baana. Naupu nipatesi, pale bo kadara nitampasi bo karobatara niloe ri tinggi nu rano. Tapi balengga i Isyboset haitu niala bo nitana ri ngata Hebron ri podayo i Abner.