I Daud najadi magau Israel bo Yehuda
5
Naupu sia, pura-pura topanggeniaka valaa ntoIsrael nakava nte i Daud ri ngata Hebron bo nanguli, “Pua, kami hii sampesuvumiu. 2 Dako ri nggauluname, da tempona i Saul nomparenta kami, komiu nanggeniaka tantara Israel hau nosieva. Bo muni TUPU nojanji, komiu manggeniaka todea nTUPU bo majadi magau kami.” 3 I Daud novia pojanji nte pakeni-pakeni ntoIsrael ri ngata Hebron, bo ira nanganggataka ia majadi magau ntoIsrael. 4 Tempo i Daud nianggataka najadi magau, ia noumuru talupulu mpae, bo patapulu mpae kasaena ia najadi magau. 5 Ri ngata Hebron ia nomparenta toYehuda pitu-mpae santanga kasaena, bo ri ngata Yerusalem ia nomparenta pura-pura toIsrael bo toYehuda talupulu talu mpae kasaena.6 Naria saeo Magau Daud ante tantarana hau mombasuu ngata Yerusalem. ToYebus tupu ngata haitu, nanjarumaka ledo mamala Yerusalem radagi i Daud. Sabana haitu ira nombasauru bo nanguli ka ia, “Ledo mupakule mesua tumai. Nau toburo bo tokejo mamala mompopalai iko.”
7-9 Tapi i Daud nanguli ka tantarana, “Ane madota mombadagi toYebus, kita mesua modala ri bolo anu nipovia rapodala nu uve. Vesiamo kita hau mombasuu toburo bo tokejo haitu.” Apa narau mpuu rara i Daud ka toYebus. (Haitumo sabana tona nanguli, “Toburo bo tokejo ledo mamala mesua riara Banua nTUPU.”)
Jadi i Daud namala nangago bente ntoYebus anu niuli muni bente Sion. Bente haitu nipoposanga “Ngata Daud” bo ia nonturo hamai. Ngata Yerusalem haitu nipopeanggana nombatiku bente ntoYebus baipia, nompamula dako ri sabingga mpandake bulu anu binggena nitaivu nte tana ala marataa. 10 Nasae-sae i Daud nantambai karosona, sabana TUPU Alatala anu nompajadi dunia bo isina nantulungi ia.
11 Magau Hiram dako ri ngata mbaso Tirus nombatudu surona hau nte i Daud bo nipakatuna muni kayu kayou dako ri Libanon bo pande kayu ante pande vatu mompopeangga banua kamagaua ka i Daud. 12 Sabana haitu nisani i Daud aga TUPU nompakaroso ia najadi magau ntoIsrael bo nompakaroso kamagauana ala majadi kabelo ka todea nTUPU.
13 Nolinjapa i Daud dako ri ngata Hebron hau ri ngata Yerusalem, ia nompoberei bara sakondua vai mombine bo nialana muni mombine nipajadina berei piarana. Jadipa nantambaimo kadeana anana langgai bo mombine. 14 Hitumo anana langgai anu nipoanaka ri ngata Yerusalem: i Syamua, i Sobab, i Natan, i Salomo, 15 i Yibhar, i Elisua, i Nefeg, i Yafia, 16 i Elisama, i Elyada, bo i Elifelet.
I Daud nombadagi toFilistin
17 Niepe ntoFilistinpa i Daud nianggataka najadi magau ntoIsrael, ira madota mombasaka ia. Tapi niepe i Daud niara haitu bo hau ri bentemo iab. 18 ToFilistin nakava ri Lemba Refaimc bo notenda hamai. 19 Nipekutana i Daudmo TUPU, “Berimba? Kana kueva toFilistin haitu? RadekeiMiu padagi ka yaku?”
Nesana TUPU, “Evamo! Kudekei padagi ka iko.”
20 Naupu haitu haumo i Daud ri Baal-Perasim bo rahaitumo pombadagina toFilistin. Nangulimo ia, “TUPU nombatulungi kami sampe namala nombagerosi karoso nu bali kami, nasimbayu mpo lono nombaavesaka mpengaya-ngaya.” Haitumo sabana tana rahaitu niuli Baal-Perasim.g 21 ToFilistin nangova nalai domo nakapo nanggeni tau-tau anu nisombara. Tau-tau haitu niala gi Daud.
22 Ledo nasae kaliuna haitu, nakava vai toFilistin notenda ri Lemba Refaim. 23 Sangganipa vai i Daud nerapi panggava dako nte TUPU. TUPU nanguli, “Nemo mombaeva ira dako ri sii, tapi polipamo molintiku bo suumo ira dako ri bengo, ri sinjori kayu-kayu murbei. 24 Ane nuepe moni ri lolo kayu mpo nese kada ntona nobaresi, kaparaimo, apa Yaku molipa ri ngayomu mombadagi tantara ntoFilistin.” 25 I Daud nangoseaka petudu nTUPU bo ia padagi nangeva toFilistin dako ri ngata Geba sampe ri ngata Gezer.