I Boas noberei nte i Rut
4
I Boas hau ri kasiromu ri bobaa ngata bo nonturo ri sia.
Da nonturo-nturo ia ri sia,
noliumo langgai anu naparapa posampesuvuna nte i Elimelekh,
anu masipato mompeili katuvu i Rut bo i Naomi.
Jadi nironde i Boasmo ia,
“He sampesuvu,
kai tumai sampalai,
monturo ri sii.”
Jadi hau mpuumo ia bo nonturo ri sia.
2 Pade niulika i Boasmo sapulu totua ngata,
“Monturo ri sii.”
Bo nonturo mpuumo ira.
3 Nonturopa ira,
notesamo i Boas ka sampesuvuna haitu,
“I Naomi nanjilimo dako ri tana Moab.
Hitu-hitu ia madota mompobalu tana nu sampesuvuta i Elimelekh.
4 Niuliku mabelo ane kupopaisani ka iko.
Ane madota iko mangalina,
ulimo ri ngayo ntodea hitu.
Ane ledo,
uli pakalanto,
ala kusani,
apa ikopa paratama masipato rapotupuna,
pade yaku.”
Nesana tona haitu,
“Iyo,
yaku mangalina.”
5 Pade nanguli vai i Boas,
“Nabelomo.
Tapi ane nuali tana dako nte i Naomi haitu,
kana muala muni i Rut,
toMoab,
timbala ana i Naomi.
Apa tana haitu batena maboli ka muli ntomate haitu.” a
6 Nesanamo tona haitu,
“Ane ivesia,
ledo kupakule.
Jadi domo yaku rareke sampesuvu naparapa anu masipato mangali tana haitu.
Ledo ria gunana kuali apa tana haitu tantu ledo mamala rapotana nu muliku anu nariamo.
Aginamo iko mangalina.”
7 Tempo haitu ane tona mobalu bara mosula bara nuapana,
kana ravonjuna sandalena bo radekeina ka topangali haitu.
Ivesia nipovia ntoIsrael nompakaasa posiali bara posinjula.
8 Sabana haitu,
tempo ia nanguli ka i Boas,
“Ikomo mangalina,”
nivonjunamo sandalena bo nidekeina ka i Boas.
9 Jadi nangulimo i Boas ka totua-totua ngata ante roa-roara ntanina naria ri sia,
“Eo hitu komiu najadi sabi,
nialikumo tana dako nte i Naomi,
pura-pura tana dako nte i Elimelekh ntaliana,
haitumo i Kilyon bo i Mahlon.
10 Bo dako rahaitu kuala muni i Rut,
toMoab,
timbala i Mahlon majadi bereiku.
Ivesiamo tana haitu batena majadi tana muli i Mahlon.
Bo mulina muni batena maria nte sampesuvura ri ngatara.
Sampesuvu-sampesuvu,
toramo,
eo hitu komiu pura-pura najadi sabiku.”
11 Totua-totua ngata bo tona ntanina ri sia nanguli,
“Iyo,
kamimo sabina.
Kambou TUPU mompajadi berei barumu nasimbayu eva i Rakhel bo i Leab anu noana nadea sampe najadi todea Israel.
Kambou malanga nturomu ri Efratac bo sangamu mabelo ri Betlehem.
12 Kambou maria ngana radekei nTUPU ka iko rapoanaka nu mombine muda hitu mompajadi mulimu madea mpo muli i Peres,
ana i Yehuda bo i Tamar.” d
I Boas bo mulina
13 Jadi niala i Boasmo i Rut bo nipobereina.
Ira nosampaturu bo TUPU nombadekei muli ka i Rut bo nipoanakana saito ngana langgai.
14 Jadi mombine-mombine nanguli ka i Naomi,
“Nabelo mpuu TUPU!
Eo hitu nidekeiNamo ka iko tupu langgai anu manjaliku iko.
Kambou ngana haitu majadi tona malanga nturona ri ngata Israel!
15 Maniamu mpuu-mpuu nompotove iko.
Nabelopa ia pade papitu ngana langgai.
Hitupa nipoanakanamo tupu langgai ka iko,
anu mompakasana raramu,
bo mompeili iko ri tempo nggatuamu.”
16 Niala i Naomi ngana haitu nisalungguna bo nipatuvusina.
17 Mombine-mombine nosadoyata nte ira nompoposanga ngana haitu i Obed.
Isema-sema niulikara,
“I Naomi noana langgaimo!”
I Obedmo ngena majadi tuama i Isai,
bo i Isai tuama i Daud.
18-22 Hitumo sunju ntotua i Daud,
nompamula dako nte i Peres,
ivei:
i Peres,
i Hezron,
i Ram,
i Aminadab,
i Nahason,
i Salmon,
i Boas,
i Obed,
i Isai,
i Daud.