I Rut bo i Boas ri potambunaka pae
3
Bara sakuya tempo naliu haitu,
nangulimo i Naomi ka i Rut,
“Kana kupasimbuku mangelo berei mabelo ka iko ala iko masana.
2 Nisanimu i Boas mai raposampesuvuta.
Bo iko topokarajaa singgani nte mombine ri taluana.
Jadi,
epemo!
Bongi hitu ia hau motapi pae ri pomporona.
3 Pandiumo bo pakemo sakide lana navangi soana bo pasuamo baju magaya.
Pade koimo ri pokarajaa i Boas ri pomporona pae.
Popea ri sia sampe maupu ia mangande bo manginu,
tapi nee sampe rasanina iko naria hamai.
4 Peintaka ri umba rapaturuna.
Ane mamonjomo ia,
koi sunggeraka potampuni kadana,
pade paturumo mapara kadanaa.
Damo raulina ka iko nuapa kana nupovia.”
5 Nesana i Rut,
“Iyo,
Ina.
Kuturusi pura anu niulimiu.”
6 Jadi hau mpuumo i Rut ri pomporo pae i Boas.
Hamai nioseakana pura anu niuli nu matuana.
7 Naupupa i Boas nangande bo nanginu,
naosamo bo nasana munimo rarana.
Hau naturumo ia napara potambunaka pae.
I Rut nakava nggalino-lino nisunggerakana potampuni kada i Boas,
pade naturu ri sinjori nggadana.
8 Natanga bongi sampesanika nanotomo rara i Boas bo ia negoli.
Natekaja ia naria saito mombine naturu ri sinjori nggadana.
9 Nipekutanana,
“Isema iko?”
Nesana i Rut,
“Yaku,
i Rut!
Komiu sampesuvu kami napara anu masipato mompeili katuvuku.
Poasimo yaku,
Tata.” b
10 Nesana i Boas,
“Anaku,
damo TUPU mombadekei belo ka iko.
Ane rapekiri anu nipoviamu ka matuamu,
poviamu hitu nompopakita pepotovemu nelabipa vai kaogena.
Kakanana iko mamala mangelo poberei nte tona da namuda,
bara makalumana bara mapakasi,
tapi ledo vesia nipoviamu.
11 Jadi,
nee makini raramu.
Pura-pura perapimu kuturusi apa pura-pura tona ri ngata hitu nisaniramo iko tona nabelo.
12 Nakana mpuu yaku saito tona anu masipato mompeili katuvumu,
apa yaku sampesuvu matuamu langgai.
Tapi da naria saitopa ntanina anu masipato mompeili katuvumu.
Bo naparapa posampesuvura pade yaku.
13 Bongi hitu paturu ri siimo.
Maile mpadondo hau kupekutana bara madota ia mompeili iko bara ledo.
Ane madota ia,
nabelomo;
tapi ane ledo rapokonona,
yakumo mojanji nte Alatala anu Natuvu sampe kasae-saena,
yaku mompeili iko.
Jadi paturu ri siimo sampe maeo.”
14 Jadipa naturumo i Rut ri sinjori kada i Boas.
Kamaile mpadondona da naruyo ntoto,
i Rut nembangumo.
Apa ledo nipokono i Boas rasani ntona i Rut nakava ri sia.
15 Nangulimo i Boas ka i Rut,
“Voke sii buya njambekamu.”
Jadi nivokena mpuumo buyana bo i Boas nombatoli pae ri buya i Rut,
nitasere ropulu kilona.
Pade nianggatakanamo ri vinga i Rut.
Naupu haitu nanjilimo i Boas hau ra ngata.
16 Nakavapa i Rut ri banua,
nekutanamo matuana,
“Anaku,
berimbamo kajadina?”
Jadi nitesa i Rut puramo anu nipovia i Boas ka ia.
17 Bo niulina muni,
“Nidekeina vai pae hitu ka yaku,
apa niulina nemo manjili boa tumai nte komiu.”
18 Nesana i Naomi,
“Popeamo sampe nukita berimbana ngena kaupu parakara hitu.
Dopa maosa rara i Boas ane parakara hitu dopa maupu raurusina eo hitu muni.”