I Rut nokarajaa ri talua i Boas
2
Naria sampesuvu i Elimelekh,
berei i Naomi.
Sampesuvuna haitu nosanga i Boas.
I Boas mai nosisani belo nte i Naomi.
Ia tona nakalumana bo naria nturona.
2 Naria saeo nangulimo i Rut ka i Naomi,
“Ina,
hau ri talua yaku mombaduru pae nanavu dako ri pale ntopokato.
Bara maria tona mombadekei yaku mombaduruna.”
a
Nesanamo i Naomi,
“Ledo nakuya. Koimo!”
3 Jadi hau mpuumo i Rut nombaduru pae nanavu lako ri pale ntopokato.
Tano mai talua nikalauna,
talua i Boas,
sampesuvu matuana i Elimelekh.
4 Dopa nasae,
nakavamo i Boas dako ri Betlehem nombatabe topokato,
bo nanguli “Kambou TUPU momporoa komiu.”
Nesana topokato,
“Perapi TUPU mombadekei belo ka komiu.”
5 Pade nipekutana i Boasmo mandorona,
“Isema mombine moitu?”
6 Nesana mandorona,
“Ia toMoab dako nakava singgani nte i Naomi lako ri tana Moab.
7 Niperapina nte yaku ala kudekei ia mantutuni puri ntopokato mombadurusi anu nanavu.
Dako ri mpandondoname ia nokarajaa njuu,
bo aga nopause sampalai ri sou.”
8-9 Jadi nangulimo i Boas ka i Rut,
“Anaku,
epemo.
Tuumo hau mombaduru pae ri talua ntona ntanina.
Aginamo mombaduru pae singgani nte topokato ka yaku ri sii.
Peintakamo ri umba rapokato nu mombine.
Tuntunimo purira bo nee rakavaosi ira.
Ane mabai tambolomu,
inumo uve niisi nu langgai-langgai nokarajaa.
Niulikukamo ira ala nee rabatora iko.”
10 Nangepe anu niuli i Boas,
nantaputumo i Rut ri ngayona nte lenjena narapa tana bo nanguli,
“Tata,
ledo masipato yaku mantarima belomiu tutu.
Yaku tosangatana bo ledo masipato rapoasimiu.”
11 Nesana i Boas,
“Niepeku puramo anu nipoviamu ka matuamu sanggamatenamo bereimu.
Nisaniku nipalaisimumo totuamu bo ngatamu ala makava bo monturo ri sii mosanggani nte tona dopa nisanimu.
12 Damo TUPU mobalasi pura-pura belo nipoviamu.
Damo TUPU,
Alatala nisomba ntoIsrael,
mombadekei anu masipato radekei ka iko,
apa iko nakava nekisaliku nte Ia.”
13 Nesana i Rut,
“Tata,
nabelo mpuu komiu nte yaku,
naupa yaku ledo nasimbayu nte topokarajaa ka komiu.
Kabelomiu mpuu-mpuu nompakasana raraku.”
14 Nakavapa tempo mangande,
nangulimo i Boas ka i Rut,
“Kamai mangande.
Sii roti bo hitu nasu bratulaka roti.”
Jadi nangande singganimo i Rut nte topokarajaa ntanina.
Nidekei i Boas munimo pae nisole ka ia,
bo nikandena sampe nabosu.
Naupu nangande nariapa muni labina.
15-16 Naupu haitu hau vaimo i Rut nombaduru pae.
Haupa ia,
nangulimo i Boas ka topokarajaa ka ia,
“Ane raduruna napara pae nipoumo,
dekeikamo.
Nee rapakaeya bara rapokarau ia.
Tunggaimo mbaosu sakide-sakide anu nipou haitu bo navusaka ka ia ala raduruna.”
17 Jadi i Rut noduru pae sampe nanggovia.
Naupu niporona pae nipasiromunamo,
nitasere sapulu kilo kaogena.
18 Pade nanjilimo ia hau ri banua nanggeni asele pompasiromuna haitu bo nipopakitana ka matuana sakuya kadeana nipasiromuna.
Nidekeina muni kandea ledo naupu nikandena pangane.
19 Jadipa nangulimo i Naomi ka ia,
“Ri umba nipanggavamu pura-pura hitu?
Ri talua isema nipombadurumu pae eo hitu?
Damo Alatala mombadekei rasi ka tona novia nabelo nte iko!”
Jadi nitesa i Rutmo ia nombaduru pae ri talua i Boas.
20 Nanguli i Naomi,
“Tona tutu da raposampesuvuta,
iamo saito tona masipato mompeili kita.
Damo TUPU mombadekei rasi ka ia.
TUPU batena nabelo nte kita anu da natuvu,
bo nte ira anu namatemo.”
21 Pade nanguli vai i Rut,
“Ina,
tona haitu nanguli muni mamala yaku mombaduru njuu pae singgani nte topokarajaa ka ia,
sampe malimpuru pura pae ri taluana rakato.”
22 Nesanamo i Naomi ka i Rut,
“Iyo,
anaku.
Nabelopa iko mokarajaa nte mombine ri talua i Boas.
Apa,
ane hau ri talua ntona ntanina iko,
bara rabato ntona iko hamai!”
23 Jadi i Rut batena nantuntuni mombine nokarajaa ri talua i Boas.
Niduruna pae hamai sampe nalimpuru pura nikato,
pae jalai anu natasa nokolu,
bo muni gando anu natasa nggapuri.
I Rut batena nonturo nte matuana.