I Rut
I Elimelekh njamboko ntaliana nolinja hau ri ngata Moab
1
1-2 Nggaulu ngata Israel niparenta nu topotangara.
Naria santempo njumangu tana Israel nambela ara mpai.
Tempo haitu naria saito langgai nosanga i Elimelekh.
Ia toEfrata nonturo ri ngata Betlehem ri bagia Yehuda.
Bereina nosanga i Naomi bo anana langgai randua nosanga i Mahlon bo i Kilyon.
Ira njamboko ntaliana hau ruru ri ngata Moab sabana ara mpai,
bo naroo ri ngata haitu.
Da hamai ira,
3 namatemo i Elimelekh.
Nabolimo i Naomi bo anana randua.
4 Randua-ndua nompoberei toMoab:
saito nosanga i Orpa,
bo karanduana nosanga i Rut.
Nitasere sapulu mpaena ira nonturo sia,
5 namate puramo i Mahlon bo i Kilyon,
jadi i Naomi naboli saitona,
domo naria bereina bo anana.
I Naomi bo i Rut nanjili hau ri Betlehem
6 Bara sakuya kasaena naliu haitu,
niepe i Naomi TUPU nomparantaika todeaNa bo nauda vai ri Israel sampe naria vai asele ntanara.
Jadi nanggalivomo ia ante maniana randua mompalaisi ngata Moab.
7 Jadi nalai singganimo ira dako ri ponturora haitu.
Da ri dala manjili hau ri ngata Yehuda,
8 nangulimo i Naomi ka maniana randua haitu,
“Aginamo komiu manjili hau ri banua ntinamiu.
Damo TUPU mompoasi komiu,
eva yaku nipoasiNa bo bereimiu anu namatemo.
9 Damo Tupu mombadekei poberei bo pobanua nabaru ka komiu.”
Pade nieki i Naomimo ira,
tapi i Rut bo i Orpa aga namangga notumangi
10 bo nanguli,
“Nee mogaa kita.
Kami madota mantutuni komiu manjili hau ri ngatamiu.”
11 Tapi nanguli i Naomi,
“Anaku,
panjilimo komiu.
Tuumo ratuntunimiu yaku.
Domo maria hanupa ngana langgai kupoanaka rapobereimiu.
12 Panjilimo komiu.
Natua gagamo yaku moberei.
Naupa bongi hitu yaku moberei bo moana langgai,
13 apa rapopeamiu sampe ia makabilasa?
Rataamakamiu karomiu ledo moberei mompopea ia?
a Neemo ivesia,
anaku,
madeapa kasusa kurasai pade komiu,
apa Tupu nombahuku yaku.”
14 Namangga vaimo ira notumangi.
Nieki i Orpamo matuana bo nalaimo ia,
tapi i Rut ledo nadota mogaa nte matuana.
15 Nangulimo matuana ka ia,
“Rut,
peintamo!
Lagomu nanjilimo hau ri ngatana bo hau nte tupu-tupu nisombana.
Koi munimo iko,
tuntunimo ia manjili!”
16 Tapi nesana i Rut,
“Ina,
nee ratudu yaku manjili bo mompalaisi komiu!
Yaku mantuntuni komiu,
Ina.
Nau ri umba rakalaumiu,
ri situ muni kukalau.
Ri umba raponturomiu,
ri sia muni kuponturo.
Ngatamiu ngataku muni.
Alatala nisombamiu,
sia muni kusomba.
17 Ri umba rakamatemiu,
situ muni kukamate bo rapotana yaku.
Damo TUPU mombahuku ntamo yaku ane mogaa nte komiu,
aga kamate mompopogaa kita!”
18 I Naomi nanggita ledo mpuu madota i Rut mogaa nte ia,
jadi domo niulina hanupa nuapa-nuapa.
19 Napolamo polipara sampe ri ngata Betlehem.
Nakava ri sia,
natolelemo kakavara ri ngata haitu.
Mombine-mombine [nadamba bo] nanguli,
“I Naomi mpuumo komiu?”
20 Nesana i Naomi,
“Tuumo rarondemiu ‘i Naomi’ yaku,
rondemo i ‘Mara’,b
apa Alatala toNakuasa nompalamba yaku matuvu ante kasusa.
21 Tempo yaku nalai dako ri sii baipia,
nagana katuvuku,
tapi hitupa yaku nipopanjili nTUPU nte pale boa.
Haitumo sabana tumo rarondemiu yaku ‘i Naomi’,
apa TUPU toNakuasa nombahuku yaku ante nadea kasusa!”
22 Jadi ivesiamo kavoli i Naomi bo maniana i Rut toMoab dako ri tana Moab.
Ira nakava eva suka nompamula posombe nu pae jelai. c