Sambaya i Hana
2
Nosambayamo i Hana,
niulina,
“I PUE nompakadamba raraku;
poviaNa nompakasana nyawaku.
Ante damba rara kupongeika baliku,
sabana Alatala mpuu-mpuu nombatulungi yaku.
2 Ledo ria kasimbayuna nte TUPU!
Aga Ia mamala rapetalenduta.
3 Penontomo modava!
Bo domo motesa masombo!
Sabana pura-pura nisani nTUPU Alatala,
bo niujiNa pura panggavia ntona.
4 Pana nu tadulako nakotomo,
tapi tona nalente nantambaimo karosona.
5 Tona baipia mpelabi-labi pangandena,
hitupa najadi topangande gajimo
ala rakavara pangande.
Tona baipia naara,
hitupa nompelabi-labimo anu nikandera.
Mombine nagampa,
hitupa nadambamo rarana
sabana papitumo ngana nipoanakana!
Tapi mombine nadea anana,
nipalaisimo bo domo nipeili.
6 TUPU nompakatuvu manusia,
bo Ia muni nompakamatena.
Ia nompopanau manusia ri ponturo malaeka ntomate,
bo Ia muni manganggatakana dako rumai.
7 TUPU nompakapakasi tona,
bo Ia muni nompakakalumanana.
TUPU nompakalanga nturo ntona,
bo Ia muni nompopanauna.
8 TUPU nanganggataka kasusa ntona anu ledo naria anuna sangu sangaya,
bo Ia nombakabasaka tona napakasi.
Ira nipoporoa nte tona anu nibila katuvuna,
bo nidekeika nturo nabelo.
Polande dunia TUPUmo tupuna
bo ri bavo polande haitu nipopeanggaNa dunia.
9 Tona natutu nangoseaka TUPU batena matinonto sabana nijagaiNa.
Tapi tona nadaa rapakaropu riara ponturo malaeka ntomate.
Ledo mamala mombasarumaka pompakule mboto,
karoso manusia ledo padagi.
10 TUPU mombaropusi pura-pura baliNa,
suara nTUPU namangga mpo guru ri langi mompakaeka ira.
Tupu mombahuku njumangu dunia,
bo mombadekei kuasa ka magau nipelisiNa.
11 I Elkana sambanua nanjilimo hau ri ngata Rama,
tapi i Samuel naboli nonturo ri ngata Silo bo nokarajaa ka TUPU riambe parenta i Eli topanggeni pesomba.
Pokainggu ana-ana i Eli
12 Ana-ana i Eli nadaa mpuu.
Ledo nioseakara TUPU.
13 Pokainggura ledo masipato ka topanggeni pesomba ntoIsrael,
ira aga nangoseaka dotara mboto.
Ane naria tona nombadekei binata rasambale rapesomba ka Tupu,
batua ana i Eli nakava nanggeni ase potosu.a
Da ranja nidaka bau,
14 potosu haitu nitosura ranggura podaka,
bo anu nambela nitosura najadi bagiara.
Pura-pura toIsrael nakava ri ngata Silo nanggeni pesomba,
nipoviara ivehaitu.
15 Nabiasa muni batua ana i Eli nakava dopame nombataniaka lomuna ratunub,
bo niulikara tona nombadekei pesomba haitu,
“Dekeimo bau da namata tutu ka topanggeni pesomba bo ratapana;
apa ledo nitarimana bau nidaka.”
16 Ane tona haitu mesana,
“Aginapa ratuntunita atura,
bo mombatunu lomu haitu ruru.
Maupu haitu mamalamo muala sakuya mupokono.”
Batua ana i Eli mesana vai,
“Ledo,
hitu-hitu muni kana mudekei.
Ane ledo,
kana kuago.”
17 Randua ana i Eli haitu nambaso mpuu dosara nte TUPU,
sabana ledo nibilara pesomba ka TUPU.
I Samuel nokarajaa ka Tupu ri ngata Silo
18 Tempo haitu,
nau i Samuel da nakodi ia nokarajaa ka TUPU njuu.
Ia nompake baju efod,
baju nipake ntopanggeni pesomba anu nipovia dako ri kae nalusu.
19 Mpae-mpae i Hana bo i Elkana hau nombadekei binata rasambale rapesomba ka TUPU ri ngata Silo.
I Hana novia baju ndoe nakodi radekeina ka i Samuel.
20 I Eli nerapi nte TUPU ala mombadekei belo ka i Elkana nte bereina,
bo niulikanamo i Elkana,
“Kuperapi TUPU mombadekei ngana vai ka iko dako nte bereimu hitu,
raposambei ngana anu nidekeimiu ka TUPU.”
Naliu haitu nanjilimo ira hau ri ngata Rama.
21 Alatala nombadekei belo ka i Hana bo noana vai ia tatalupa langgai,
randua mombine.
I Samuel nantambaimo kambasona bo ia batena nokarajaa ka TUPU.
Pepatora i Eli ka ana-anana
22 I Eli natua ntotomo tapi ledo naupu-upu niepena topompangadu pokainggu anana nte toIsrael.
Nisani i Eli muni ana-anana naturu nte mombine-mombine anu nokarajaa ri vamba nu Tenda nikakava nTUPU.
23 Sabana haitu nangulimo i Eli ka ana-anana,
“Pokainggumiu nadaa!
Pura-pura tona nompangadu ka yaku.
Nakuya komiu nokainggu vehaitu?
24 Anaku!
Tumo hanupa rapoviamiu anu ivehaitu.
Nadaa mpuu pokainggumiu nitesa ntodea nTUPU!
25 Ane tona novia sala nte manusia,
Alatala namala manjaliku ia;
tapi ane tona movia sala nte TUPU,
isema manjaliku ia?”
Tapi ana-ana i Eli ledo nangepe pepatuduki ntomara sabana nibotusi nTUPUmo ira rapatesiNa.
26 Tapi i Samuel,
nantambaimo kambasona bo nantambaimo nipokono nTUPU bo pura-pura tona.
Tesa nu Alatala anu majadi nte i Eli ntali muli
27 Naria saeo nakava saito nabi nte i Eli bo nanguli tesa nTUPU ka ia,
ivei,
“Tempo toIsrael najadi batua magau Mesir baipia,
Yaku nompopakita karoKu ka i Harun totuamu nggaulu.
28 Ia nipelisiKu dako ri pura-pura valaa ntoIsrael majadi pakeni ntopanggeni pesomba bo mombadekei pesomba ntodea ka Yaku ri lanta pesomba.
Ia mombatunju dupa,
bo ane ia motesa nte Yaku rapakena baju efod [tandana ia pakeni ntopanggeni pesomba].
Bo nidekeiKumo ira nte mulira mangala sabagia pesomba nipalabu ri lanta pesomba.
29 Jadi,
nakuya bo nario vai matamu nanggita pesomba-pesomba anu niparentaKu rakeni ntodeaKu ka Yaku?
Nakuya iko Eli,
nibilamupa ana-anamu pade Yaku,
bo nipalambamu ira nompakaboya karora ante bau tobelona dako ri binata nisambale bo kandea nipesomba ntoIsrael ka Yaku?
30 Yaku TUPU Alatala nisomba ntoIsrael.
Nggaulu nijanjiKumo,
iko bo muli nu mulimu mokarajaa ka Yaku majadi topanggeni pesomba sampe ri kasae-saena.
Tapi hitupa domo!
Sabana pokainggu nu ana-anamu!
Apa isema-sema nombabila Yaku,
Kubila muni,
tapi isema-sema nombasalai Yaku Kusalai muni.
31 Epemo,
makava ngena tempona Kupatesi pura sampesuvumu bo mulimu anu da nakabilasa,
ala ledo ria saitoa sampesuvumu langgai matuvu sampe matua.
32 Iko masiriati bo masusa raramu manggita pura-pura kabelo Kudekei ka tona ntanina ri Israel.
Tapi mulimu mboto da mamuda mamate puramo.
33 Saito dako ri mulimu,
Kupalamba matuvu bo mokarajaa ka Yaku majadi topanggeni pesomba.
Tapi ia majadi maburo bo matuvu nte upu nu rara.
Pura-pura mulimu ntanina mamate rapepate.
34 Randua anamu haitu,
i Hofni bo i Pinehas kana mamate ri eo saeo.
Haitu majadi tanda ka komiu tesaKu hitu nakana bo madupa mpuumo.
35 Maliu haitu Kupelisi topanggeni pesomba anu matutu mangoseaka Yaku bo rapoviana bara nuapa Kuparenta ka iac.
Ia Kupopomuli bo mulina haitu batena majadi topanggeni pesomba ri ngayo magau-magau nipelisiKu.
36 Pura-pura mulimu anu da natuvu,
kana hau mantaputu nte pakeni ntopanggeni pesomba haitu merapi doi bo pangande.
Raulira ivei:
‘Dekeimo yaku mombatulungi topanggeni pesomba,
ala kukava pangande nau aga sakide.’ ”