TUPU neonga nte i Samuel
3
Tempo haitu,
i Samuel da nangana nokarajaa ka TUPU nombatulungi i Eli.
Tempo haitu petevai bo pompakita dako nte TUPU nakuramo.
2 I Eli natua ntotomo bo navundomo matana.
Naria sambongi,
ia naturu ri tombi paturuna,
3 bo i Samuel naturu napara ri Peti Pojanji nTUPU,
riara nu Banua nTUPU.
Tempo bobayana dopa naravanjaka bo poindo da navaya,
4 TUPU nombaronde i Samuel,
bo i Samuel nesana,
“Nuapa,
pua?”
5 Pade nangova ia hau nte i Eli bo nanguli,
“Nuapa,
pua?
Nakuya nirondekamiu yaku?”
Nesana i Eli,
“Ledo yaku nombaronde iko,
paturu mpanjilimo.”
Bo naturu mpanjili vaimo i Samuel.
6-7 Pade nironde nTUPU vai i Samuel,
tapi ledo nisani i Samuel anu nombaronde ia TUPU,
sabana doparia TUPU notesa nte ia.
Jadi nembangu ia,
hau nte i Eli bo nekutana,
“Nuapa,
pua?
Nakuya nirondekamiu yaku?”
Nesana i Eli,
“Anaku,
ledo yaku nombaronde iko.
Paturu mpanjilimo.”
8 Katatalu ngganina TUPU nombaronde i Samuel,
pade nembangu vai i Samuel hau nte i Eli bo nanguli,
“Nuapa,
pua?
Nakuya nirondekamiu yaku?”
Tempo haitu muni pade nisani i Elimo anu nombaronde ngana haitu iamo TUPU.
9 Jadi niulina ka i Samuel,
“Paturu mpanjilimo,
bo ane raronde vai iko,
uli ivei:
‘Ulimo PUE,
kuepe anu rauliMiu ka yaku.’ ”
10 Naupu haitu nakavamo TUPU,
neangga ri sia bo neronde vai,
“Samuel,
Samuel!”
Bo nesanamo i Samuel,
“Potesamo,
PUE,
kuepe anu rauliMiu ka yaku.”
11 Bo notesamo TUPU ka ia,
“Pariaramo,
Yaku movia anu rapokumaaka ntoIsrael,
ala pura-pura tona mangepena maingu bo maeka rarara.
12 Ri eo haitu muni Kupakadupa pura anu niuliKu ka i Eli ntaliana dako ri pamulana sampe ri kaupuna.
13 NiuliKumo ka ia ivei:
ira ntaliana,
bereira,
bo ana-anara,
Kuhuku sampe ri kasae-saena sabana ana-anana nombasalai Yaku.
Nisani i Eli dosa-dosara haitu,
tapi ledo nipokarauna ira.
14 Dosara haitu nambaso mpuu.
Sabana haitu Yaku nosumpa ka gi Eli sambanua,
nau damo madea binata rasambale rapesomba ka Tupu,
ledo mamala mombalalisi dosara haitu sampe ri kasae-saena.”
15 Naupu haitu naturu vai i Samuel.
Mpadondona ia nembangu bo nombaungge vamba-vamba banua nTUPU.
Naeka ia nanguli anu nipeintana haitu ka i Eli,
16 tapi i Eli nombaronde ia,
“Samuel,
anaku.”
Nesana i Samuel,
“Nuapa,
pua.”
17 I Eli nekutana,
“Nuapa niuli nTUPU ka iko?
Uli puramo ka yaku.
Ane maria mutabuniaka,
natantumo iko rahuku nu Alatala.”
18 Jadi niuli i Samuel puramo ka i Eli anu niuli nTupu ka ia,
ledo ria nitabuniakana.
Nangulimo i Eli,
“Ia TUPU,
dekeikamo rapoviaNa anu nipekiriNa mabelo.”
19 Nantambaimo kambasona i Samuel.
TUPU nomporoa ia bo bara nuapa niuli i Samuel kana majadi.
20-21 Haitumo sabana pura-pura toIsrael dako ri njumangu ngata ri tana Israel,
dako ri ngata Dan sampe ri ngata Bersyeba nipangakura i Samuel nabi nTUPU.
Ane notesamo i Samuel,
njumangu todea Israel nangoseakana.a
TUPU neonga njuu ri ngata Silo apa hamai nidekeiNa tevai bo notesa ka i Samuel.