Peti Pojanji niago ntoFilistin
4
aTempo haitu toIsrael hau mosieva ante tantara ntoFilistin.
Tantara ntoIsrael notenda napara ngata Eben Haezer,
bo tantara ntoFilistin notenda ri ngata Afek.
2 Eo haitu tantara ntoFilistin nompasiayu baresi tantarana nosintingayo nte tantara ntoIsrael.
Tempo posievara haitu najadi-jadi mpuu,
tantara ntoIsrael nidagi bo nitasere patanjobu kadeana ira namate riara mposieva haitu.
3 Tempo tantara labina anu nidagi nanjili hau ri potenda,
pakeni-pakeni ntoIsrael nanguli,
“Nakuya tano nipalamba nTUPU kita nidagi ntoFilistin eo hitu?
Anumo,
hau raalata Peti Pojanji nTupub dako ri ngata Silo bo rakenita tumai,
ala TUPU madota mombatulungi kita bo mompakasalama kita dako ri balita.”
4 Jadi pakeni-pakeni tantara ntoIsrael nombatudu tona hau ri Silo mangala Peti Pojanji nTUPU anu nompajadi dunia bo isina bo nonturo ri bavo nu kerubc.
Randua ana i Eli,
iamo i Hofni bo Pinehas,
nantuntuni Peti Pojanji haitu.
5 Nakavapa Peti Pojanji nTupu haitu ri potenda ntoIsrael,
nodade pakamanggamo ira sampe nogoya tana.
6 Dadera haitu niepe ntoFilistin muni bo niuliramo,
“Nakuya toIbrani nodade-dade?”
Tapi nisanirapa Peti Pojanji nTUPU nakavamo ri potenda ntoIbrani,
7 naekamo ira,
bo niulira,
“Naria viata nisombara nakava ri potendara,
mandasamo kita!
Doparia kita nantingayo anu ivehaitu!
8 Mandasa mpuumo kita!
Isema mamala mompakasalama kita dako nte viata nisombara naroso haitu?
Apa ledo viata nisombara haitu nompatesi toMesir ri karava bai baipa?
9 He,
toFilistin!
Rapakaroota rarata!
Posievamo mpo langgai,
apa ane ledo,
kita majadi batua ntoIbrani,
eva ira ruru najadi batuata.
Sabana haitu pakabiamo mosieva!”
10 Najadi-jadi mpuu peeva ntoFilistin bo nidagira tantara ntoIsrael.
ToIsrael simbo nangova hau ri tendara mboto.
Nadea mpuu ira nidagi:
talu-pulu njobu tantara ntoIsrael namate.
11 Peti Pojanji nTupu niago ntoFilistin,
bo randua ana i Eli,
iamo i Hofni bo i Pinehas namate muni.
Kamate i Eli
12 Saito dako ri valaa ntoBenyamin nalai dako ri posieva hau ri Silo.
Eo haitu muni ia nakava.
Nibite-bitesina pakeana bo nidikana tana ri balenggana,
tanda nggabuku rarana.
13 Eo haitu muni i Eli nonturo ri bivi nu dala nompopea kareba posieva.
Ledo nasana rarana bo domo nokanano nompekirika kasalama Peti Pojanji nTUPU.
Niulipa ntoBenyamin haitu toIsrael nidagi,
pura-pura toponturo ri ngata Silo notumangi pakamangga.
14 Niepe i Eli topotumangi haitu,
bo nipekutananamo,
“Nakuya tona nakanano raitu?”
Topanggeni kareba haitu da ranja mpongova hau nte i Eli.
Nakavapa ia niulinamo kareba nadaa haitu.
15 Umuru i Eli tempo haitu siopulu bo valu mpaemo bo matana navundo.
16 Bo nangulimo topanggeni kareba haitu ka i Eli,
“Eo hitu yaku nalai dako ri posieva bo dako nakava ntoto.”
Nekutanamo i Eli,
“Berimba kareba nu anaku?”
17 Topanggeni kareba haitu nesana,
“ToIsrael nidagi ntoFilistinmo.
Nadea mpuu toIsrael namate riara posieva haitu,
bo anamiu i Hofni bo Pinehas,
namate muni.
Peti Pojanji Alatala niago ntoFilistinmo!”
18 Niulipa ntona kareba Peti Pojanji haitu,
nanavu ntumbalemo i Eli dako ri poturona ri sabingga vamba pesua rangata.
Ia natuamo bo naboya,
ivesia ia nanavu tambolona nakoto,
bo kapola-pola namate.
I Eli nanggeniaka toIsrael patapulu mpae kasaena.
19 Tempo haitu,
mania i Eli,
berei i Pinehas,
da natiana mbaso,
bo naparamo tempona ia moana.
Niepenapa Peti Pojanji Alatala niago,
bo muni matuana nte bereina namatemo,
sampesanika naduamo taina.
Dopa nasae noanamo ia.
20 Tempo ia maparamo maponji,
nangulimo mombine-mombine nombatulungi ia,
“Pakarosomo raramu!
Anamu langgai!”
Tapi ledo niparantaikana tesara haitu.
21-22 Ngana haitu nipoposangana i Ikabodd niulina,
“Karia nu Alatala Anu Nambaso Kakuasana nalipomo dako ri Israel.”
Batuana Peti Pojanji niagosimo bo matua nte bereina namatemo.
Haitu sabana ia nanguli,
“Karia nu Alatala nalipomo dako ri Israel,
sabana Peti Pojanji nu Alatala niagosimo.”