Peti Pojanji nu Alatala ri tana ntoFilistin
5
Naupupa Peti Pojanji nu Alatala niago ntoFilistin,
nikenira dako ri ngata Eben-Haezer hau ri ngatara ri Asdod.
2 Peti haitu nikeni ntoFilistin riara banua mpetupura,
bo nidikara ri sinjori tau-tau Dagon.
3 Kamaile mpadondona toAsdod nakava ri banua haitu,
nipeintara tau-tau Dagon nadungga ntuobo ri tana,
ri ngayo Peti Pojanji nTUPU!
Nianggatakara tau-tau haitu bo nidikara ri belana vai.
4 Tapi kamaile mpadondonapa,
nipeintara tau-tau haitu nadungga ntuobo vaimo ri ngayo Peti Pojanji nTUPU.
Tapi karongganina tau-tau haitu nadungga,
balenggana bo palena robingga napudu natetedeaka ri vamba;
damo karona ledo nakuya.
5 Haitumo sabana,
sampe eo hitua pakeni-pakeni ntopanggeni pesomba ka viata Dagon bo pura-pura tona anu nombasomba ia ri ngata Asdod,
nombalumpaiki polava vamba banua haitu.
6 Naliu haitu TUPU nombahuku toponturo ri ngata Asdod bo ngata ri sinjorina.
Karora nabisu-bisu.
7 Nipeintarapa anu najadi nte ira haitu,
nangulimo ira,
“Kita nte tau-tau Dagon nihuku nu Alatala nisomba ntoIsrael.
Nemo rapalambata Peti PojanjiNa rapakasae-sae ri sii.”
8 Sabana haitu alima magau ntoFilistin nigaga ntoAsdod ala molibu.
Nangulimo toAsdod,
“Rakuyata Peti Pojanji nu Alatala nisomba ntoIsrael haitu?”
Magau gahaitu nesana,
“Linjamo hau ri ngata Gat.”
Jadi Peti Pojanji nTupu haitu nilinja hau ri ngata Gat,
sangu ngata ntanina ri tana Filistin.
9 Tapi nakavapa Peti haitu ri ngata Gat,
TUPU nombahuku ngata haitu bo ira mpuu-mpuu najadi nagado.
Toponturo ri ngata haitu,
namuda bo natua nihuku pura bo karora nabisu-bisu.
10 Pade Peti Pojanji haitu nikeni vai hau ri ngata Filistin ntanina,
iamo ri ngata Ekron.
Nakavapa Peti haitu hamai,
todeana nongare bo niulira,
“Peti Pojanji nu Alatala ntoIsrael tutu nikeni tumai aga mompakamate kita pura!”
11 Sabana haitu,
todea ngata Ekron nombaronde pura-pura magau ntoFilistin molibu,
bo niulira,
“Popanjilimo Peti Pojanji nu Alatala nisomba ntoIsrael haitu hau ri belana mpanjili ala kita ntali sampesuvu ledo mamate pura.”
Ri njumangu ngata haitu naria kamatea anu mpuu-mpuu nompakagado sabana nantamo mpuu pehuku nidekei nu Alatala ka ira.
12 Tona ledo namate,
nipetaka nu bisu,
bo nongare-ngare nerapi tulungi nte viata nisombara.