Peti Pojanji nipopanjili ka toIsrael
6
Naganapa pitu mbula Peti Pojanji nTUPU ri ngata ntoFilistin,
2 toFilistin nombaronde topanggeni pesomba bo topeboto bo nipekutanara,
“Rakuyata Peti Pojanji haitu?
Ane rapopanjilita ri umba dala raoseta?”
3 Nesana topanggeni pesomba bo topeboto haitu,
“Peti Pojanji nu Alatala nisomba ntoIsrael haitu nemo rapopanjili bayangi.
Tapi kana manggeni potoloki rapombayari dosamiu,
ala mabelo komiu dako ri duamiu,
bo rasanimiu nakuya Alatala nisomba ntoIsrael njuu-njuu nombahuku komiu.”
4 Nekutana toFilistin,
“Nuapa rapotolokita ka TUPU Alatala nisomba ntoIsrael?”
Topanggeni pesomba bo topeboto haitu nesana,
“Lima angu bulava nolenje mpo bisu bo lima angu bulava nolenje mpo valesu,
kana rapakasimbayu kadeana ante magau-magau ntoFilistin.
Apa dua bisu nombarumpa komiu bo magau-magaumiu,
bo valesu nombagero ngatamiu.
5 Jadi,
poviamo bulava haitu molenje mpo bisu-bisu ri karomiu bo mpo valesu anu nombagero ngatamiu.
Ivehaitumo komiu mombabila Alatala nisomba ntoIsrael!
Ane rapoviamiu ivehaitu,
bara menontomo ngena Ia mombahuku komiu,
ngatamiu,
bo viata-viata nisombamiu.
6 Ledo ria gunana makaa bagamiu mpo toMesir bo magaura nggaulu.
Kana ratoramiu berimba Alatala nompambela silaka bo pehuku ka ira,
sampe domo nabia ira,
bo nipalambaramo toIsrael nalai dako ri Mesir.
7 Sabana haitu,
pakasadiamo roangu japi anu dopa nipake bo da nepatomi,
rapotaja kareta.
Sampemo japi haitu,
bo kenimo ana-anana hau ragimpu ala domo mombatuntuni tinana.
8 Maupu haitu,
koi alamo Peti Pojanji nTUPU bo saviraka ri karetamo.
Ri sinjori nu Peti haitu dikamo peti pomboli bulava anu radekeimiu ka TUPU rapombayari dosa.
Palambakamo kareta haitu majaa mboto.
9 Parantaikamo,
ane Peti Pojanji haitu rakenina hau modala ri ngatana mboto ri ngata Bet-Semes,
natantumo anu nombahuku kita iamo Alatala nisomba ntoIsrael.
Tapi ane kareta haitu ledo modala hau,
rasanitamo anu nombahuku kita ledo Alatala nisomba ntoIsrael,
tapi aga anu ledo nitunggai nombarumpa kita.”
10 Tona gahaitu nangoseaka anu niuli pangane.
Nialara roangu japi anu da nepatomi,
nisampera bo anana nisuarakara ra gimpu.
11 Peti Pojanji nTupu bo peti pomboli bulava nipovia mpo valesu bo bulava nipoviara mpo bisu-bisu nisavirakara ri kareta.
12 Japi nombataja kareta haitu kapola-pola nolipa nantuntuni dala hau ri ngata Bet-Semes.
Nolipa njuu japi,
nongoe bo ledo nesai-sai dako ri dala jama.
Alima magau ntoFilistin nombatuntuni kareta haitu sampe nesua hau ri ngata Bet-Semes.
13 Tempo haitu toBet-Semes da nompasiromu gando ri lobuna.
Nipeintarapa Peti Pojanji nTupu haitu,
nadambamo rarara.
14 Japi nombataja kareta haitu nenonto ri sinjori vatu mbaso ri talua i Yosua,
toBet-Semes.
Kareta haitu nigerora bo kayuna nibingga-binggara bo japina nisambalera nipajadira pesomba nipalabu ka TUPU.
15 Peti Pojanji nTUPU bo peti pomboli bulava haitu,
nitauraka ntoLewi bo nidikara ri bavo vatu mbaso.
Naupu haitu toBet-Semes nombadekei pesomba nipalabu,
bo binata ntanina nisambale rapesomba ka TUPU.
16 Naupu nompeinta anu najadi haitu,
eo haitu muni alima magau ntoFilistin nanjili hau ri ngata Ekron.
17-18 Ivesiamo toFilistin nombadekei pesomba pombayari dosa alima ngata anu niparenta alima magau ntoFilistin ante pura-pura ngata niparentara,
nau ngata nobente sampe nu boya-boya ri sinjorina.
Simbo sangu ngata nombadekei sangu bulava potoloki nolenje mpo bisu bo sangu bulava potoloki nolenje mpo valesu.
Alima ngata haitu iamo ngata Asdod,
Gaza,
Askelon,
Gat bo Ekron.
Vatu mbaso nipombolira Peti Pojanji haitu najadi sabi kajadia haitu.
Bo sampe eo hitua vatu haitu da nariapa ri talua i Yosua,
toBet-Semes.
19 TUPU nombapatesi pitu pulu deana toBet-Semes sabana ira nompeinta riara mPeti Pojanji nTUPU haitu.
Nasusa mpuu rara ntodea sabana nambaso mpuu pehuku nidekei nTUPU ka ira.
20 Pade nangulimo toBet-Semes,
“Isema mamala meangga ri ngayo nTUPU,
Alatala Anu Ledo Ria Kasimbayuna haitu?
Hau riumba rapanggenita Peti Pojanji hitu ala makavao dako nte kita?”
21 Pade nisuroramo tona hau nte toKiryat-Yearim bo niulira,
“Nipopanjili ntoFilistinmo Peti Pojanji nTUPU.
Katumai,
ala tulau nte komiumo Peti Pojanji haitu.”