7
Peti Pojanji haitu niala ntoKiryat-Yearim bo nikenira hau ri banua i Abinadab,
banua haitu ri buntina.
Pade i Eleazar ana i Abinadab nianggataka bo nipatanira mojaga Peti Pojanji haitu.
ToFilistin nidagi napara ngata Mizpa
2 Nitasere ropulu mpae kasaena Peti Pojanji haitu niboli ri ngata Kiryat-Yearim.
Riara tempo haitu pura-pura toIsrael nekakai nekitulungi nte TUPU.
3 Nangulimo i Samuel ka toIsrael,
“Ane komiu manjili mpanjili mombasomba TUPU ante mpuu-mpuu raramiu,
kana ratedeakamiu tau-tau Asytoret bo pura-pura viata anu nisomba ntosangatana.
Dekeimo karomiu ante mpuu-mpuu raramiu ka TUPU kambana Iamo rasombamiu,
ala rakabasakaNa komiu dako nte toFilistin.”
4 Jadi nitedeaka ntoIsraelmo tau-tau-tau-tau viata Baal bo tau-tau Asytoret.
Damo aga TUPU nisombara.
5 Naupu haitu nangulimo i Samuel,
“Kasiromu puramo komiu toIsrael ri ngata Mizpa,
bo kuposambayaka komiu,
merapi nte TUPU.”
6 Pade nasiromumo ira ri Mizpa.
Nitambura uve bo nikeni nibuusakara najadi pesombara ka TUPU,
bo saeo ntua ira nopuasa.
Niulira,
“Nadosamo kami nte TUPU.”
Ri Mizpa i Samuel nompamula notangara parakara ntoIsrael.
7 Niepepa ntoFilistin toIsrael nasiromu ri Mizpa,
alima magau ntoFilistin nte tantarana hau mangeva toIsrael.
Niepepa ntoIsrael toFilistin tumai mangeva ira,
jadi naekamo ira.
8 Niulikara i Samuel,
“Nemo menonto mosambaya merapi nte TUPU Alatala nisombata ala rapakasalamaNa kita dako nte toFilistin.”
9 Sabana haitu,
nisambale i Samuelmo sambaa ana bimba da namuda,
bo nipajadina pesomba nipalabu ka TUPU.
Naupu haitu pade nosambaya ia ala TUPU mombatulungi toIsrael,
bo posambayana haitu nitarima nTUPU.
10 Tempo i Samuel da nombadekei pesomba nipalabu haitu,
nompamulamo toFilistin nombasuu toIsrael.
Tapi tempo haitu muni suara nTUPU ri bavo ntoFilistin eva guru kede ri langi.
Naeka ira bo nakamburaka nangova.
11 Tantara ntoIsrael nesuvu dako ri ngata Mizpa bo nombaraga toFilistin sampe napara ri ngata Bet-Kar.
Nidagira toFilistin bo nadea toFilistin namate eo haitu nipatesira.
12 Naupu haitu nipopeangga i Samuelmo sangu vatu ri olo ngata Mizpa bo Yesana,
nipoposangana Eben-Haezera,
niulina,
“Sampe ri sii TUPU nombatulungi kita.”
13 Ivesiamo toFilistin Nidagi.
Bo domo nidekei nTUPU ira mesua ri ngata ntoIsrael ri tempo i Samuel da natuvu.
14 Pura-pura ngata ntoIsrael anu nidagi ntoFilistin baipia namala niala ntoIsrael mpanjili,
nompamula dako ri ngata Ekron sampe ri ngata Gat,
bo muni boya-boya ri sinjorina.
ToIsrael bo toAmori nosinggabelo muni.
15 I Samuel nomparenta ri Israel sampe ri kaupu nggatuvuna.
16 Mpae-mpae ia nolipa nompesayo ri ngata Betel,
Gilgal,
bo Mizpa.
Nipoposinggabelona toposisala ri ngata-ngata haitu.
17 Naupu haitu nanjilimo ia hau ri banuana ri ngata Rama.
Ri sia ia nomparenta toIsrael bo nompopeangga lanta pesomba ka TUPU.