ToIsrael nerapi saito magau
8
Natuapa i Samuel,
nianggatakanamo ana-anana majadi topotangara ri Israel.
2 Ana lumbuana nosanga i Yoel bo sunjuna nosanga i Abia.
Ira najadi topotangara ri ngata Bersyeba.
3 Tapi ira ledo nokainggu mpo tomara,
aga nombaraga kakalumanara mboto.
Ira nantarima doi mate bo potangarara ledo nanoa.
4 Haitu sabana pakeni-pakeni ntoIsrael nasiromu pura bo hau nosinggavaka i Samuel ri ngata Rama,
5 bo niulira,
“Epemo,
pua.
Komiu natuamo bo ana-anamiu ledo nokainggu mpo komiu.
Aginamo raanggatakamiu saito magau momparenta kami,
ala kami muni momagau mpo ngata-ngata ntanina.”
6 Anu niulira haitu ledo nipokono i Samuel.
Bo nosambayamo ia nerapi nte TUPU.
7 TUPU nanguli ka i Samuel,
“Poiyo puramo anu niperapira.
Sabana ledo iko nipoarara,
tapi Yaku.
Domo nipokonora Yaku majadi magaura.
8 Dako ri eo nipanggeniKu ira nesuvu dako ri tana Mesir sampe eo hitu,
nipalaikaramo Yaku bo ira nombasomba viata.
Anu nipoviara hitu ka iko,
ivesia muni nipoviara ka Yaku.
9 Sabana haitu poiyomo anu niperapira;
tapi painga mpuu-mpuu ira,
bo ulikamo anu rapovia nu magau anu moparenta ira ngena.”
10 Pura-pura anu niuli nTUPU haitu niuli i Samuel ka toIsrael anu nerapi magau.
Niulina ivei,
11 “Ivehitu ngena rapovia magaumiu ka komiu.
Ana-anamiu langgai rabarusuna majadi tantara;
sabagia ira manggeni kareta mposieva,
sabagia mojara,
bo sabagia molipa ri ngayo kareta mposieva.
12 Sabagia raanggatakana mombabalenggai tona sanjobu,
bo sabagia mombabalenggai lima pulu tona.
Magau haitu mombabarusu ana-anamiu mokarajaa tanana,
mompasiromu haselena,
bo movia pareva-pareva mposievana nte pareva kareta mposievana.
13 Ana-anamiu mombine ratuduna movia lana navangi,
moriapu bo movia roti.
14 Raalana tanamiu,
talua anggur bo talua zaitunmiu tobelona bo radekeikana ka topokarajaa ka ia.
15 Tana bo talua anggurmu rapambelana paja sabagia dako ri sapulu bagia haselena,
bo radekeikana ka topokarajaa ri banua kamagauana bo ka topokarajaa ntanina nte ia.
16 Raalana batua-batuamiu langgai bo mombine,
binatamiu tobelona bo keledaimiu rapakena ri pokarajaana.
17 Tovau bo bimbamiu raalana sangu dako ri sapulu anguna.
Bo komiu mboto rapajadina batua.
18 Ane makavamo tempona komiu mantangalu sabana magau nipelisimiu haitu,
tapi pantangalumiu ledo raepe nTUPU.”
19 Tesa i Samuel ledo niepe ntoIsrael,
tapi aga niulira,
“Dekeikamo!
Nau damo berimba kami kana momagau.
20 Naoge rara kami mpo ngata ntanina,
magau kami kana momparenta kami bo manggeni kami riara mposieva.”
21 Naupupa i Samuel nangepe tesara haitu,
niulinamo ka TUPU.
22 TUPU nesana,
“Oseakamo dotara bo anggatakamo saito magau ka ira.”
Pade nitudu i Samuelmo toIsrael simbo manjili hau ri banuara mboto.