I Saul nosinggava nte i Samuel
9
Naria saito tona nakalumana dako ri valaa ntoBenyamin,
nosanga i Kish.
I Kish ana i Abiel bo tupuna i Zeror.
I Zeror ana i Bekhorat,
tupuna i Afia.
2 I Kish noana langgai,
nosanga i Saul.
Ia kabilasa nagaya bo nalanga,
ledoria saitoa ri Israel nagaya mpo ia.
Karona nalanga,
bo pura-pura toIsrael aga sampe ri vingana.
3 Naria saeo bara sakoangu keledai besi i Kish nalipo.
Jadi nangulimo i Kish ka i Saul,
“Kenimo saito batua bo elomo keledai-keledai haitu.”
4 Pade i Saul nte batuana nompesayo ri bagia bulu Efraim bo tana Salisa,
tapi binata gahaitu ledo nikavara.
Pade nolipa njuu ira hau ri tana Sahalim,
tapi keledai gahaitu ledo muni nikavara.
Bo nielora muni ri tana Benyamin,
tapi ledo muni nikavara.
5 Nakavapa ira ri tana Zuf,
nangulimo i Saul,
“Hau manjilimo kita,
nemo ngena masesapa rara i tata mompekirika kita pade keledai gahaitu.”
6 Nesana batua haitu,
“Popea ruru!
Ri ngata hitu naria saito batua nu Alatala.
Ia mpuu-mpuu nibila ntona sabana anu niulina mpuu-mpuu najadi.
Anumo hau nte ia kita,
bara rasanina ri umba keledai gahaitu.”
7 Nanguli i Saul,
“Ane kita hau mosinggavaka ia,
nuapa radekeita?
Baku nikenita naupumo,
bo domoria nuapa-nuapa radekeita ka ia.”
8 Nesana batua haitu,
“Da nariapa sampeka doi salaka nte yaku.
Hitu kudekei ka batua nu Alatala ala raulina ri umba keledai gahaitu.”
9-11 Nesana i Saul,
“Nabelomo,
haumo kita.”
Bo haumo ira ri ngata niponturo batua nu Alatala haitu.
Tempo ira nendake ri buntina hau ri ngata haitu,
nosintomumo ira nte randaa-randaa hau manambu ri buvu.
Bo nipekutanaramo randaa gahaitu,
“Naria nabi ri ngata?”
(Apa tempo haitu batua nu Alatala niulira nabi,
jadi ane maria tona madota mekutana bara nuapa nte Alatala,
ira hau nte nabi,
raulina ivei,
“Kamaimo kita hau nte nabi.”)
12-13 Nesana randaa gahaitu,
“Io naria.
Dako-dako ia nolipa ri kolumiu.
Ane masalisa komiu,
bara da rakavamiu.
Ia dako nakava ri ngata sabana eo hitu naria posusa ka todea ri bavo bulu pesomba.
Tona nigaga dopa mangande ane dopa makava ia,
sabana raposambayakana ntani ruru pesomba haitu.
Ane hau komiu hitu-hitu da rakavamiu ia dopame mantende ri bulu hau mangande.”
14 I Saul nte batuana nolipa hau ri ngata,
bo tempo ira nesua rangata,
nosintomumo ira nte i Samuel hau ri bulu pesomba.
15 Saeo dopame nakava i Saul,
TUPU nanguli ka i Samuel ivei,
16 “Maile ratasere tempo ivehitu muni,
kutudu saito tona dako ri valaa ntoBenyamin mosintomu nte iko.
Tolimo lana navangi soana ri balengga ntona haitu,
tandana ia nianggatakamo majadi magau ka todeaKu toIsrael bo ia mompakasalama todeaKu dako nte toFilistin.
NipeintaKumo kasusara bo niepeKumo tangira nekitulungi.”
17 Nipeintapa i Samuel i Saul,
nangulimo TUPU ka ia,
“Hitumo tona niuliKu ka iko.
Ia momparenta todeaKu.”
18 Tempo haitu i Saul nombakaparai i Samuel ri vamba bobaa,
bo nekutana,
“Tabe,
pua.
Ri umba banua nu nabi?”
19 Nesana i Samuel,
“Yakumo nabi.
Koimo pokolu ri bulu pesomba,
sabana eo hitu komiu mangande singgani nte yaku.
Maile mpadondo anu najadi vua mpekirimu kuuli ka iko pura.
Maupu haitu mamalamo komiu manjili.
20 Keledaimu anu talu eomo nalipo,
tumo mupokini,
nikavamo.
Bo anu noalipa ri njumangu Israel radekei ka iko bo sampesuvu ntuamamu.”
21 Nesana i Saul,
“Yaku dako ri valaa ntoBenyamin,
valaa anu nakodi ri Israel,
bo sampesuvuku dako ri valaa haitu ledo ntoto naria batuana.
Jadi nakuya niulimiu ivetutu ka yaku?”
22 Pade nipakeni i Samuel i Saul nte batuana nesua ri tombi mbaso,
bo nipoponturona i Saul ri ngayona ntoto ri ngayo ntona nigaga,
nitasere talu pulu kadeana.
23 Pade nangulimo i Samuel ka toporiapu,
“Kenimo bau nidekeiku ka iko pangane.”
24 Bo niala ntoporiapumo bau isi nu paana,
bo nidikana ri ngayo i Saul.
Nangulimo i Samuel,
“Hitu anu nipasadiaku ka iko tempo yaku nombagaga torata-torata ntanina.”
Bo nangandemo i Saul.
Jadi i Saul bo i Samuel nangande singgani eo haitu.
25 Naupu haitu notuamo ira dako ri bulu pesomba hau rangata.
I Saul nipasadiaka paturu ri tombi bavona ntoto ri banua haitu.
26 Mpadondo mpisina,
i Samuel nombaronde i Saul anu da naria ri tombi haitu,
bo niulina,
“Pembangumo,
kukeni iko hau.”
Nembangupa i Saul,
haumo ira.
27 Nakavapa ira ri pantaa nu ngata haitu,
nangulimo i Samuel ka Saul,
“Tudu mokolumo batuamu tutu.”
Haupa batua haitu,
nanguli vai i Samuel,
“Metaa ri sii ruru sampalai,
yaku manguli petevai nu Alatala ka iko.”