I Saul nianggataka najadi magau
10
Pade niala i Samuelmo boyo noisi lana zaitun,
bo lana haitu nitoli ri balengga i Saula.
Niekinamo i Saul bo niulina,
“Nianggataka nTUPUmo iko majadi magau ka todeaNa toIsrael.
Iko momparenta todeaNa bo mombasaliku ira dako nte bali-balira.
Hitumo tandana iko nipelisi nTUPU:
2 mogaapa kita eo hitu,
iko mosinggavaka randua langgai mapara ri dayo i Rahel ri ngata Zelzah ri tana valaa i Benyamin.
Bo raulikara iko:
‘Nikavamo keledai nielomu.
Hitupa domo nakini rara ntuamamu nompekirika binata gahaitu,
tapi nipekutanana njuu nuapa rapoviana ala mosinggava ka iko’.
3 Dako rahaitu iko molipa njuu sampe ri puna kayu mbaso ri Tabor.
Hamai iko mosinggavaka tatalu langgai anu da hau ri ngata Betel manggeni pesomba ka Alatala.
Saito manggeni tovau talu-angu,
saito manggeni roti talu-angu,
bo saitopa manggeni uve anggur sangu kanto kuli.
4 Ratabera iko bo radekeikara roangu roti ka iko bo kana muala roti haitu.
5 Maupupa haitu iko pade hau ri bulu nu Alatala ri ngata Gibea,
ri potenda ntoFilistin.
Ri vamba bobaa pesuana rangata muposintomuka nabi-nabi anu notua dako ri bulu pesomba.
Ira mongare-ngare bo molodi-lodi nikuasai Nosa Gasa nTUPU.
Ira muni nomore gambusu,
rabana,
suli bo kacapi.
6 Tempo haitu muni iko rakuasai Nosa Gasa nTUPU bo iko muni mongare-ngare bo molodi-lodi mpo ira haitu.
Inggumu mabali bo iko majadi mpo tona ntanina.
7 Ane haitu mpuu-mpuu majadi nte iko,
poviamo anu mupekiri mabelo,
sabana Alatala momporoa iko.
8 Maupu haitu iko kana hau ri ngata Gilgal bo mepopea hamai pitu-eo.
Damo makava ngena yaku manggeni pesomba rapalabu bo pesomba posinggabelo,
bo manguli anu mupovia.”
9 Nogaapa i Saul bo i Samuel,
nibali nu Alatalamo inggu i Saul.
Bo pura-pura anu niuli i Samuel ka ia najadi mpuu ri eo haitu.
10 Nakavapa i Saul nte batuana ri ngata Gibea,
niposinggavakaramo nabi-nabi.
Tempo haitu muni i Saul nikuasai Nosa Gasa nu Alatala,
ia nongare-ngare bo nolodi-lodi mpo nabi-nabi haitu muni.
11 Tona anu nangisani ia dako ri nggauluname,
nanggita pokaingguna haitu,
bo nosimpekutanamo ira,
“Nuapamo najadi nte i Saul ana i Kish haitu?
Najadi nabi munimo ia?”
12 Pade saito tona anu nonturo ri sia nekutana,
“Berimba nabi-nabi ntanina haitu,
pangisanimiu isema tuamara?”
Haitumo pamulana tesa niuli ntotua anu nanguli,
“Najadi nabi muni i Saul?”
13 Naupupa i Saul nongare-ngare bo nolodi-lodi,
haumo ia ri bulu pesomba.
14 I Saul nte batuana nipeinta manggena,
bo nekutanamo manggena,
“Dako ri umba komiu?”
Nesana i Saul,
“Nangelo keledai nalipo,
apa ledo nikava kami,
hau nosinggavaka i Samuelmo kami.”
15 Nekutana manggena,
“Nuapa niulina ka iko?”
16 Nesana i Saul,
“Niulina binata gahaitu nikavamo.”
Tapi ledo niuli i Saul ka manggena ia nianggataka i Samuel najadi magau.
I Saul nipelisi majadi magau ri ngayo ntodea
17 Naupu sia niulika i Samuelmo toIsrael masiromu ri ngayo nTUPU ri ngata Mizpa,
18 bo niulikanamo ira ivei,
“Hitumo anu niuli nTUPU,
Alatala nisombata ntoIsrael,
‘Yaku nanggeni komiu nesuvu dako ri tana Mesir baipia bo nikabasakaKu komiu dako nte toMesir bo tona dako ri ngata-ngata ntanina anu nompandasa komiu.
19 NikabasakaKu komiu dako ri peparajea bo kasusa,
tapi hitupa nipoarasimiu Yaku,
Alatala nisombamiu,
sabana niperapimiu ala Yaku manganggataka saito magau ka komiu.
Ane ivesia tano,
kasiromumo ri ngayo-Ku,
mantuntuni valaa bo posampesuvumiu.’ ”
20 Pade nitudu i Samuel puramo valaa ntoIsrael hau ri koluna bo valaa ntoBenyamin nipelisi.
21 Tempo valaa ntoBenyamin nitudu sambanua-sambanua hau ri koluna,
bo aga i Matri sambanua nipelisi.
Kaupuna i Matri sambanua nitudu saito-saito hau ri koluna bo i Saul ana i Kish natepelisi.
Nieloramo i Saul,
tapi ledo nikavara.
22 Sabana haitu,
todea nekutana nte TUPU,
“PUE,
nariamo tona tutu ri sii?”
Nesanamo TUPU,
“I Saul netabuni ri sabingga mbara-mbara.”
23 Nangovamo tona hau nangala i Saul,
bo nikenira ri tatanga ntodea.
Pade neanggamo i Saul ri tatangara bo ia nalanga;
tona ntanina aga sampe ri vingana.
24 Nangulimo i Samuel ka todea,
“Hitumo tona anu nipelisi nTUPU,
ledoria kasimbayuna nte kita pura-pura todea Israel.”
Njumangata haitu nadamba bo nanguli,
“Kambou mandoe umuru magau!”
25 Pade niuli i Samuel ka toIsrael nuapa pura rapovia nu magau bo anu rapovia ntoIsrael,
bo nitulisina ri buku pade niboliakana sanggani nte Peti Pojanji nTUPU.
Naupu haitu nitudu i Samuel puramo ira manjili hau ri banuara mboto.
26 I Saul nanjili hau ri banuana ri ngata Gibea muni,
nosanggani nte bara sakondua langgai anu nabia bo naroso nitudu nTUPU.
27 Tapi naria bara sakondua tona nadaa nanguli,
“Berimba bo tona hitu mamala mompakasalama kita dako ri balita?”
Nisalaira i Saul bo ledo nidekeikara pedekei.
Tapi i Saul ledo nokanano.