I Saul nompakasalama ngata Yabesh
11
I Nahas magau ntoAmon,
nomparenta tantarana mompatiku ngata Yabesh ri bagia Gilead.
Bo nangulimo toYabesh ka i Nahas,
“Pojanjimo nte kami,
bo kami matundu nte iko.”
2 Nesana i Nahas,
“Ivei pojanji kupovia:
‘Kusuiki simbo sabingga mata pangganamiu tandana mompakaeya njumangu toIsrael!’ ”
3 Pakeni-pakeni ngata Yabesh nesana,
“Kami merapi tempo pitu-eo ala kami makapo mombatudu suro hau ri njumangu ngata Israel.
Ane ledo maria madota mbatulungi kami,
matundumo kami nte iko.”
4 Nakavapa suro haitu ri ponturo i Saul ri ngata Gibea,
niuliramo kareba haitu.
Nangepe kareba haitu nerunjemo todea.
5 Tempo haitu i Saul dako nakava ntoto noevu japina ri karava,
nekutanamo ia,
“Nakuya tona gahaitu notumangi?”
Bo niuliramo kareba anu niuli nu suro haitu.
6 Nangepe kareba haitu,
i Saul nikuasai Nosa Gasa nu Alatalamo.
Jadi narau mpuu rarana.
7 Nisambalena japi sapasa bo nitampa-tampana.
Bau nitampa-tampana haitu nipakatuna ri njumangu ngata Israel ante parenta ivei,
“Isema ledo mantuntuni i Saul bo i Samuel mosieva,
japina rasambale bo ratampa-tampa ivehitu muni!”
TUPU nompakaeka rara ntodea Israel sampe ira nasalisa nasiromu hau mosieva.
8 Naupu todeana nasiromu ri ngata Bezek,
nireke i Saulmo kadeara.
ToIsrael taluatu njobu bo toYehuda talu pulu njobu kadeana.
9 Pade niulikana suro dako ri ngata Yabesh haitu ivei:
“Ulikamo toYabesh,
maile mpadondo dopame matongo eo,
ira manggava petulungi.”
Niepepa ntoYabesh petevai haitu,
nadambamo ira.
10 Bo niulikara i Nahas,
“Maile matundumo kami nte komiu,
bara rapoviamiu berimba kami damo aga komiu.”
11 Kamaile mpadondona,
nibagi i Saulmo tatalu ntagu todeana.
Da sanggaeo mpisina,
nisuakiramo potenda ntoAmon bo nosievamo ira.
Dopa natongo eo,
padagimo tantara i Saul.
ToAmon anu namala nalai,
nagaro bo nangova saito-saito.
12 Pade nipekutana ntoIsrael i Saul,
“Riumba pura tona pangane anu nabia nanguli i Saul ledo masipato majadi magauta?
Dekei ka kamimo ia rapatesi kami.”
13 Tapi nanguli i Saul,
“Ledoria saitoa mamala rapatesi eo hitu,
sabana eo hitu TUPU nompakasalama Israel.”
14 Nangulimo i Samuel ka ira,
“Kamaimo kita hau ri ngata Gilgal pura mompakaasa i Saul majadi magauta.”
15 Hau puramo ira ri petupu ri Gilgal,
mompakaasa i Saul najadi magau.
Ira nombadekei pesomba posinggabelo,
bo i Saul nte pura-pura toIsrael nadamba-damba.