Popalakana i Samuel nte toIsrael
12
Nangulimo i Samuel ka toIsrael,
“Pura-pura anu niperapimiu niturusiku puramo bo magau nianggatakakumo ka komiu.
2 Hitupa iamo momparenta komiu.
Peintamo,
yaku natuamo bo nauvamo,
ana-anaku naria ri tatangamiu.
Nasae mpuumo yaku nomparenta komiu,
dako ri kamudakume sampe eo hitu.
3 Hitupa,
yaku neangga ri ngayomiu!
Ane yaku masala,
posabimo ka yaku ri ngayo nTUPU bo ri ngayo magau anu nipelisiNa.
Naria nialaku japi atau keledai ntona?
Naria yaku nombabagiu tona bara nompandasa tona?
Naria doi mate nitarimaku rapotutui anu nanoa?
Ulimo,
ala bara nuapa pura nialaku kupopanjili.”
4 Tona gahaitu nesana,
“Ledo,
Tata.
Ledo naria komiu nombabagiu bara nompandasa kami;
ledo ntoto naria komiu nangala anu ntona.”
5 Nangulimo i Samuel,
“Yaku mpuu-mpuu ledo nasala sakidea,
TUPU bo magau anu nipelisiNa majadi sabita eo hitu.”
Nesana ira,
“Iyo nakana,
TUPU najadi sabita.”
6 Nanguli vai i Samuel,
“He toIsrael,
TUPU nompelisi i Musa bo i Harun nanggeni totuata nesuvu dako ri Mesir baipia.
7 Jadi,
peangga ri siimo ruru,
kita mosipanoasi ri ngayo nTUPU.
Kupopatora ka komiu pura-pura belo nTUPU anu nipoviaNa ka kita bo ka totuata nggaulu.
8 Tempo i Yakub sambanua nakava ri Mesir,
ira nipandasa ntoMesir.
Jadi totuata nggaulu nerapi tulungi nte TUPU.
Jadi TUPU nombatudu i Musa bo i Harun nanggeni totuata nggaulu nesuvu dako ri tana Mesir bo nitulungiNa ira naroo ri sii ri ngatata hitu.
9 Tapi nikalingasiramo TUPU Alatala nisombara.
Sabana haitu nipalamba nTUPUmo ira nieva bo nidagi i Sisera tadulako tantara ntoHazor.
ToFilistin bo magau Moab nombadagi ira muni.
10 Pade nosambayamo ira nerapi nte TUPU bo nangaku dosara.
Niulira ivei,
“Nadosamo kami sabana nipalaika kamimo TUPU,
bo nombasomba tau-tau-tau-tau viata Baal bo Asytoret.
Tapi hitupa,
pakasalamamo kami!
Aga Komiu rasomba kami!”
11 Naliu haitu TUPU nombatudu i Gideon,
naupu sia i Barak,
naupu haitu i Yefta,
bo kaupuna yaku.
Kami nipopale nTUPU nombakabasaka komiu dako nte balimiu,
ala komiu matuvu matinonto.
12 Tapi tempo komiu nisuu i Nahas magau ntoAmon,
komiu nompoara TUPU majadi magaumiu bo komiu nanguli ka yaku,
“Naoge rara kami raparenta saito magau.”
13 “Hitupa peinta!
Hitumo ia,
magau anu nipelisimiu.
Niperapimiu bo nidekei nTUPUmo ka komiu.
14 Masana mpuu komiu ane rabilamiu TUPU,
bo mombasomba Ia,
mangepe bo mangoseaka parentaNa,
nemopa ane komiu nte magaumiu matutu nte TUPU Alatala nisombata.
15 Tapi,
ane ledo raepemiu TUPU,
bo aga mombaeva parentaNa,
natantumo komiu nte magaumiu raeva nTUPU.
16 Hitupa peintamo ngena kabaraka mbaso anu rapovia nTUPU ri ngayomiu.
17 Ane kuperapi nte TUPU,
naupa tempo mosombe gando bo napane eo,
TUPU kana mompakaguru kede bo mompakauda,
tandana posambayaku nitarima.
Ri tempo haitu ngena,
pade manoto raramiu nambaso mpuu dosamiu nte TUPU sabana nerapi magau.”
18 Pade nosambayamo i Samuel,
bo eo haitu muni nipopanau nTUPU guru kede bo uda.
Pura-pura tona ri ngata haitu naeka ka TUPU bo i Samuel.
19 Nangulimo ira ka i Samuel,
“Tulungimo,
Tata.
Posambayakamo kami ka TUPU Alatala nisombamu,
ala ledo mamate kami.
Ruru kami nadosamo,
bo hitupa nadosa vaimo kami nerapi magau.”
20 Nesana i Samuel,
“Nemo maeka,
naupa komiu nadosamo,
nee rapalaika TUPU,
tapi sombamo Ia ante mpuu-mpuu raramiu.
21 Nemo mantuntuni bo momparasaya viata-viata anu ledo mamala metulungi bo ledo mamala mompakasalama komiu,
apa ira ledoria gunana.
22 TUPU nojanjimo ledo rapalaisiNa komiu sabana nibotusiNamo komiu rapajadiNa todeaNa mboto.
23 Ane karoku mboto,
perapi doa nemo sampe yaku madosa nte TUPU sabana ledo nosambaya ka komiu.
Tapi kupatuduki ka komiu njuu anu mabelo bo manoa.
24 Bilamo TUPU bo sombamo Ia ante mpuu-mpuu raramiu.
Toramo,
nambaso mpuu panggaviaNa ka komiu.
25 Tapi ane komiu movia dosa,
komiu nte magaumiu kana rapakaropu.”