Posieva nte toFilistin
13
Naria saeo,
tempo i Saul najadi magaumo,
2 nipelisina talu njobu toIsrael.
Ronjobu nonturo nte ia ri ngata Mikhmas bo ri bagia tana buluna ri Betel,
bo sanjobupa hau nte anana i Yonatan ri ngata Gibea ri bagia valaa ntoBenyamin.
Bo labina dako rahaitu nidekei hau nanjili ri banuara mbotomo.
3 Naliu haitu i Yonatan nombasuu bo nombadagi tantara ntoFilistin ri ngata Geba,
bo toFilistin nangepe kajadia haitu.
Naupu sia i Saul nantudu mombatavusi tabue ri njumangu ngata mombaronde toIsraela mosieva.
4 Pura-pura toIsrael nangepe kareba i Saul nombadagi tantara ntoFilistin,
jadi narau mpuu rara ntoFilistin nte toIsrael.
Sabana haitu todea Israel nangoseaka parenta masiromu nte i Saul ri ngata Gilgal.
5 Tempo haitu toFilistin nasiromu munimo hau mombaeva toIsrael.
Kareta mposievara talu pulu njobu,
topojara aono njobu kadeana,
bo tantara-tantara anu nolipa eva bone ri bivi ntasi kadeana.
Ira notenda ri ngata Mikhmas ri sabingga mpandake Bet-Awen.
6 Peeva ntoFilistin najadi mpuu,
nompakandasa toIsrael sampe ira netabuni ri bolo vatu,
ri bolo nu bulu,
ri olo nu vatu,
rabuvu bo ri bolo ntana.
7 Naria muni nevote Binangga Yordan nesua ri tana Gad bo Gilead.
I Saul da ri ngata Gilgal,
bo todea anu nantuntuni ia naeka bo nolete.
8 Pitu eomo i Saul nepopea nangoseaka petevai i Samuel ka ia,
tapi i Samuel dopa muni nakava ri Gilgal,
bo todea i Saul nompamulamo nalai.
9 Sabana haitu niulikanamo ira,
“Kenimo tumai pesomba rapalabu bo pesomba posinggabelo tutu.”
Pade i Saul mboto nombadekei pesomba nipalabu.
10 Tapi dako naupu ia nombadekei pesomba nipalabu,
nakavamo i Samuel.
I Saul nombatomunaka bo nombatabe i Samuel,
11 tapi i Samuel nekutana,
“Pua,
nuapa nipoviamiu?”
Nesana i Saul,
“Tata,
nipeintaku todea nompamulamo nompalaika yaku,
apa komiu ledo nakava ri eo nipakatantumiu.
Bo muni,
toFilistin nasiromumo ri ngata Mikhmas.
12 Nipekiriku,
nee-nee tantara ntoFilistin domo masae mombasuu yaku ri Gilgal,
bo yaku dopa nerapi tulungi nte TUPU.
Sabana haitu nibotusikumo mombadekei pesomba nipalabu haitu.”
13 Nangepe haitu nangulimo i Samuel ka i Saul,
“Nambongo mpuu iko.
Ane nioseakamu anu niparenta nTUPU Alatala ka iko,
natantumo iko nte mulimu kana rapajadiNa magau ri Israel sampe ri kasae-saena.
14 Tapi hitupa pomparentamu ri kamagaua Israel domo masae sabana ledo nioseakamu parenta nTUPU.
Nipelisi nTUPUmo saito tona ntanina anu nipokonoNa raanggataka majadi magau ka todeaNa.”
15 Dako ri ngata Gilgal i Samuel nalai hau ri ngata Gibea ri bagia ngata Benyamin.
Tempo haitu i Saul da nomparesa todeana,
nitasere ono-atu deana.
16 I Saul ante anana i Yonatan,
bo todeara notenda ri ngata Geba ri bagia Benyamin;
bo toFilistin notenda ri ngata Mikhmas.
17 Tempo haitu muni topeago dako ri potenda ntoFilistin hau meago.
Ira nibagi tatalu,
sabagia hau ri ngata Ofra ri bagia Syual,
18 sabagia hau ri ngata Bet-Horon,
bo sabagia hau ri pobingga lobuna Zeboim bo karava bai.
19 Ri njumangu Israel,
ledoria topompempe,
apa toIsraelb ledo nidekei ntoFilistin movia guma bo tavala.
20 Jadi toIsrael kana hau nte toFilistin ane mompakatada mata mpajeko,
pomanggi,
baliu bo are.
21 Ane mompakatada baliu bo mompakabelo tandu-tandu sampeka doi salaka tambona,
bo ane mompakatada mata mpajeko bo pomanggi rompeka doi salaka tambona.
22 Haitumo sabana,
eo mposieva ri ngata Mikhmas,
aga i Saul bo anana i Yonatan naria tavala bo guma.
Ledoria saitoa toIsrael ntanina noguma bo notavala.
23 Ri gontu nu bulu ri Mikhmas nijaga ntoFilistin.