I Yonatan tona nabia
14
Naria saeo i Yonatan nanguli ka kabilasa anu nanggeni pareva mposievana,
“Anumo,
kita hau ri pojaga ntoFilistin ri sambote hamai!”
Tapi ia ledo nopalakana nte tomana.
2 Tempo haitu i Saul notenda ri puna kayu delima ri ngata Migron,
ledo nakavao lako ri ngata Gibea.
Tantara nantuntuni ia nitasere ono-atu kadeana.
3 Pakeni ntopanggeni pesomba anu nompake baju Efod a iamo i Ahiya ana i Ahitub.
I Ahitub nosampesuvu koyo puse nte i Ikabod.
Ira randua haitu ana i Pinehas,
bo i Pinehas ana i Eli,
pakeni ntopanggeni pesomba ri Silo.
Ledo muni nisani ntodea i Yonatan domo naria ri sia.
4 I Yonatan kana mendake ri pipi bulu dapala ri olo vatu langa nosanga Bozes bo Sene ala rakavana pojaga ntoFilistin haitu.
5 Bulu dapala ri sabingga tasina nantingayo ngata Mikhmas,
bo dapala ri sabingga puluna nantingayo ngata Geba.
6 Nangulimo i Yonatan ka kabilasa anu nanggeni pareva mposievana,
“Anumo,
kita hau ri pojaga ntoFilistin tona anu ledo nomparasaya Tupu.
Bara madota TUPU ngena mombatulungi kita.
Sabana aga TUPU mamala mombatulungi kita bara madea bara ledo.”
7 Nesana kabilasa haitu,
“Pua,
nau bara nuapa rapoviamiu,
kupodota pura.”
8 Nanguli i Yonatan,
“Ane vesia,
hau kita.
Tempo mevote manggaparai toFilistin,
rapopakitata karota ka ira.
9 Ane ratudura kita metaa,
domo mevote kita,
rapopeata ri sii ira.
10 Tapi ane ratudura kita mapola nte ira,
kana hau kita,
sabana haitumo tandana ira nidekei nTUPUmo ka kita.”
11 Tempo ira randua nompopakita karora ka topojaga ntoFilistin,
nangulimo toFilistin haitu,
“Peintamo,
naria toIsraelb nesuvu dako ri bolo-bolo anu nipetabunira!”
12 Bo nangulimo toFilistin ka i Yonatan bo ka topanggeni pareva mposievana,
“Pendake tumaimo!
Maria anu rapopakita kami ka komiu!”
Nangulimo i Yonatan ka topanggeni pareva mposievana,
“Tuntunimo yaku,
sabana nidekei nTUPU ka toIsraelmo ira.”
13 I Yonatan nobengga hau ri bavona nituntuni ntopanggeni pareva mposievana.
Neumbapa i Yonatan,
nibobana puramo toFilistin sampe nadungga,
bo topanggeni pareva mposievana nombapatesi ira dako ri puri.
14 Peevara pamulana haitu,
nitasere ropulu tona nipatesira ri tana kaluona sangu hektar nibagi ampa.
15 Kajadia haitu nompakapari rara ntoFilistin ri potenda bo ri karava.
Pura-pura toFilistin,
topojaga ri sou mpojaga bo lunu-lunu ntopeago naeka puramo.
Tana nogoya,
bo Alatala nompakagado bo nompakaeka rara ntoFilistin.
16 Naingu mpuu rara ntantara ntoFilistin bo aga nangova hau tumai.
Tantara i Saul ri ngata Gibea ri bagia Benyamin nanggita ira bo
17 i Saul nanguli ka pakeni ntatarana,
“Reke puramo tantara bo paresa isema ledoria.”
Niparesanapa tantara,
bo nisaninamo i Yonatan nte kabilasa topanggeni pareva mposievana ledoria.
18 Nangulimo i Saul ka i Ahia pakeni ntopanggeni pesomba,
“Keni tumaimo baju efodc tutu.”
Tempo haitu aga i Ahia saitona nompake baju efod ri Israel.
19 Tempo i Saul da notesa nte pakeni ntopanggeni pesomba haitu,
nantambaimo kagado ntoFilistin ri potendara,
sampe nangulimo i Saul ka pakeni ntopanggeni pesomba haitu,
“Domo makapo kita merapi dala nte TUPU!”
20 Jadi kapola-polamo i Saul nte tantarana hau ri posieva.
Rahaitu nipeintara toFilistin nagadomo,
nosieva bo nosipatesi mbotomo ira.
21 ToIsraeld anu nasae nonturo nte toFilistin bo nantuntuni tantara ntoFilistin negoli nosangganika tantara i Saul bo i Yonatan.
22 ToIsrael anu netabuni ri bulu Efraim,
nangepe toFilistin nangovamo.
Jadi nievara singganimo toFilistin.
23 Ira nosieva ntapumpu dala sampe naliu ngata Bet-Awen.
Eo haitu toIsrael nipakasalama nTUPU.
I Yonatan ledo najadi nihuku
24 Eo haitu i Saul nosumpa ivei,
“Masilaka mpuu tona anu mangande eo hitu ane dopa kubalasi baliku.”
Jadi nalente buku ntoIsrael apa ledoria saitoa nangande.
25 Nakavapa ira ri rakayu,
nadea mpuu manisa nikavara,
26 tapi ledoria saitoa nangande manisa haitu,
apa naeka mambela anu niposumpaka i Saul.
27 Tapi ledo nisani i Yonatan tuamana nosumpa ka todea vehaitu.
Sabana haitu nitosuna ntoko manisa bo nikandena.
Bo kaliu-liu naranggaamo bukuna bo nantambaimo karosona.
28 Bo saito tantara nanguli ka ia,
“Nandasa puramo kami apa naletomo.
Tapi tuamamu nombatudu kami nosumpa,
bo niulina,
“Masilaka mpuu tona mangande eo hitu.”
29 Nesana i Yonatan,
“Natalanjoro mpuu i tata nompovia todea!
Peinta,
nikandekupa sakide manisa naranggaamo bukuku.
30 Coba ane nidekei todea mangande pangande niago dako nte toFilistin nidagita pangane,
natantumo mantambaipa kadeana toFilistin rapatesita!”
31 Eo haitu toIsrael nombadagi toFilistin bo ira nosieva ntapumpu dala dako ri ngata Mikhmas sampe ri ngata Ayalon.
Tapi naliu haitu nalenge mpuu niepera,
32 sampe ira nosimpagoka mbara-mbara anu niagora dako nte balira.
Nialara bimba bo japi bo nisambalera rahaitu muni,
bo da naraa-raa bau koyo haitu nikanderamo.
33 Pade niulikara i Saul ivei,
“Pua,
nadosamo todea nte TUPU sabana nangande bau koyo ante raana.”e
Nangulimo i Saul,
“Nesapuaka mpuu komiu!
Duliakamo sangu vatu mbaso tumai.”
34 Bo niulikana vai ka topanggeni kareba haitu,
“Koimo komiu hau manguli ka todea bo tudumo ira manggeni japi bo bimbara tumai,
ala rasambale ri bavo vatu hitu bo rakande ri sii.
Tapi tumo rakande bau koyo ante raana,
sabana haitu nompakadosa kita nte TUPU.”
Bongi haitu muni pura-pura todea nanggeni binata anu niagora bo nisambalera rahaitu.
35 Bo i Saul novia lanta pesomba ka TUPU,
haitumo lanta pesomba anu nipoviana pamulana.
36 Naupu sia nanguli vai i Saul ka tantarana,
“Kamaimo kita mombasuu toFilistin bongi hitu bo raagosita mbara-mbarara sampe mpadondona bo rapatesita pura ira.”
Nesana tantarana,
“Ane ivesia,
Pua,
poviamo anu nipekirimiu mabelo.”
Tapi pakeni ntopanggeni pesomba nanguli,
“Kamai,
raperapita ntani ruru dala dako nte Alatala.”
37 Pade nekutanamo i Saul nte Alatala,
“Mamala yaku mombaeva toFilistin?
RadekeiMiu ka toIsraelmo ira?”
Tapi eo haitu ledo nipesanaka Alatala i Saul.
38 Jadi i Saul nanguli ka pakeni-pakeni ntodea,
“Kamai puramo bo paresa bara dosa nuapa nipovia ntona eo hitu.
39 TUPU Natuvu sampe ri kasae-saena bo Ia nompakasalama toIsrael.
Yaku nojanji ante sangaNa,
isema novia dosa eo hitu kana rahuku mate,
naupa i Yonatan anaku.”
Tapi ledoria saitoa nabia nesana.
40 Pade nangulimo i Saul ka toIsrael,
“Peanngga ri sabingga hamai pura komiu,
yaku bo i Yonatan meangga ri sabingga sii.”
Nesana ira,
“Poviamo anu nipekirimiu mabelo.”
41 Naliu haitu nosambayamo i Saul,
“PUE Alatala nisomba ntoIsrael,
nakuya ledo nipesanakaMiu yaku eo hitu?
PUE,
pesanakamo yaku.
Ane yaku bara i Yonatan masala,
pesanamo ante vatu Urim,
tapi ane todeaMiu toIsrael masala,
pesanamo ante vatu Tumim.”f
TUPU nesana bo nombatuduaka i Saul bo i Yonatan;
bo nisanimo ledo todea nasala.
42 Nanguli vai i Saul,
“O PUE,
pakatantumo isema nasala yaku bara i Yonatan.”
Bo nisanimo i Yonatan nasala.
43 Pade nangulimo i Saul ka Yonatan,
“Nuapa nipoviamu?”
Nesana i Yonatan,
“Nikandekumo sakide manisa anu nitosuku ante vuntu ntokoku.
Nasadiamo yaku mamate.”
44 Nangulimo i Saul ka ia,
“Yonatan,
yaku rahuku nu Alatala ane iko ledo rahuku mate.”
45 Tapi todea nanguli ka i Saul,
“Berimba bo rahuku mate i Yonatan?
Iamo kade nanggeni padagi mbaso hitu.
Kami mojanji ante sanga nTUPU anu Natuvu sampe ri kasae-saena,
nau santau bulua i Yonatan ledo malipo dako ri balenggana.
Sabana aga TUPU nombatulungi ia sampe padagi eo hitu.”
Ivesiamo todea nompakasalama i Yonatan bo domo rahuku mate.
46 Naupu nombaraga toFilistin nanjilimo i Saul,
bo toFilistin nanjili munimo hau ri ngatara mboto.
I Saul njamboko ntaliana bo bali-balina
47 Tempo i Saul najadi magau ri Israel,
ri umbapa bali ntoIsrael niposievakana pura.
Bali-balira iamo toMoab,
toAmon,
toEdom,
magau-magau ngata Zoba,
bo toFilistin.
Ri umbapa niposievana,
ia kana padagi.
48 Ia nabia nosieva bo nidagina toAmalek,
bo nombakabasaka toIsrael dako nte topeago.
49 Ana-ana langgai i Saul iamo i Yonatan,
i Yiswi,
bo i Malkisua.
Anana tuaka mombine nosanga i Merab,
bo karanduana i Mikhal.
50 Berei i Saul nosanga i Ahinoam,
ana i Ahimaas.
Tadulako tantarana nosanga i Abner ana i Ner,
iamo mangge i Saul.
51 I Kish tuama i Saul,
bo i Ner tuama i Abner.
I Kish bo i Ner ana-ana i Abiel.
52 Sanggatuvuna,
i Saul batena nosieva nte toFilistin.
Sabana haitu,
ane nipeintana tona naroso bo nabia,
kaliu-liu nipajadina tantarana.