Posieva nangeva toAmalek
15
Naria saeo i Samuel nangulika i Saul,
“TUPU nombatudu yaku nombaanggataka iko najadi magau ka todeaNa toIsrael.
Sabana haitu,
epemo parenta nTUPU anu nompajadi dunia bo isina.
2 TUPU nanguli rahukuNa toAmalek,
sabana totuara nggaulu nombalava toIsrael tempo nesuvu dako ri tana Mesir.a
3 Jadi,
koi evamo toAmalek bo gerosi pura mbara-mbarara.b
Nemo sampe maria maboli.
Patesi pura langgai,
mombine,
ngana,
bo ngana kodi,
japi,
bimba,
unta bo keledai.”
4 Jadi nipasiromu i Saulmo tantarana bo nirekena ri ngata Telaim;
roatu njobu tantara Israel nolipa nggada bo sapulu njobu tantara dako ri Yehuda.
5 Naupu haitu i Saul nte todeana hau ri ngata ntoAmalek bo nombalava balira ri binangga bai.
6 Niulika i Saul muni ka toKeni anu nonturo napara nte toAmalek,
“Koi palai komiu,
ala ledo kupatesi singgani nte toAmalek,
sabana nggaulu totuamiu noroa nte totua kami toIsrael tempo ira nesuvu dako ri tana Mesir.”
Bo nalai mpuumo toKeni dako rahaitu.
7 Naupu haitu nosievamo i Saul nte toAmalek,
bo ntapumpu dala toAmalek nidagira nompamula dako ri ngata Hawila sampe ri tana Syur ri sabingga mpandake Mesir.
8-9 Todea bo tantara ntoAmalek nipatesi i Saul puramo.
Tapi i Agag magau ntoAmalek nisakara bo ledo nipatesira.
Ivesia muni bimba bo japi nte ana bimba toboyana,
bo pura-pura anu noali.
Aga binata anu ledo noguna bo ledo noali nipatesira.
I Saul domo nipokono nTupu najadi magau
10 Nangulimo TUPU ka i Samuel,
11 “Nanjoso raraKu nanganggataka i Saul najadi magau,
sabana nitubengosinamo Yaku bo domo nioseakana parentaKu.”
Nangepe haitu nabuku rara i Samuel.
Njambongi-mbongi ia nongalu nte TUPU.
12 Kamailena nasadondo i Samuel nembangu hau mosintomuka i Saul.
Tapi niuli ntona ka i Samuel,
i Saul da rou ri ngata Karmel mombadika vatu pepatora ka ia hamai,
pade mapola hau ri ngata Gilgal.
13 Tempo i Samuel nosintomu nte i Saul ri Gilgal,
nangulimo i Saul ka ia,
“Tata,
perapi doa TUPU mombadekei rasi ka komiu!
Nioseakakumo parenta nTUPU.”
14 Tapi nekutana i Samuel,
“Ane vesia,
nakuya niepeku bimba nombee bo japi nongoe?”
15 Nesana i Saul,
“Binata-binata gahaitu niago ntodea dako nte toAmalek.
Bimba bo japi tobelona niala ntodea rapajadira pesomba ka TUPU Alatala anu nisombamiu.
Tapi labina dako rahaitu nipatesi kamimo.”
16 Nangepe haitu,
nangulimo i Samuel,
“Nepa ruru,
kuuli ruru anu niuli nu Alatala ka yaku ibongi.”
Nanguli i Saul,
“Ulimo.”
17 Nanguli i Samuel,
“Naupa nipekirimu mboto iko ledo nopoko,
tapi iko najadimo pakeni valaa-valaa ri Israel.
TUPU nompelisi iko najadi magau ri Israel,
18 bo muni iko nitudu nTUPU mompatesi toAmalek nadaa haitu.
Iko nituduNa mosieva sampe maupu pura ira mupatesi.
19 Nakuya ledo nioseakamu parenta nTUPU?
Nakuya nialakamu mbara-mbara niago?
Nadaa mpuu pokainggumu ri mata nTUPU.”
20 Nesana i Saul,
“Nioseakakumo parenta nTUPU,
bo hau nosieva nangoseaka petuduNa ka yaku.
I Agag magau ntoAmalek nisakaku bo toAmalek nipatesiku puramo.
21 Tapi binata ledo nipatesi ntodeaku pura.
Nipelisira bimba bo japi tobelona anu niagora rapesomba ka TUPU Alatala ri sii ri ngata Gilgal.”
22 Tapi nanguli i Samuel,
“Umbana nipokonopa nTUPU,
matundu nte Ia,
atau mombadekei pesomba rapalabu?
Mabelopa matundu nte TUPU
pade mombadekei pesomba rapalabu.
Mabelopa meose nte TUPU
pade mombadekei bimba toboyana ntoto.
23 Apa nombasapuaka TUPU nasimbayu dosana nte topedoti,
nalanga rara nasimbayu dosana nte nombasomba viata.
Apa komiu ledo nangoseaka parenta nTUPU,
domo nipokonoNa komiu majadi magau.”
24 Nangepe haitu nangakumo i Saul nte i Samuel,
bo niulina,
“Nadosamo yaku.
Yaku nangeva parenta nTUPU bo ledo nangoseaka anu niulimiu.
Apa yaku naeka nte todeaku bo nioseakakumo perapira.
25 Tapi hitupa kuperapi nte komiu,
ampungimo dosaku bo manjili singganimo kita hau nte todea,
ala yaku mamala mombasomba TUPU.”
26 Tapi nesana i Samuel,
“Ledo yaku manjili singgani nte komiu.
Komiu nangeva parenta nTUPU,
bo hitupa domo nipangakuNa komiu majadi magau Israel.”
27 Tempo i Samuel hau malaimo,
nitaja i Saul nabite baju i Samuel.
28 Bo nangulimo i Samuel ka ia,
“Eo hitu TUPU mangalasi mpanjili nturomu najadi magau ri Israel,c
bo radekeiNa ka tona ntanina anu mabelopa pade iko.
29 Alatala nisomba ntoIsrael nalangapa nturoNa pade tupu-tupu ntanina.
Alatala ledo nodava bo ledo muni mabali pompekiriNa,
sabana Ia ledo manusia.”
30 Nesana i Saul,
“Nadosamo yaku.
Tapi tulungimo yaku,
Tata.
Manjili singganimo kita ala mamala yaku mombasomba TUPU.
Bo aga vehaitu komiu mombabila yaku ri ngayo pakeni-pakeni ntodeaku bo nte pura-pura toIsrael.”
31 Jadi nanjili singganimo ira hau ri ngata Gilgal,
bo hamai i Saul nantaputu nombasomba TUPU.
32 Naupu haitu nanguli i Samuel,
“Keni tumai Magau Agag.”
Ante damba rara i Agag nakava nte ia,
sabana nisarumakana domo rapatesi ia.
33 Pade nanguli i Samuel,
“Eva gumamu nompatesi ngana dea sampe tinana nalipo anana,
ivesia muni tinamu kana mombarasai malipo anana.”
Naupu haitu nitampa rogo i Samuelmo i Agag ri ngayo lanta pesomba ri ngata Gilgal.
34 Naliu haitu i Samuel hau ri ngata Rama,
bo i Saul hau nanjili ri banuana ri ngata Gibea.
35 Sampe ri kaupu nggatuvuna,
i Samuel domo ria nosintomu nte i Saul.
Tapi nabuku rara i Samuel sabana TUPU nanjoso rara nanganggataka i Saul najadi magau Israel.