I Daud nianggataka najadi magau
16
TUPU nanguli ka i Samuel,
“Sakuyapa kasaena masusa raramu mompekirika i Saul?
Apa nipoaraKumo ia majadi magau ntoIsrael.
Hitupa alamo lana zaituna bo koimo hau ri ngata Betlehem nte i Isai,
apa saito anana Kupelisi majadi magau.”
2 Nesana i Samuel,
“Nakini raraku hau,
apa ane rasani i Saul,
rapatesina yaku.”
TUPU nanguli,
“Kenimo sangu japi rumandaa bo ulimo ivei:
‘Yaku hau ri Betlehem manggeni pesomba ka TUPU.’
3 Pade gagamo i Isai hau ri posusa pesomba.
Damo Kuuli ka iko nuapa masipato mupovia.
Tona Kutuduaka ka iko kana muanggataka majadi magau.”
4 I Samuel novia nangoseaka panguli nTUPU.
Tempo ia nakava ri ngata Betlehem,
totua-totua ngata nakava nantotoaka ia nte bata rara.
Niulira,
“Apa kakavamiu hii manggeni belo?”
5 Nesana i Samuel,
“Nakana,
yaku nakava nanggeni belo.
Yaku nakava manggeni pesomba ka TUPU.
Jadi,
pakagasamo karomiu bo raramiu,
ala mamala mosanggani-nggani nte yaku mantuntuni posusa pesomba.”
I Isai nte ana-anana muni nituduna mompakagasa karora,
bo nigagana hau ri posusa pesomba.
6 Tempo ira nesua,
i Samuel nompeinta i Eliab ana i Isai,
nipekirina,
“Natantumo ia hii nipelisi nTUPU.”
7 Tapi TUPU nanguli ka i Samuel,
“Nemo rapeinta lenjena bo kalanga karona.
Ledo ia nipelisiKu.
Ledo anu nipeinta manusia nipeintaKu.
Manusia aga nompeinta lenje tapi Yaku nanggita riara ntai.”
8 Naupu sia i Isai nombaronde anana i Abinadab bo nituduna mosinggavaka i Samuel.
I Samuel nanguli,
“Ia muni ledo nipelisi nTUPU.”
9 I Isai nombatudu i Syama hau nte i Samuel,
tapi nanguli i Samuel,
“Tona hitu muni ledo nipelisi nTUPU.”
10 Ivesiamo i Isai nombatudu papitu anana noliu ri ngayo i Samuel.
I Samuel nanguli ka i Isai,
“Pura-pura ledo ria nipelisi nTUPU.”
11 Pade nekutana vai i Samuel,
“Aga hitu pura anamu langgai?”
Nesana i Isai,
“Naria saitopa tuei nggaupu da noevu bimba.”
I Samuel nanguli,
“Rondemo ia.
Dopa mangande kita ane dopa makava ia.”
12 I Isai nombatudu tona noronde anana.
Anana haitu kabilasa nagaya bo naroso karona,
bo nabelo pebula matana.
[Sangana i Daud.]
TUPU nanguli ka i Samuel,
“Hitumo ia.
Anggatakamo ia majadi magau!”
13 I Samuel nangala lana zaitun bo nitolina ri balengga i Daud.
Ivesiamo ia nanganggataka i Daud ri ngayo sampesuvu-sampesuvu koyo pusena.
Nompamula eo haitu i Daud nikuasai Nosa Gasa nTUPUmo.
Naliu haitu,
nanjilimo i Samuel hau ri ngata Rama.
I Daud ri banua kamagaua i Saul
14 Nosa Gasa nTUPU nompalaisi i Saul,
bo hitupa i Saul nipalamba nTUPUmo rapandasa nu kuasa nadaa.
15 Nanguli batua-batua i Saul ka ia,
“Nisani kami kuasa nadaa nipaloga nTUPU mompandasa komiu.
16 Ane rapokonomiu,
tudumo kami mangelo saito tona natau nokacapi.
Ane rapandasa nu kuasa nadaa komiu,
ia mokacapi ala mompakatinonto raramiu bo mabelomo rarasaimiu.”
17 I Saul nantudu batuana,
“Elomo tona natau nokacapi,
bo kenimo ia tumai.”
18 Nangulimo saito batua,
“Nakana mpuu,
nipeintakumo saito ana langgai i Isai,
toBetlehem natau nokacapi.
Ia tona nabia bo naroso,
ia nagaya,
natau notesa,
bo nitulungi nTUPU.”
19 Naupu haitu i Saul nombatudu suro hau nte i Isai manggeni petevai,
ivei,
“Tudumo anamu i Daud,
topojaga bimbamu mosintomuka yaku.”
20 I Isai nompasadia sangu keledai rapake mangulaya roti,
batutu kuli niisi uve anggur bo sangu ana ntovau.
Pura-pura haitu nidekeina ka i Daud mombadekei ka i Saul.
21 Ivesiamo i Daud nakava nte i Saul bo najadi topompasiayu ia.
I Daud mpuu-mpuu nipotove i Saul,
bo nianggatakana najadi topanggeni pareva mposievana.
22 I Saul nombatudu tona hau nte i Isai bo nanguli,
“Nipokonoku i Daud.
Dekeikamo ia monturo maroo ri sii nte yaku.”
23 Ane naria kuasa nadaa anu nipaloga nu Alatala neonga nte i Saul,
nokacapi vaimo i Daud,
jadi natinonto vaimo rara i Saul,
bo kuasa nadaa nalai dako ri karona.