2 Samuel 23

Tesa i Daud kaupuna

I Daud ana Isai nipelisi nu Alatala najadi magau, bo Alatala anu nisomba i Yakub nompakaoge ia. Ia topovia dade mpuu-mpuu nipokono ntoIsrael. Hitumo dade i Daud kaupuna:

2 Yaku niposumba Nosa Gasa nTUPU;

sumbaku notesaki tevai anu niuliNa.

3 Alatala Topanjaliku toIsrael anu nisomba i Yakub,

nanguli ka yaku;

“Magau anu nanoa nomparenta todea

bo natutu neose nte TUPU,

4 magau haitu eva vanta nu eo anu nevanta mpadondo mpisina

tempo langi nagasa.

Ia eva vanta nu eo naupu nauda

nompopengila kavoko naramanta.

5 Ivesiamo muliku rapoporasi nu Alatala

sabana nijanjiNa ka yaku bo janjiNa haitu ledo mabali.

JanjiNa haitu sampe ri kasae-saena bo kana madupa.

Alatala nompakasalama yaku,

bo nombadekei pura-pura anu nipodota raraku.

6 Tapi tona ledo nangoesaka dota nTUPU

eva timpo nitedeaka

anu ledo mamala raganggo.

7 Ledoria saitoa madota mombatuina

ane ledo mompake kayu bara ase.

Tapi aga rapalabusi ri belana sampe maopo.

Ivesiamo tona ledo nangoseaka dota nTUPU.

Tadulako-tadulako i Daud

8 Hitumo sanga-sanga tadulako i Daud. Naria tatalu tadulako i Daud anu natolele sangana: pamulana i Ishbaal toHakhmoni, iamo pakenira tatalu haitu. Naria sanggani riara mposieva, ia nangeva valuatu (800) kadeana tona bo nipatesina pura tona gahaitu ante tokona.

9 Tadulako karandua iamo i Eleazar ana i Dodo toAhohi. Ia nosanggani nte i Daud tempona ira nosintingayo nte toFilistin anu nasiromumo mosieva. Tempo tantara toIsrael noura, 10 i Eleazar bate-batena nangeva nombaropusi toFilistin sampe naleo ntoto nirasaina. Palena nasinggamu bo domo namala nikabasakana guma dako ri palena. Eo haitu TUPU nombatulungi toIsrael nombadagi toFilistin. Bo nambaso mpuu padagi haitu. Tantara ntoIsrael anu noura pangane nanjili vai hau ri posieva i Eleazar, bo nangalasi pareva-pareva mposieva dako ri mboa-mboa rahaitu.

11 Tadulako katataluna, iamo i Sama ana i Age toHarari. Naria sanggani toFilistin nasiromu ri ngata Lehi. ToFilistin nosieva ante toIsrael ri tatanga talua anu nituda tambue lei. Tantara ntoIsrael nangova nalai. 12 Tapi i Sama ledo noura, ia bate-batena nosieva, nepatesi bo nombadagi toFilistin, bo talua anu nituda tambue lei pangane ledo namala niagosi ntoFilistin. Ivesiamo TUPU nombadekei padagi mbaso.

13-14 Naria sanggani naparamo tempo mosoreaka asele mpokarajaa, tatalu dako ri talupulu tadulako i Daud anu nipoimbi hau ri bolo vatu napara ngata Adulam. Tempo haitu i Daud netabuni ri bolo vatu haitu. Tantara ntoFilistin notenda ri lemba Refaim, bo sabagia ira nonturo ri ngata Betlehem. 15 I Daud nalentoramo nantoraka ngatana, bo nangulimo ia, “Ah, aginamo vei maria tona mombadekei ka yaku uve kuinu, uve dako ri buvu napara vamba bobaa ngata Betlehem!” 16 Nangepe haitu, tatalu tadulako i Daud nompebia nesua hau ri potenda ntoFilistin, bo nombatambu uve ri buvu napara vamba bobaa ngata Betlehem haitu, pade nikenikara i Daud. Tapi i Daud ledo nadota nanginuna, aga niduana najadi pesomba ka TUPU. 17 Nanguli ia, “O Pue, ledo masipato kuinu uve hitu! Ane rapana kuinu, nasimbayu eva nanginu raa ntona anu sakidepa nipatesi hau mangala uve hitu ka yaku!” Jadi uve haitu ledo ntoto niinu i Daud.

Ivehaitumo nipovia ntadulako tatalu pangane.

18-19 Pakeni talu-pulu tadulako naroso haitu iamo i Abisai tuei i Yoab, ana Zeruya. Naria sanggani i Abisai nompatesi taluatu (300) tona ante tavala. Sangana natolele riumba-umba sabana kabiana. Ia naogepa pade ira talupulu haitu, nau ledo nireke tadulako tatalu pangane.

20 Saito tadulako ntanina anu naroso, nabia mpuu ia, iamo i Benaya ana i Yoyada toKabzeel. Ia nompatesi randua tadulako mbaso dako ri tana Moab. Naria sanggani ri tempona nasalju, ia nesua riara nu bolo, bo nipatesina sambaa singa ri sia. 21 Bo muni nipatesina saito toMesir, anu nalanga bo naroso. I Benaya nantingayona aga nompake toko, tavala ri pale ntoMesir haitu niagosina bo nipakena nombapatesi tona haitu. 22 Haitumo anu nipovia i Benaya ana i Yoyada, anu nompakambaso sangana. Ia muni saito tadulako dako ira talupulu pangane. 23 Tagu ntadulako talupulu haitu, i Benayamo mai nambaso sangana, tapi ia ledo nasimbayu ante tadulako tatalu pangane. I Daud nanganggataka ia najadi pakeni ntopojagai i Daud mboto. 24-39 Hitumo sanga-sanga tadulako talupulu:

I Asael tuei i Yoab,

i Elhanan ana i Dodo toBetlehem,

I Sama bo i Elika toHarod,

i Heles toPalti,

i Ira ana i Ikes toTekoa,

i Abiezer toAnatot,

i Mebunai toHusa,

i Zalmon toAhohi,

i Maharai toNetofa,

i Heleb ana i Baana toNetofa,

i Itai ana i Ribai toGibea ri ngata ntoBenyamin,

i Benaya toPiraton,

i Hidai tona ri lemba Gaas,

i Abialbon toAraba,

i Azmawet toBahurim,

i Elyahba toSaalbon,

ana-ana i Yasyen,

i Yonatan ana i Sama toHarari,

i Ahiam ana i Sarar toHarari,

i Elifelet ana i Ahasbai toMaakha,

i Eliam ana i Ahitofel toGilo,

i Hezrai toKarmel,

i Paerai toArbi,

i Yigal ana i Natan toZoba,

i Bani toGad,

i Zelek toAmon,

i Naharai toBeerot, topanggeni pareva-pareva posieva i Yoab,

i Ira bo i Gareb toYetri,

i Uria toHet.

Talupulu papitu pura-pura deana tadulako i Daud anu natolele sangara.