Dade posukuru i Daud
22
Nikabasakapa nTUPU i Daud dako nte i Saul bo pura-pura balina, i Daud nodade ka TUPU, ivei:2 O PUE, Komiu Topompakasalama yaku.
Komiumo petalenduku anu naroso.
3 Alatala nisombaku eva bente naroso
nipetalenduku.
Alatala nisombaku mpo bulu vatu
anu nipekanaluuku.
Ia nombalenduti yaku eva kaliavo,
bo nompakasalama yaku dako nte tona nasese.
4 Yaku nekakai nte TUPU anu masipato ratoiya,
Ia nombakabasaka yaku dako nte bali-baliku.
5 Yaku nitiku nu silaka anu mepakamate
bo silaka mepakamate eva lono nanggava yaku.
6 Yaku eva tona nipou nte kaloro bo nitaja hau ri dunia ponturo malaeka ntomate,
tolia anu mepakamate nitaa ri dalaku.
7 Riara kandasaku yaku nekakai nte TUPU,
yaku nongare ka Alatala nisombaku nerapi tulungi.
Dako riara banuaNa niepeNa suaraku
bo niparantaikaNa pekakaiku.
8 Pade tana nogoya bo norii,
bulu-bulu nogoya bo noridi
sabana karau rara nu Alatala.
9 Rau raraNa eva unu nu apu nesuvu dako ri bolo nu ongeNa,
eva apu bo ruti narega nesuvu dako ri sumbaNa.
10 Langi nibekaNa bo nanaumo Ia
kulimu landa ri tambe nggadaNa.
11 Ia nevoro nesavi malaeka Keruba;
Ia nantaya-ntaya ri bavo kapi mpoiri.
12 Ia novuniti karoNa ante landa;
uda bo kulimu nakumba nombatiku Ia.
13 Ruti nanaki,
sabana vanta nu kila ri ngayoNa.
14 TUPU Tonelabi kakuasana nompopaepe suaraNa;
eva guru kede dako ri laerava.
15 NipopoleaNa kila mpenggani-nggani mpo tona nombakabasaka mata panana,
bo baliNa nipoposimpogaa bo nangova nalai.
16 Tempo TUPU nombavunggasi baliNa nte rau raraNa,
uve ntasi nogaa bo nalanto pura tana ritambena.
17 Dako ri suruga Tupu nombaduduaka paleNa;
nikingisiNa yaku bo nitajaNa dako ri uve nandala.
18 Ia nompakasalama yaku dako nte baliku anu naroso
bo dako nte tona nompovuu mata yaku,
sabana ira narosopa pade yaku.
19 Ira nombalava yaku tempo yaku nikava silaka,
tapi TUPU nantulungi yaku.
20 NikabasakaNa yaku dako ri salanggadunggu
bo nipakasalamaNa yaku
sabana niparantaikaNa yaku.
21 TUPU nompoporasi yaku,
sabana ledo nasala yaku.
22 Yaku nangoseaka parenta nTUPU Alatala nisombaku
bo ledo nitubengosiku Ia.
23 Pura-pura hukuNa nipariaraku,
parentaNa ledo niliunakaku.
24 NisaniNa yaku ledo nasala nte Ia
bo nompakakavao karoku dako ri dosa.
25 Sabana haitu TUPU nompoporasi yaku nasindara ante pokaingguku anu nakana
sabana nisaniNa yaku ledo nasala.
26 PUE, Komiu namala raparasaya nombatulungi tona natutu neose nte Komiu
bo Komiu nabelo nte tona nabelo.
27 Komiu nabelo nte tona nagasa rarana,
tapi tona natenggo rarana nipobalikaMiu.
28 Tona naede rarana nipakasalamaMiu,
tapi tona nalanga rarana nipakaeyaMiu.
29 O PUE, Komiu nompakareme dalaku,
tempo ledo nisaniku nuapa kupovia, Komiu nombatuduaka dala ka yaku.
30 Komiu nompakaroso yaku nantingayo baliku;
ante petulungi Alatala nigerosiku bentera.
31 Povia Alatala nagana
janji nTUPU namala raparasaya.
Ia eva kaliavo anu nombalenduti
pura-pura tona nanjarumaka Ia.
32 Sabana aga TUPUmo Alatala;
Aga Alatala mombasaliku kita.
33 Iamo Alatala anu nompakaroso yaku,
bo nombajagai dalaku.
34 Ia nompakaroso kadaku nolipa,
eva rusa neangga ri bulu vatu.
35 Ia nompatuduki yaku mosieva,
sampe nipakuleku mombataja pana naroso.
36 PUE, Komiu nombajagai bo nompakasalama yaku,
bo ante kabeloMiu sampe sangaku najadi nambaso.
37 Komiu nombajagai yaku ala ledo rasaka baliku,
bo ledoria yaku nanavu, tapi namalamo nalai.
38 Yaku nombaraga baliku bo nidagikumo ira,
bo yaku ledo noura sampe naropu ira.
39 Yaku nombaboba ira sampe ledo natepembangu,
ira nadungga bo namate ri ngayoku.
40 Komiu nombadekei karoso ka yaku mosieva,
bo nombadekei padagi ka yaku nangeva baliku.
41 Komiu nompopalai baliku dako nte yaku;
tona nompovuu mata yaku niropusiku.
42 Ira nongare tapi ledoria tona nombatulungi,
Ira nekakai nte TUPU, tapi Ia ledo nesana.
43 Ira niropusiku eva avu nakamburaka,
bo nisaeveku mpo laludu ri dala.
44 Komiu nombakabasaka yaku dako nte todeaku nasilaka,
bo nompajadi yaku mombakuasai todea-todea ntanina;
todea anu ledo niposisaniku, najadi batuaku.
45 Tosangatana natundu nte yaku
bo neose nangepe parentaku.
46 Nouramo biara;
ira nanjomba bo nesuvu dako ri bentera.
47 Nisaniku, TUPU mpuu-mpuu natuvu! Ratoiyamo Ia anu nombasaliku yaku!
Toiyamo kaoge Alatala anu nompakasalama yaku!
48 Ia nombabalasi baliku bo nombadekei padagi ka yaku;
todea-todea ngata nipopekouNa ri ngayoku.
49 NikabasakaNa yaku dako nte bali-baliku.
NitulungiNa yaku nombadagi ira
bo nikabasakaNa yaku dako ante tona nasingi.
50 O PUE, sabana haitu kupakaoge Komiu ri tatanga todea-todea ngata ri dunia,
bo yaku nodade nantoiya Komiu.
51 Alatala nantulungi yaku magau anu nipelisiNa, ala yaku nombadagi baliku.
Ia batena nompotove tona nipelisiNa,
iamo i Daud bo mulina
sampe ri kasae-saena.