Dade posukuru i Daud
18
Dade i Daud,
batua nTUPU.
Nipovia ka pakeni ntopodade.
Nipodadeka ka TUPU tempo i Daud nakabasaka dako nte bali-balina bo dako nte magau Saul.
2 O PUE,
kupotove Komiu,
Komiumo nompakaroso yaku.
3 TUPU nirapaka eva bente naroso
nipetalenduku.
Alatala nisombaku eva bulu vatu petalenduku.
Ia mpo kaliavo nombalenduti yaku,
bo nombajagai yaku ala masalama dako ri baliku.
4 Yaku nekakai nte TUPU anu masipato ratoiya.
NikabasakaNa yaku dako ri bali-baliku.
5 Yaku nitiku kasusa nepakamate
bo nikava nu silaka.
6 Silaka mepakamate nambela yaku.
Tolia-tolia mepakamate nitaa ri ngayoku.
7 Riara nggasusaku yaku nekakai nte TUPU,
yaku nekitulungi nte Alatala nisombaku.
Dako ri BanuaNa,
niepeNa suaraku
bo niparantaikaNamo pekakaiku.
8 Naliu haitu tana nogoya bo norii,
bulu-bulu nogoya bo noridi
sabana karau nu Alatala.
9 Unu nesuvu dako ri ongeNa,
apu bo ruti nesuvu dako ri sumbaNa.
10 Langi nibekaNa bo nanaumo Ia
ante kulimu landa ri tambe nggadaNa.
11 Ia nevoro nesavi malaeka anu niuli Kerub.a
Ia nantaya nikeni mpoiri.
12 Ia novuniti karoNa ante landa;
kulimu kumba nombabungusi Ia.
13 Reme ri ngayoNa nompakalipo kulimu kumba,
nosanggani ante haitu nanaumo uda esi bo ruti apu.
14 Pade TUPU Alatala Toneliu kakuasaNa
nompopaepe suaraNa eva guru kede ri laerava.
15 Ia nombapana bali
bo mata panaNa nompakasimpotare bali;
Ia nompopolea kila mpenggani-nggani,
bo nompakalai ira.
16 Tempo Tupu nompopakita rau raraNa
ante suara namangga bo ante bilisi nu raraNa.
Uve ntasi nogaa bo nikanotomo pantaa ndala ntasi
bo nipeintamo tana-tana ri tambe ntasi.
17 TUPU nombaduduaka paleNa dako ri bavona;
nikingisiNa bo nitajaNa yaku dako ri uve nandala.
18 NipakasalamaNa yaku dako ri bali naroso
bo dako nte tona-tona nompovuu mata yaku,
sabana ira naroso mpuu nombaeva yaku.
19 Ira nangeva yaku tempo yaku nikava nu silaka,
tapi TUPU nantulungi yaku.
20 NikabasakaNa yaku dako ri susa
bo nipakasalamaNa yaku
sabana nipokonoNa yaku.
21 TUPU nabelo mpuu nte yaku sabana poviaku nakana,
yaku nidekeikaNa rasi sabana ledo nasala yaku.
22 Yaku nangoseaka parenta nTUPU
bo ledo nitubengosiku Alatala nisombaku.
23 Pura-pura aturaNa nipariaraku,
parenta-parentaNa ledo niliunakaku.
24 NisaniNa riara nggatuvuku ledo naria anu masipato rasalai
bo yaku nombakavaosi pokainggu nasala.
25 Jadi TUPU nabelo nte yaku nangoseaka pokaingguku nakana
sabana nisaniNa yaku ledo nasala.
26 PUE,
Komiu natutu nte tona natutu nangoseaka Komiu,
nabelo nte tona nokainggu nabelo.
27 Komiu nabelo ante tona natuvu nanoa bo nagasa rarana,
tapi tona natenggo rarana nipobalikaMiu.
28 Tona naede rarana nipakasalamaMiu,
tapi tona nalanga rarana nipakaedeMiu.
29 Komiu nombadekei reme ka yaku;
TUPU Alatala nisombaku nompakareme dalaku nalanda.
30 Komiu nompakaroso yaku mantingayo bali nadea;
ante petulungi nu Alatala nisuakiku bente nu baliku.
31 Povia nu Alatala nagana,
janji nTUPU namala raparasaya.
Ia mpo kaliavo nombalenduti
pura-pura tona nanjarumaka Ia.
32 Sabana aga saito TUPU Alatala,
ledoria ntanina
aga Ia nombasaliku kita.
33 Iamo Alatala anu nompakaroso yaku,
bo nompakanoa dalaku nggatuvuku.
34 Ia nompakasaveti kadaku mpo kada rusa,
bo nojagai yaku neangga ri tinggi nu bingge.
35 NipatudukiNa yaku mosieva,
sampe nisaniku nompatoto pana tambaga.
36 PUE,
Komiu nombajagai bo nompakasalama yaku.
KuasaMiu bate-batena nompakaroso yaku,
yaku batena naroso sabana petulungiMiu.
37 Komiu nombajagai yaku ala ledo matetavani,
bo yaku ledo nadungga.
38 Yaku nombaraga bo nombadagi baliku,
bo yaku ledo noura sampe naropu ira.
39 Yaku nombaboba ira sampe ledo natepembangu,
ira nadungga bo namate ri ngayoku.
40 Komiu nombadekei karoso ka yaku nosieva,
bo nombadagi bali-baliku.
41 Komiu nompakalai baliku dako nte yaku;
bo tona nompovuu mata yaku niropusiku.
42 Ira nongare nekitulungi tapi ledoria tona nombatulungi.
Ira nekakai nte TUPU,
tapi ledo nipesanakaNa.
43 Ira nirupusiku majadi mpo avu,
bo nijeje-jejesiku mpo tampo ri dala.
44 Komiu nombakabasaka yaku dako nte tosilaka,
bo nompajadi yaku nombakuasai ngata-ngata.
Tona ledo niposisaniku,
najadi batuaku.
45 Topesovo natundu nte yaku
bo neose nangepe parentaku.
46 Nalipo puramo biara,
ira nolete bo nesuvu dako rabente.
47 Nisaniku TUPU mpuu-mpuu natuvu!
Toiyamo Ia,
sabana Iamo nombasaliku yaku!
Toiyamo kaoge nu Alatala,
anu nompakasalama yaku!
48 Iamo nombabalasi pokainggu nu baliku.
Todea-todea ngata nipopekouNa pura ri ngayoku,
49 bo nipakasalamaNa yaku dako nte bali-baliku.
PUE,
Komiu nombadekei padagi ka yaku ri mata nu baliku,
Komiu nombalenduti yaku dako nte tona ledoria asi matana.
50 Jadi kupakaoge Komiu ri tatanga ntodea,
bo kupodadeka dade pombatoiya Komiu.
51 Alatala nombadekei kuasa ka magau nipelisiNa nombadagi pura-pura balina.
Ledo naupu-upu toveNa ka tona nianggatakaNa,
haitumo i Daud bo muli-mulina sampe ri kasae-saena.