Posambaya nekisaliku nte Alatala
17
Posambaya i Daud.
O PUE,
epemo pekakaiku merapi kanoa,
pariaramo posambayaku!
Yaku nekakai ante mpuu-mpuu raraku.
2 Salikumo yaku
sabana Komiu nangisani anu nakana.
3 Ane rapeintaMiu rarantaiku,
bo ane Komiu momparesana bongina,
rakavaMiu rarantaiku mpuu-mpuu nagasa bo nanoa,
bo yaku ledo nodava.
4 Yaku nompovia anu nituduMiu ka yaku,
bo ledo nompasiala pokainggu ntona nadaa bo naseseraka.
5 Yaku batena natuvu nangoseaka parentaMiu
bo ledo niliunakaku tesaMiu.
6 O Alatala,
yaku nekakai nte Komiu,
sabana Komiu nompesanaka yaku!
Porarantaikamo yaku
bo epemo tesaku.
7 Popakitamo toveMiu ledoria kaupu-upuna anu nabaraka,
apa Komiu nompakasalama tona nekisaliku nte Komiu.
Ledo mabia balira mangeva ira ane ri sinjoriMiu.
8 Jagaimo yaku mpo tona nombajagai angu matana,
tabuniakamo yaku mpo tonji notabuniaka anana ri tambe nggapina.
9 Jagaimo yaku dako ri pesuu ntona nadaa.
Yaku nipatiku nu bali madota mompatesi yaku.
10 Ledo naasi matara
bo ira notesa ante langa rara.
11 Ira nakava nangeva yaku bo nompatiku yaku,
nangelo loga mompanavu yaku.
12 Ira eva singa nasadia mombasaka binata rakandena;
mpo singa muda anu nelava ri kavunina.
13 O PUE,
kamaimo saliku yaku!
Evasimo baliku bo dagisimo ira.
Pakasalamamo yaku ante gumaMiu,
bo kabasakamo yaku dako ri pesuu ntona nadaa.
14 Kabasakamo yaku ante kuasaMiu
dako nte tona anu aga nompasiromu kakalumana dunia.
Hukumo ira ante silaka nipasadiaMiu ka ira.
Dekeikamo mulira rahuku muni.
15 Tapi yaku mangganoto Komiu,
sabana yaku ledo nasala.
Tempo yaku nembangu naosa raraku,
apa Komiu naria ri sinjoriku.