Posambaya pantoiya TUPU
16
Dade i Daud.
Oh Alatala,
jagaimo yaku,
sabana aga Komiu nipetalenduku.
2 Komiumo Tupu nisombaku.
Pura-pura anu nabelo nte yaku aga nopuna dako nte Komiu.
3 Kubila todea nu Alatala ri ngata hitu;
pompokonoaku monturo singgani nte ira.
4 Tona nombasomba viata
mantambai kasusa rarana.
Ledo yaku mantuntuni ira mombadekei pesomba ka viata-viata,
nemopa manguli sanga nu viatara.
5 O PUE,
Komiu bagia anu noali nipakatantu ka yaku.
Komiu nombadekei pura-pura anu niparaluuku.
Komiumo nompakatantu dala nggatuvuku.
6 Nabelo mpuu pedekeiMiu ka yaku,
mpuu-mpuu nompakadamba raraku!
7 Yaku mombatoiya TUPU anu nompangajari yaku.
Ri bongina pekiri riara ntaiku nompatuduki yaku.
8 Yaku nasaro nantora TUPU Alatala.
Yaku ledo maeka bo batena naroso sabana Ia naria ri sinjoriku nombatulungi yaku.
9 Sabana haitu,
raraku nasana bo nyawaku modade madamba,
bo yaku mangosanaka ri katinontona.
10 Apa ledo nipalambaMiu yaku mamate;
bo Tona NipelisiMiu ledo nipalambaMiu mapopo riara dayo.
11 NipopakitaMiu ka yakumo dala nggatuvua nabelo.
Aga nte Komiu yaku nelabi nadamba,
bo Komiu nompakasana yaku sampe ri kasae-saena.