Kaoge nTUPU nikita ri PompoviaNa bo ri AturaNa
19
Dade i Daud nipovia ka pakeni ntopanggeni dade.
2 Langi nombatesaki kakuasa nu Alatala,
bo laerava nompopaisani pokarajaaNa.
3 Eo-eo laerava nompopakita kaogeNa.
Bongi-bongi langi nompatolele kakuasaNa.
4 Naupa ledo ria tesa,
ledo ria suara niepe,
5 tapi petevai nantesaki Alatala natolele ri njumangu dunia,
bo karebana nisani sampe ri pantaa dunia.
Alatala nombadika mata nu eo ri langi.
6 Eo-eo mata nu eo nebonda lako ri mpandake
nadamba mpo boti langgai nesuvu lako ri tombi,
bo mpo tadulako nasana rarana nompamula polipana.
7 Dako ri pebondana sampe ri kasolona,
ledoria sangua anu ledo nambela kapanena.
8 Pepatuduki nTupu ledo ria kakurana,
nompakasana rara.
Atura nTUPU namala niparasaya
bo nombadekei noto ka tona dopa natau.
9 Parenta nTUPU nakana,
nompakadamba rara,
Atura nTUPU nanoa
bo nompakalanto pekiri ntona.
10 Neose nte TUPU nabelo.
Bo inggu haitu maria sampe kasae-saena.
Atura nTUPU nakana bo nanoa pura.
11 Pura-pura Tesa nTUPU noalipa pade bulava mpuu
bo nabelopa pade manisa anu ledo ria galona.
12 Atura-aturaMiu nompopatora yaku.
Bo tona nanjarumaka TesaMiu manggava tambo nadea.
13 Ledo ria saitoa tona nangisani pura-pura salana mboto.
PUE,
kabasakamo yaku dako ri sala anu ledo nisaniku.
14 Nemo rapalamba yaku movia dosa nitunggai,
bo nee radekei yaku rakuasaina.
Ane ivesia,
yaku ledo masala
bo makabasaka dako ri dosa nadea.
15 O PUE,
Komiu petalenduku bo topotolosi dosaku!
Kambou pekiriku bo pura-pura tesa nisovadakaku mompakasana raraMiu.