Posambaya merapi padagi ka magau
20
Dade i Daud nipovia ka pakeni ntopodade.
Tesa ka magau
2 Kambou TUPU mompoiyo posambaya magau riara nggasusa!
Kambou Alatala nisomba i Yakub mombajagai magau!
3 Kambou TUPU mompakatu petulungi
dako ri BanuaNa ri Bulu Sion.
4 Kambou ratoraNa pura pedekei magau,
bo rapodambaNa pesomba nipalabuna.
Jedaa
5 Kambou radekeiNa pura-pura anu nipodota magau,
bo rapakadupaNa pura nia magau.
6 Kami modade madamba
bo manganggataka bandera mombatoiya Alatala nisombata,
sabana magau padagi.
Kambou TUPU mompakadupa pura-pura perapi magau.
Tesa ka todea
7 Hitupa nisanikumo,
TUPU mombadekei kuasa ka magau nipeslisiNa,
mombadagi bali-balina.
TUPU mesana ka ia dako ri surugaNa nagasa,
magau manggava padagi mbaso ante kuasa nTUPU.
8 Naria tona nanjarumaka kareta mposieva,
bo naria muni nanjarumaka jara mposievara,
tapi kita
nanjarumaka kuasa nu Alatala nisombata.
9 Ira matepasunu bo madungga,
tapi kita bate-batena neangga maroso.
10 O PUE,
dekeimo padagi ka magau.
Pesanakamo kami,
tempo kami mekitulungi.