Dade posukuru sabana magau padagi.
21
Dade i Daud nipovia ka pakeni ntopodade.
2 O PUE,
nadamba mpuu rara magau sabana Komiu nompakaroso ia.
Nasana mpuu rarana sabana nidekeiMiu kuasa ka ia nombadagi balina!
3 Komiu nompakadupa anu nipodotana,
bo nombadekei anu niperapina.
Jedaa
4 Komiu nantomunaka ia ante rasi nelabi kaogena,
bo nompasuaka songgo bulava ri balenggana [tandana ia nakuasa].
5 Ia nerapi Komiu mompiara katuvuna
bo nipoiyoMiu perapina,
ante umuru mandoe sampe kasae-saena.
6 Ia nibila ntona sabana Komiu nombadekei kuasa ka ia mombadagi balina riara mposieva.
Ia nipajadiMiu naoge bo nalanga nturona.
7 NidekeiMiu rasi ka ia sampe kasaena;
nadamba mpuu ia sabana Komiu naria nte ia.
8 PUE,
Toneliu kakuasaNa,
magau nanjarumaka Komiu.
Ia batena naroso nomparenta sabana Komiu ledo naupu-upu nompotove ia.
9 PUE,
Komiu mombasaka pura-pura baliMiu,
bo mombatavani pura-pura tona nompovuu mata Komiu. a
10 Komiu makava mpo vaya nu apu
mompalabusi ira sampe domo maria.
PUE,
ira rapakaropu nu rau raraMiu,
ante apu mepalabusi.
11 Ledo ria maboli mulira,
apa Komiu mombaropusi pura-pura ira.
12 Ane rapana ira monia mangeva Komiu,
niara nadaa ledo madupa.
13 Komiu mompatoto panaMiu,
sampe ira mangova malai.
14 Kami mantoiya Komiu,
PUE,
sabana kuasaMiu,
kami modade mantoiya karosoMiu.