Posambaya bo dade tempo nggasusa
22
Dade i Daud nipovia ka pakeni ntopodade.
Nangoseaka dade nosanga “Rusa tempo bobayana.”
2 O Alatala!
Alatala nisombaku!
Nakuya Komiu nompalaisi yaku?
Yaku nekakai,
tapi Komiu batena nakavao
bo ledo nitulungiMiu yaku.
3 O Alatala nisombaku!
Yaku nekakai eona,
tapi Komiu ledo nesana.
Yaku nosambaya bongina,
tapi raraku ledo natinonto.
4 Tano Komiumo magau anu masipato rasomba kami,
anu nitoiya ntoIsrael.
5 Totua kami nggaulu nanjarumaka Komiu,
ira najarumaka Komiu bo nipakasalamaMiumo ira.
6 Ira nekakai nekitulungi nte Komiu bo nikabasakaMiu ira;
ira ledo nanjoso rarara nanjarumaka Komiu.
7 Tapi yaku hii eva domo manusia,
damo eva kaule,
nitunturaka bo nisalai ntodea.
8 Pura-pura tona nanggita yaku nolito-lito balenggara.
Ira nelebeka bivi nombasalai yaku.
9 Niulira,
“Ia najarumaka TUPU
damo TUPU mombakabasaka ia.
Ane makana TUPU nompopotove ia,
damo TUPU mompakasalama ia!”
10 Komiu nantulungi yaku nasalama nesuvu dako riara ntai ntinaku,
bo Komiu nopakatinoto yaku ri bambara ntinaku.
11 Dakome yaku nipoanaka,
Komiumo nombajagai yaku.
Dakome riara ntai ntinaku,
Komiumo Alatala nisombaku.
12 Nee rakavaoni yaku,
sabana kasusa naparamo
bo leria topetulungi.
13 Baliku eva lunu nu japi laki nombatiku yaku,
eva japi nasingi dako ri tana Basan,
ira nompatiku yaku.
14 Baliku nasadia mompatesi yaku,
eva singa nongao nasadia mesaka.
15 Karoso nggaroku naupu mpo uve nabubu,
pura-pura bukuku eva nakabasaka dako ri oyu.
Raraku nagonu mpo lili.
16 Karoso nggaroku naupu mpo kura tana narupu,
dilaku nekantaka ri ngareku.
PUE,
nipalaisiMiu yaku
mpo tomate radayo.
17 Yaku nipatiku lunu ntona nadaa,
eva lunu nu asu ira nompatiku yaku.
Ira nombatosu pale bo kadaku.
18 Pura-pura bukuku namala kureke,
baliku natara yaku bo nombadee yaku.
19 Ira nompobagi pakeaku,
bo notende lamoro ala rapangisani ka isema bajuku.
20 O PUE,
nee rakavaosi yaku!
Kamaimo masalisa mombatulungi yaku,
sabana Komiu nompakaroso yaku.
21 Kabasakamo yaku dako nte tona anu mompatesi yaku ante guma.
Pakasalama yaku dako ri baliku anu nasingi mpo asu.
22 Ledo nipakuleku!
Pakasalama yaku dako ri pesuu nu bali-baliku
anu naroso mpo japi bo nasingi mpo singa.
23 PoviaMiu kutesaki ka sampesuvu-sampesuvuku.
Kutoiya Komiu riara kasiromu ntodeaMiu.
24 Hee topangoseaka TUPU,
toiyamo Ia!
Hee pura-pura muli i Yakub,
pakaoge Ia!
Hee pura-pura muli Israel,
pantaputumo sombamo Ia!
25 Apa naasi mataNa nanggita tona nipandasa,
bo ledo nipandaenteNa kasusana.
Ledo nitubengosiNa tona haitu,
tapi niepeNa tempo ira nekitulungi nte Ia.
26 Ri tatanga ntodeaMiu,
kutoiya Komiu,
sabana pura-pura anu nipoviaMiu.
Ri ngayo ntopomparasaya
kudekei pesomba nijanjiku ka Komiu.
27 Tona napakasi mangande sampe nabosu.
Tona nakava nte Tupu mombatoiya-toiya TUPU.
Kambou komiu masana sampe kasae-saena!
28 Pura-pura tona ri dunia mantora TUPU bo manjili nte Ia,
todea-todea dako ri pura-pura ngata mantaputu mombasomba Ia.
29 Sabana aga TUPU nakuasa,
Ia nomparenta pura todea nu ngata-ngata.
30 Pura-pura tona nalanga rarana kana mantaputu bo mombasomba TUPU.
Nau tona namatemo mantaputu ri ngayoNa mombasomba Ia.
31 Muli-muli nggapurina mombasomba Tupu.
Kareba povia nTUPU kana rapotolelera sampe ri muli nu mulira.
32 Todea nu ngata-ngata anu meumba nggapurina damo rapatoleleka,
TUPU nompakasalama todeaNa.