Mazmur (Zabur)
Buku Paratama
Mazmur 1-41
Dala ntona nangoseaka tesa nu Alatala bo dala ntona nadaa
1
Nasana mpuu tona ledo nangoseaka pepatuduki ntona nadaa,
bo ledo nompasiala pokainggu ntona nadosa,
bo ledo nosimporoa nte tona nombasalai Alatala.
2 Tapi nipokononapa nangoseaka Parenta nTUPU
bo eo bongi nitanondoakana.
3 Tona ivehaitu kana moasele ri mpengaya pompaelona.
Ia nasimbayu mpo kayu natuvu ri tinggi nu uve,
anu novua ri tempo mpovuana
bo ledo nalele tavana.
4 Tapi tona nadaa,
ledo ivesia
ia nasimbayu mpo mee mpae niburu mpoiri.
5 Sabana haitu,
tona nadaa ledo rapakulena tempo ratangara nu Alatala,
bo tona nadosa rapopogaa dako nte todea nu Alatala.
6 Tona natutu nangoseaka tesa nu Alatala rajagai nTUPU.
Tapi tona nadaa raropusiNa.