I Ester najadi berei magau
2
Bara sakuya kasaena naliu kajadia haitu, domo narau magau, tapi da nipekirinapa pokainggu bereina i Wasti bo kabotu nipoviana. 2 Sabana haitu topepatotosi anu narapa nte ia, nombadekei panggava, “Nabelopa raeloka randaa nagaya ka magau. 3 Agina magau manganggataka tona nakuasa ri njumangu propinsi ri kamagaua hitu mangelo randaa-randaa nagaya bo rakenira tumai ri banua rapotaniaka mombine rapoberei magau. I Hegai, nipatani majadi topourusi banua ka mombinea haitu, mombaurusi bo mompakagaya ira.4 Maupu haitu pade rapelisi i pua, umbana randaa nipokono i pua, bo randaa haitu rapajadi berei i pua raposambei i Wasti.”
Nipokono nu magau panggava haitu bo nipoviana mpuumo.
5 Ri kota Susan haitu naria saito toYahudi nosanga i Mordekhai. Ia ana i Yair muli i Kis bo i Simei lako ri valaa i Benyamin. 6 I Mordekhai nitavani tempo Yerusalem nidagi i Nebukadnezar magau Babel. I Mordekhai nitavani hau ri Babel singgani-nggani nte i Yoyakin, magau Yehuda, bo nadea muni tona ntanina nitavani. 7 Naria sampesuvu sangganina, saito randaa nagaya bo naroso pokarona, nosanga i Ester. Sangana riara basa Ibrani i Hadasa. Totuana namatemo, ia nipailusi i Mordekhai bo nipatuvusina mpo anana mboto.
8 Naliupa nipatolele parenta nu magau, nadeamo randaa nipasiromu ri kota Susan bo i Ester naria ri sia. Ia muni nikeni hau ri banua magau, bo nidekei ka i Hegai, topourusi banua ka mombine rapoberei magau.
9 I Hegai nokumaa nanggita i Ester bo nipokonona. Nasalisamo nipasiayuna anu mompakagaya i Ester bo nitaniakana pangande ka ia. I Ester nilinja hau ri tombi tobelona ntoto bo papitu randaa ri banua kamagaua nitudu mompasiayu ia. 10 I Mordekhai nangulika i Ester, “Nee muuli iko toYahudi.” 11 Eo-eo i Mordekhai nolipa ri ngayo banua ka mombine anu rapoberei magau niponturo i Ester, nompekutana berimbana kareba i Ester bo nuapa ngena majadi nte ia. 12 Nangoseaka ada, sampae kasaena mombine-mombine nipasiayu kagayana - ono mbula nompake lana navangi soana ante dupa, bo ono mbulapa vai ante lana nigalo vangi-vangi ntanina. Maupu haitu, pura-pura mombine manggava loga hau mantingayo Magau Ahasyweros.
13 Ane makavamo gantana mantingayo magau, randaa haitu mamala merapi nuapa-nuapa rapokonona rapakena bara rapasuana hau nte magau.
14 Ia rakeni hau ri banua magau tempo bongina, bo mailena ia rakeni hau ri banua ntanina, bo raurusi i Saasgas, topangurusi berei piara nu magau. Randaa haitu domo hanupa mantingayo magau ane domo raronde nu magau sangana.
15 Jadi nakavamo gantana i Ester mantingayo magau. I Ester ana i Abihail nosampesuvu sanggani nte i Mordekhai anu nompiara ia mpo anana mboto. Nadamba pura tona nangganoto i Ester. Tempo nantingayo magau, i Ester nopakea nangoseaka pepatotosi bo pepangajari i Hegai.
16 Ivesiamo mai, ri bula sapulu, ri mpae kapapituna pomparenta magau Ahasyweros, haitumo bula Tebet, i Ester nikeni hau mantingayo Magau Ahasyweros ri banua kamagaua.
17 I Ester nompakadamba bo nompakasana rara magau nelabipa pade mombine ntanina. Haitumo sampe nipokononapa i Ester pade randaa ntanina. Jadi magau nombadika songgo kamagaua ri balengga i Ester bo nangunggataka ia manjambei bereina i Wasti.
18 Naupu haitu magau novia posusa mbaso mombabila i Ester. Bo nigagana pura-pura tomaogena. Bo nipatolelena eo penonto ka pura-pura propinsi ri poparentana bo nibagi-bagina pedekei mpelabi-labi.
I Mordekhai nompaksalama nyawa Magau
19 Tempo haitu muni i Mordekhai nianggataka majadi tomaoge.
20 Dopa muni niuli i Ester ia toYahudi, sabana nitagi i Mordekhai. I Ester batena nanturusi parenta i Mordekhai sampesuvu sangganina, nasimbayu eva nipoviana tempo ia da nakodi nipasiayu i Mordekhai.
21 Naria saeo tempo i Mordekhai da ranja mpokarajaa ri banua kamagaua, tomaoge magau, haitumo i Bigtan bo i Teres nosangu rara nonia mompatesi Magau Ahasyweros, sabana nadua rarara nte magau.
22 Niara haitu nisani i Mordekhai bo nasalisa nipangadukana i Ester. Bo kaliu-liu niuli i Ester pura tesa i Mordekhai haitu ka magau. 23 Nielora kakanana parakara haitu bo nakana mpuu. Jadipa tona randua haitu nihuku mate niloe. Nangoseaka parenta magau, kajadia haitu nitulisi riara buku tutura kamagaua.