I Haman nonia mompakaropu toYahudi
3
Bara sakuya kasaena naliu haitu, Magau Ahasyweros nanganggataka saito tona nosanga i Haman majadi tomaoge. I Haman ana i Hamedata dako ri muli i Agag.a 2 Magau nomparenta pura-pura topokarajaana mantaputu mombabila i Haman. Pura-pura tona nangoseka parenta haitu aga i Mordekhai ledo nangoseakana. 3 Topokarajaa ri kamagaua nekutana nakuya niliunakakana parenta nu magau. 4 Eo-eo kana niulikara ala raoseakanamo, tapi ledo nipetalingaina. Niulina, “Yaku toYahudi; ledo mamala yaku mombasomba manusia.” Jadipa nipangaduramo ka i Haman bo ira madota mangisani nuapa ngena rapovia i Haman ka ia.5 Narau mpuu i Haman nangepe i Mordekai ledo natundu ri ngayona. 6 Bo nisaninapa i Mordekhai toYahudi, nibotusinamo mombahuku i Mordekhai bo ledo aga i Mordekhai rahukuna tapi pura-pura toYahudi ri ngata Persia rahukuna muni. 7 Ri bula haitu, haitumo bula Nisan, ri mpae kasapulu rompaena Magau Ahasyweros nomparenta, i Haman nomparenta ira notende lamoro -- biasa niuli purim. Nipoviana ivesia ala rasani eo bo bula umbana mabelo rapompoviana nia daana haitu. Jadipa nipakatantumo tanggala sapulu tatalu bula sapulu randua, haitumo bula Adar.
8 Pade nangulimo i Haman ka magau, “Pua, naria sangu todea nakamburaka ri njumangu kamagaua hitu. Ada bo kabiasara nosisala ntoto nte ngata ntanina. Ledo nioseakara ada nu kamagaua. Jadi aginapa nee rapalamba ira mangoseaka dotara mboto.
9 Jadi ane rapokonomiu, aginamo rapovia sura parenta mompakaropu ira. Bo ane madota komiu mantarima panggavaku, mamala kusuaraka taluatu pata pulu (340) ton labi salaka ri peti kakalumana i pua.”
10 Nangepe haitu, nivonju nu magaumo sinji nipakena mombamere sura parenta bo nidekeikana i Haman ana i Amedata muli i Agag, bali ntoYahudi haitu. 11 Nangulimo magau ka ia, “Todea bo doi haitu kudekei ka iko. Poviamo anu nabelo mangoseaka pompekirimu ka ira.”
12-13 Jadi tanggala sapulu tatalu bula sangu, i Haman nompokio batua-batua nu magau. Nituduna ira motulisi sura nangoseaka pura-pura anu niulina. Sura haitu nibatuasi riara mpengaya basa bo potulisina anu nipake ri kamagaua haitu. Sura haitu nitulisi ante sanga nu Magau Ahasyweros bo nimere ante sinjina, pade nipakatu ka pura-pura tokuasa, gubernur bo tomaoge ri njumangu propinsi. Isi sura haitu ivei: “Ri tanggala sapulu tatalu, bula sapulu randua, niuli bula Adar, pura-pura toYahudi, nau kabilasa bara totua, bara mombine bara ngana-ngana, kana rapatesi pakaropu pura, ledo ante maasi mata, bo raalasi pura kakalumanara. 14 Parenta hitu kana rauli ri pura-pura propinsi ala masadia pura tona ri eo nipakatantu haitu.”
15 Topesuro nasalisamo hau nanggeni sura ka pura-pura propinsi ri kamagaua. Ante petudu nu magau, parenta haitu nipopaepe muni ri Susan, ibu kota Persia. Naupu haitu, magau bo i Haman nonturo bo nanginu anggur, tapi tona ri ngata mbaso Susan nagadomo nangepe kareba haitu.