I Mordekhai nekitulungi nte i Ester
4
Tempo nisani i Mordekhaipa kareba haitu, nibite-bitesinamo pakeana bo nipakenamo baju nipovia dako ri karu tanda kabuku rarana. Nitompuna avu balenggana, pade nolipa rangata bo nantete nggalako dala. 2 Ia netaa ri bobaa banua kamagaua, apa tona nobaju karu nitagi nesua. 3 Bo ri njumangu propinsi, toYahudi notumangi nekakai nangepe parenta nu magau nipatolele. Ira nopuasa, notumangi bo nongau. Nadea ira nompake baju nipovia dako ri karu bo naturu ri bavo nu sovua.4 Tempo randaa-randaa bo tona nipatani mokarajaa ka i Ester nanguli anu nipovia i Mordekhai, nabuku mpuu rara i Ester nangepena. Nipakatuna pakea ka i Mordekhai raposambei baju nipovia lako ri karu, tapi ledo nadota i Mordekhai nompasuana. 5 I Ester nompokio i Hatah, anu nipakatantu mokarajaa ka ia. Nituduna i Hatah mompekutana i Mordekhai nuapa najadi bo nakuya sampe ivesia nipoviana. 6 Jadi haumo i Hatah nte i Mordekhai ri doyata ri ngayo bobaa banua kamagaua. 7 I Mordekhai nantesaki kareba niepera, bo bara sakuya doi salaka nipejanjika i Haman rasuaraka ri pomboli nu magau, maliutaka purapa toYahudi rapakaropu. 8 Nidekei i Mordekhai ka i Hatah muni sura anu nitulisina mpanjili eva anu nisuvuraka ri Bente Susan, anu noisi parenta mompakaropu toYahudi. Nituduna i Hatah mombadekei sura haitu ka i Ester bo mombatentei pura-pura isi sura haitu ka ia, bo muni mangulika ia hau mantingayo magau merapi asi matana mompoasi toYahudi.
9 Naliu haitu haumo i Hatah nanguli petevai i Mordekhai ka i Ester. 10 Tapi nitudu i Ester mpanjili i Hatah ante petevai ivei, 11 “Isema-sema nau langgai bara mombine, ane ia hau mantingayo magau ri banua kamagaua tapi ledo rapokio nu magau, ia kana rahuku mate. Haitumo atura nipovia bo nisani ntona puramo, nompamula dako ri topokarajaa ka magau sampe todea ri ngata-ngata. Aga tona raulurakaka nu magau toko bulavana masalama dako ri pehuku mate haitu. Tapi yaku, sambulamo domo nipokio nu magau.”
12 Pade niuli i Hatahmo petevai i Ester ka i Mordekhai. 13 Jadipa i Mordekhai nompopatora i Ester, “Naupa iko nonturo ri banua nu magau, nee musarumaka matinontopa karomu pade toYahudi ntanina! 14 ToYahudi tantu manggava petulungi, nau damo berimba, kana masalama ira. Tapi ane ledo montingo iko riara nggasusa ivehitu, iko mboto mamate bo sampesuvu ntuamamu matunamo mulira. Ledo nisanita, bara haitumo sampe iko nipelisi majadi berei magau, ala iko mompakasalama todeamu toYahudi.” 15 Jadi nipakatu i Ester vai kareba ka i Mordekhai, 16 “Pasiromumo toYahudi ri Susan mosambaya. Nee mangande bo nee manginu talu eo talu mbongi. Yaku nte randaa-randaa nompasiayu yaku mopuasa muni. Maupu haitu pade hau yaku ri ngayo magau, naupa haitu nombaliunaka atura-atura. Ane rapana haitu kukamateka dekeikamo yaku mamate!”
17 Naupu haitu haumo i Mordekhai bo novia pura-pura anu nitevai i Ester ka ia.