Ester 5

I Ester nombagaga Magau bo i Haman hau mangande ri banuana

Ri eo katalu eona nopuasa, i Ester nompake pakea kamagauana, bo hau ri doyata ri banua magau bo neangga ri ngayo nu vamba. Magau da nonturo ri gadera kamagaua ri ngayo nu vamba haitu. 2 Nikitanapa i Ester neangga ri savalikuna, nasana rarana bo niulurakanamo toko bulavana ka i Ester. Jadi nikaparai i Ester bo nikabena vuntu ntoko haitu.

3 Pade nekutanamo magau, “Nuapa paraluumu, Ester? Nuapa muperapi? Ulimo! Nau damo santanga dako ri kamagauaku muperapi, kana kudekei ka iko.”

4 Nesana i Ester, “Ane rapodota nu magau, yaku batuamiu, merapi, ala bongi hitu magau bo i Haman makava mangande bo manginu anu nipasadiaku ka magau.”

5 Magau nangulika i Haman masalisa makava, ala ira hau ri pegaga i Ester. Jadi nakavamo ira ri pangande nipovia i Ester haitu. 6 [Naupu nangande] da ranja mpanginu anggur nekutanamo magau nte i Ester, “Nuapa muperapi? Tantu kupoiyo. Bo nuapa mupodota? Naupa santanga kamagauaku kana kudekei ka iko.”

7 Jadi nesana i Ester, “Yaku batuamiu. Perapiku bo pompokonoku ivei: 8 ane komiu mompotove yaku, bo ane mabelo ri panggitamiu, rapoiyomiu perapiku bo dotaku, maile kakava munimo komiu bo i Haman mangande anu kupovia ka komiu. Jadi maile pade kuuli pomperapiku nte komiu.”

I Haman nantudu mompopeangga tinja rapoloe i Mordekhai

9 Ri eo haitu i Haman nesuvu ante rara nasana bo nadamba. Tapi nipeintanapa i Mordekhai naria ri bobaa doyata kamagaua, ledo neangga bo ledo nokalelo mombabila ia. Jadipa nagigimo rara i Haman nanggita i Mordekhai. 10 Tapi nitaamakana rarana bo nanjilimo hau ri banuana. Nakava ri banua, niperapina roana makava bo niulikana bereina i Zeres, monturo singgani nte ira. 11 I Haman nasodo bo nombaoe kakalumanana ka ira. Nioena muni kadea nu ana langgaina, nturo nopoko nitarimana dako nte magau, bo nturona nelabi kalangana pade topokarajaa ntanina. 12 Niulina muni, “Aga yaku bo magau nigaga nu berei magau hau ri pangande nipoviana ka kami, bo maile bongi nigaga vai kami. 13 Tapi pura-pura haitu ledo ria gunana, ane da kukita i Mordekhai, toYahudi haitu, nonturo ri bobaa doyata kamagaua.”

14 Nangepe haitu berei bo pura-pura roana nombadekei panggava ivei, “Tudumo, povia tinja poloe ropulu-rometere kalangana. Pade maile mpadondo mpisina perapi nte magau moloe i Mordekhai ri tinja haitu. Ivesia mupovia ala matinonto raramu hau ri pangande.” Nipekiri i Haman nabelo mpuu panggava haitu. Sabana haitu nasalisamo nipekipoviana tinja poloe haitu.