I Mordekhai nidekeika pebila
6
Bongi haitu magau ledo napiri matana naturu. Sabana haitu, ia nerapi raalaka buku tutura kamagaua bo nantudu tona mombabacana. 2 Riara buku haitu nikavamo potulisi anu nombatesa pangadu i Mordekhai nanguli nia daa i Bigtan bo i Teres mompatesi nu magau. Ira randua haitu baipia niparasaya magau mpuu nombajagai vamba nu tombi paturuna. 3 Pade nekutanamo magau, “Nuapamo nibalasika belo nu rara i Mordekhai nanguli nia daa i Bigtan bo i Teres mompatesi yaku?”Nesanamo topotande nu magau haitu, “Ledo ria nuapa-nuapa nidekeika i Mordekhai.”
4 Nekutana vai magau, “Isema tomaogeku naria ri banua kamagaua hitu-hitu?” Eva nisuka muni nakavamo i Haman bo nesua ri doyata kamagaua. Ia nakava merapi loga nte magau ala mamala ia mombaloe i Mordekhai sampe mamate ri tinja nipopeanggana.
5 Topotande gahaitu nesana, “Naria i Haman ri sii. Ia madota motesa nte i pua.”
Nanguli vai magau, “Ulikamo ia mesua.”
6 Nesuapa i Haman, nangulimo magau ka ia, “Naria tona anu masipato kudekeika pebila. Nuapa masipato kupovia ka ia?”
Aga nipekiri i Haman, “Isemapa vai masipato manggava pebila dako nte magau ane ledo yaku?” 7-8 Sabana haitu nesanamo i Haman ka magau, “Tona haitu rapopakeka pakea kamagaua bo rapopesavi ri jara anu nasaro nipesavi nu magau, bo ramba-ramba tanda kamagaua radika ri balengga nu jara haitu. 9 Saito wakele magau dako ri tomaoge anu nalanga panggana mompopakeka pakea haitu ka tona anu radekeika nu magau pebila. Pade manggeni tona haitu mesavi jara nu magau, mantuntuni ia molipa ri dala jama riara ngata. Wakele nu magau haitu kana molipa ri ngayona bo mongare-ngare ivei, ‘Ivehitumo anu nipovia magau ka tona anu masipato manggava pebila!’ ”
10 Nangulimo magau ka i Haman, “Masalisa, alamo pakea bo jara eva anu niulimu tutu, bo dekeimo pura-pura pebila tutu ka i Mordekhai. Poviamo eva niulimu tutu. Ia muposinggavaka da nonturo ri vamba pesua ri banua kamagaua.”
11 Pade niala i Hamanmo pakea bo jara pangane, bo nipasuakana pakea haitu ka i Mordekhai. Nesavi jarapa i Mordekhai, niumbu i Hamanmo jara haitu nolipa ri dala ri njumangu ngata mbaso haitu bo nongare-ngaremo ia, “Peinta, ivehitumo anu nipovia magau ka tona anu masipato manggava pebila!”
12 Naliu haitu nanjilimo i Mordekhai hau ri vamba pesua banua kamagaua, tapi i Haman nompari-mpari nanjili hau ri banuana. Nibonggosina balenggana, tandana nabuku rarana. 13 Pura-pura anu dako najadi nte i Haman nitesakana ka i Zeres bereina, bo ka pura-pura roana.
Bereina i Zeres bo roa-roana anu natau nompekiri nanguli ka ia, “Niamu mompanavu i Mordekhai, ledo mamala, apa ia toYahudia. Bo ane mueva njuu ia, iko mboto manggava silaka.” 14 Da ranja mpotesa ira nte i Haman, nakavamo suro anu nitudu nu magau mangala i Haman bo manggeni ia hau mangande ri banua i Ester.