I Ester nerapi i Haman kana rahuku mate
7
Karongganina i Haman bo magau nakava nangande bo nanginu singgani nte i Ester. 2 Tempo ira da nanginu, nangulimo magau, “Ester, nipotoveku, ulimo nuapa nipokonomu? Ulimo! Tantu mami kupoiyo dotamu, naupa santanga kamagauaku muperapi, tantu kudekei.”3 Nesanamo i Ester, “Ane rapodota i pua, yaku batua merapi ala yaku nte todeaku mamala matuvu. 4 Apa yaku ante todeaku nipobalu rapatesimo. Ane rapana kami aga rapobalu rapajadi batua, ledo motingo yaku bo ledo muni mobato i pua!”
5 Jadi nekutanamo Magau Ahasyweros, “Isema ntoto nabia novia ivetutu? Riumba tonana?”
6 Nesana i Ester, “I Haman tona nadaa mai, bali mombaropusi kami!”
Naeka mpuumo i Haman nangganoto magau njamboko. 7 Nagigi mpuu rara nu magau. Neangga ia bo kaliu-liu nalai lako ri ngayo nu meja, hau ri doyata banuana. I Haman nompekiri, “Tantu rahuku nu magaumo yaku.” Sabana haitu ia batena nonturo bo mekiampungi nte i Ester.
8 Ante njoso nu rara i Haman nantaputu ri bangku ponturo i Ester merapi ampu, tapi sampesanika nanjilimo magau dako ri doyata. “Mokuya? Mupogau bereiku sii ri ngayoku bo ri banuaku mboto?”
Sanggaupu magau notesa ivehaitu, nakavamo tomaoge nombabungusi balengga i Haman.a 9 Pade nangulimo i Harbona, roa ntomaoge haitu, “Pua, naria kayu poloe napara banua i Haman, ropulu bo rometere kalangana. I Haman nompopeanggana rapoloena i Mordekhai sampe mamate, anu nompakasalama nyawa i pua.”
Jadipa netudumo magau, “Loemo i Haman ri kayu tutu sampe mamate!”
10 Jadi ivesiamo i Haman niloe ri kayu nipopeanggana rapoloena i Mordekhai, bo namatemo ia. Naliu haitu pade naosa bo naopo rau rara nu magau.