Parenta magau mombatulungi toYahudi
8
Ri eo haitu muni Magau Ahasyweros nombadekei kakalumana i Haman, bali ntoYahudi ka i Ester. I Ester nanguli ka magau, i Mordekhai sampesuvuna. Nompamula dako rahaitu magau nombadekei loga ka i Mordekhai mosintomuka ia ledo nompopea nironde. 2 Magau nombavonju sinji poteke kamagaua dako ri koyampale i Haman bo nidekeina ka i Mordekhai, bo i Ester nombadekei kakalumana i Haman muni ka i Mordekhai.3 Naupu haitu i Ester nosintomuka magau mpanjili. Ia nekanaede bo notumangi nerapi ante magau ala nia nadaa nipovia i Haman ka toYahudi ledo majadi. 4 Magau nombaduduaka toko bulavana ka i Ester pade neanggamo i Ester bo notesa, 5 “Ane madota i pua, bo ane i pua mompotove yaku, tulungi povia sura parenta mombataja mpanjili parenta mompatesi pura toYahudi anu nipovia i Haman toAgag haitu. 6 Ledo kupakule mompeinta todeaku bo sampeusuvuku rapatesi pura. Berimbamo raraku mompeinta anu haitu majadi nte sampesuvu-sampesuvuku?”
7 Pade nesana Magau Ahasyweros ka i Ester bo i Mordekhai toYahudi haitu, “Kakalumana i Haman nidekei ka i Ester, bo i Haman niloemo apa ia nonia mompatesi pura-pura toYahudi. 8 Sura nitulisi ante sangaku bo niteke ante sinji kamagaua ledo mamala rataja mpanjili. Jadi tulisimo anu mupokono mabelo ka toYahudi ante sangaku bo tekemo ante sinji poteke kamagaua.”
9 Tempo haitu muni tanggala ropulu tatalu (23) bula tatalu, haitumo bula Siwana, i Mordekhai nombaronde bara sakondua topotulisi ri kamagaua bo nituduna motulisi sura ka pura-pura tona ri njumangu ngata ri saatu ropulu propinsi, dako ri tana India sampe ri tana Etiopia. Sura haitu nitulisi ante potulisi riara basara mboto. 10 Pade i Mordekhai notulisi sura haitu ante sanga nu Magau Ahasyweros, bo nitekena ante sinji kamagaua. Naupu sia, i Mordekhai nombatudu batua-batua manggeni sura haitu hau ri pura-pura propinsi ri kamagaua haitu. Ira nesavi jara nu magau anu natau bo nagasi.
11 Isi sura parenta haitu nombadekei toYahudi ri pura-pura ngata haitu masiromu mosinggani-nggani mombajagai karora. Mamala mangeva tona dako ri umba-umba ngata anu madota mombaeva ira. Mamala muni ira mompatesi topangeva ira ante bereira bo anara bo mangagosi mbara-mbarara. 12 Parenta haitu kana rapovia ri njumangu ngata Magau Ahasyweros, ri eo [nipakatantu i Haman mompatesi pura-pura toYahudi], haitumo ri tanggala sapulu tatalu bula sapulu randua bula Adarb. 13 Sura parenta haitu kana rapajadi atura ka pura-pura tona ri pura-pura propinsi. ToYahudi kana masadia eo haitu mombaeva balira. 14 Topanggeni parenta nu magau haitu, nomparimo hau nesavi jara nagasi bo natau. Jadi sura parenta haitu nibacaka muni ka toponturo ri Bente Susan.
15 Naupu haitu i Mordekhai nesuvu dako nte magau nompake pakea kamagaua anu nagavu bo naputic, baju nakamao nipovia dako ri kae nalusu ante nompake songgo bulava anu nagaya. Tona ri Bente Susan nadamba-damba bo nasanamo rarara. 16 Navoemo rara ntoYahudi. Nasana rarara bo nibila ntodea. 17 Ivesia muni njumangu ngata, ri umba-umba sura parenta haitu nibaca, toYahudi nadamba rarara bo nompesana-sana ante novia posusa. Nadea muni tona ledo toYahudi, nesua najadi todea toYahudi apa ira naeka ante toYahudi.