To Yahudi nangeva bali-balira
9
Ri bula Adar, haitumo bula sapulu randua, tanggala sapulu tatalu nipakatantumo parenta-parenta nu magau rapakadupamo. Ri eo haitu bali-bali ntoYahudi naroso mpuumo rarara mombadagi toYahudi. Tano ledo ivesia najadi. ToYahudi nombadagi tona anu nompovuu mata ira. 2 Ri pura-pura ngata ri kamagaua Ahasyweros, toYahudi nasiromu nosangu rara, mombaeva pura-pura tona anu novia nadaa ante ira. Bo ri umba-umba todea naeka ante ira bo leria saitoa nabia nangeva ira. 3 Pura-pura tomaoge riara kamagaua haitu evamo gubernur, bupati bo tomaoge-tomaoge anu nokarajaa riara kamagaua nosabingga ka toYahudi sabana pura-pura ira naeka ka i Mordekhai. 4 I Mordekai nambaso kakuasana riara kamagaua Ahasyweros, bo kareba haitu niepe ntona puramo ri njumangu ngata riara kamagaua Ahasyweros. Sabana haitu nantambai kakuasa i Mordekhai.5 ToYahudi nombadagi pura-pura balira. Nipatesira bo nipakaropura balira ante guma, bo damo dota nu rarara nipoviakara ka tona anu nompovuu mata ira.
6 Ri ngata mbaso Susan, toYahudi nompatesi limaatu (500) kadeana tona. 7-10 Bo nipatesira muni kasapulu ana langgai i Haman ana i Hamedata bali mbaso ntoYahudi. Sanga ana i Haman haitu: i Parsandata, i Dalfon, i Aspata, i Porata, i Adalya, i Aridata, i Parmasta, i Arisai, i Aridai bo i Waizata. Nipatesira tapi ledo nialasira mbara-mbarara.
11 Ri eo haitu muni tona nangulika magau kadea ntona anu nipatesi ri Bente Susan. 12 Bo nangulimo magau ka bereina, i Ester, “Da ri Bente Susan limaatumo (500) kadeana tona nipatesi ntoYahudi, nireke ante kasapulu ana i Haman. Nemopa ri ngata-ngata santanina riara kamagaua hitu! Bara berimba nipoviara rumai! Hitupa nuapa-nuapa muperapi radekei, bo nuapa-nuapa nipokonomu raturusi.”
13 Nesana i Ester, “Ane rapokono nu magau, maile mpadondo dekei toYahudi mangeva balira vai mpo nipoviara eo hitu. Bo karobata ana-ana i Haman kana raloe ri tinja poloe.”
14 Magau nombadekei parenta nangoseaka pomperapi i Ester. Sura parenta nisuvuraka ri Susan bo karobata nu ana i Haman sapulu niloe. 15 Ri eo kasapulu ampa, bula Adar nasiromumo toYahudi ri Susan, bo nipatesira taluatu (300) kadeana tona ri ngata Susan. Tempo haitu muni ledo niagosira mbara-mbara ntona nipatesira.
16 ToYahudi anu nonturo ri ngata ntanina ri kamagaua haitu nasiromu, bo nombajagai karora. Nidagira balira bo nipatesira pitupulu bo alima njobu (75.000) kadeana tona anu nompovuu mata ira. Tapi ledo nialara mbara-mbara ntona anu nipatesira. 17 Anu haitu najadi ri eo kasapulu tatalu riara bula Adar. Ri eo kasapulu ampana netaamo ira. Tapi eo haitu nipajadi eo posusa bo kadamba-damba rara.
18 Tapi toYahudi ri ngata Susan nompovia posusa ri eo kasapulu alimana bo nompajadi eo haitu eo mbaso, sabana ira [ro eo] nompatesi bali-balira ri eo kasapulu tataluna bo muni ri eo kasapulu ampana. Bo ri eo kasapulu alimana ira netaamo, bo novia posusa kadamba rara ri eo haitu. 19 Haitumo sabana toYahudi anu nonturo ri ngata-ngata kodi nompajadi eo kasapulu ampana najadi eo mbaso nu damba rara, bo eo haitu nipoviara posusa kadamba nu rara bo nosinjula pangande.
Posusa Purim
20 Naupu haitu i Mordekhai notulisi pura anu najadi bo nipakatuna sura ka pura-pura toYahudi nau anu napara bara anu nakavao ri njumangu ngata riara kamagaua i Ahasyweros. 21 Isi nu sura haitu, parenta mpae-mpae mompovia posusa ri tanggala sapulu ampa bo tanggala sapulu alima bula Adar. 22 Apa ri eo haitu toYahudi nombadagi balira, bo kabuku rara ante kadua nu rara nabali najadi kadamba nu rara bo kasana nu rara. Sabana haitu, ira kana movia posusa ri eo haitu bo mompasadia pangande bo panginu. Ira kana mosidekeika pangande bo rabagikara muni ka tona napakasi. 23 ToYahudi nangoseaka parenta i Mordekhai haitu. Haitumo sabana posusa anu nipoviara najadi ada kabiasa mpae-mpae.
Kaupu nu tesa
24 I Haman ana i Hamedata, muli i Agag, bali mbaso ntoYahudi, notende lamoromo anu niuli muni purim mompakatantu eo mombapatesi toYahudi. Ia nonia mompakaropusi ira. 25 Tapi i Ester hau nosintomuka magau, bo magau nombadekei sura parenta. Haitumo sabana nia daa i Haman najadi ri karona mboto, ia ante ana-anana niloe ri tinja poloe. 26-27 Eo mbaso haitu niuli muni Posusa Purim. ToYahudi novia sangu atura ka karora mboto, ka mulira, bo ka pura-pura tona anu majadi toYahudi. Nantutuntuni atura haitu, mpae-mpae ira kana movia roeo anu nipakatantu i Mordekhai. Nipoviara atura ivesia sabana isi nu parenta i Mordekhai bo pura-pura anu nadupa ri karo ntoYahudi. 28 Nipakatantu muni Eo Purim kana ratora bo rapovia ntoYahudi posusa ri pura-pura banua, ri pura-pura ngata sampe kasae-saena.
29 I Ester ana i Abihail, notulisi sura muni nosinggani-nggani ante i Mordekhai. Sura karanduana haitu nitulisi ante kuasa nu berei magau bo nompakaroso isi sura i Mordekhai. 30 Sura haitu nipakatuna ka pura-pura toYahudi ri saatu ropulu papitu (127) propinsi riara kamagaua Ahasyweros. Sura haitu nipakatu nosinggani-nggani ante posambaya ala katuvu ntodea toYahudi batena mabelo bo ledo makura nuapa-nuapa. 31 Sura haitu muni noisi petevai ala ira bo mulira mpuu-mpuu mombatora bo mompovia Posusa Purim. Ira kana mompakatantu mantora bo mompoviana nasimbayu mpo posusa ntanina mombatora tempo mopuasa bo mabuku rara. Haitumo isi nu sura i Mordekhai bo i Ester, berei nu magau. 32 Parenta i Ester anu nompakatantu atura-atura Posusa Purim, nitulisi riara nu buku.