Kadaa nu manusia bo kabelo nu Alatala
36
Dade i Daud,
batua nTUPU,
nipovia ka pakeni ntopodade.
Kadaa inggu nu manusia
2 Dosa riara ntai ntona nadaa,
nanggeniaka ia nokainggu nadaa,
tona haitu ledo naeka nte Alatala.
3 Dosa haitu nompadidisi ia,
sampe domo nirasaina kasalana,
bo ledo nipovuu matana ingguna haitu.
4 Aga tesa nadaa bo pebagiu nesuvu dako ri sumbana,
ia domo nokainggu nabelo bo domo nokainggu nte noto mpekirina.
5 Ri paturu ia nonia madaa;
pokaingguna ledo ria nabelo,
anu daa ledo nipoarana.
Kabelo nu Alatala
6 O PUE,
toveMiu ledo ria kaupu-upuna
nalanga mpo langi,
bo nasilele ri njumangu kulimu.
7 O PUE,
kabeloMiu nalanga mpo bulu,
bo kanoaMiu nandala mpo tasi;
manusia bo binata nipotoveMiu.
8 O Alatala,
noali mpuu toveMiu ledo ria kaupu-upuna,
Komiu nombasaliku manusia
eva manu nombaromuti anana ri tambe nggapina.
9 Naosa rarara nte kandea mpelabi-labi ri BanuaMiu,
bo anu nabelo ledo naupu-upu nitarimara dako nte Komiu,
mpo uve binangga noili.
10 Komiumo puna nggatuvu nu pura-pura anu natuvu,
riara remeMiu nipompeinta kami reme.
11 PUE,
potove njuu tona nosisani nte Komiu,
bo manoa nte tona anu mpuu-mpuu rarana nomparasaya Komiu.
12 Nee rapalamba yaku rasuu ntona nalanga rarana,
bara rapopalai ntona nadaa.
13 Peintamo,
tona nokainggu nadaa nadunggamo,
ira nidungganakasimo bo domo namala nembangu.