Posambaya mekitulungi
35
Dade i Daud.
O PUE,
pobalikamo tona nompobali yaku,
evamo tona anu nangeva yaku.
2 Alamo kaliavo kodi bo kaliavo mbasoMiu,
tulungimo yaku.
3 Anggatakamo toko bo tavalaMiu
mombaeva tona nombaraga yaku.
Ulimo ka yaku
Komiumo topompakasalama yaku,
ala moroo raraku.
4 Palambakamo tona madota mompatesi yaku
radagi bo rapakaeya.
Palambakamo tona nolunu nombaeva yaku
moura nte ingu rara.
5 Palambakamo ira rapakasimpotare nu malaeka nTUPU
mpo mee mpae niburu mpoiri.
6 Palambakamo ira raraga nu malaeka nTUPU
ri dala nalanda bo dala nalenguru.
7 Ledo ria anu momposaba ira mantoliani yaku
bara mokae lovu raponavusakara yaku.
8 Palambakamo ira rakava nu silaka
anu ledo nisani-sani.
Palambakamo ira matesoo nte toliara mboto
manavu bo maropu.
9 Jadi yaku madamba-damba sabana TUPU,
raraku nadamba sabana Ia nompakasalama yaku.
10 O PUE ante mpuu-mpuu raraku yaku nanguli,
ledoria kasimbayuna nte Komiu!
Komiu nombakabasaka tona nalente dako nte tona naroso,
nombakabasaka tona napakasi bo tona nandasa,
dako nte tona nompandasa ira.
11 Tona-tona nosabi nadaa neangga nangeva yaku,
nombarai yaku novia anu ledo nisaniku.
12 Kabeloku nibalasira ante kadaa;
eva naupumo raraku nirasaiku.
13 Tempo ira nadua,
nabuku raraku bo yaku ledo nangande;
yaku notungga bo nosambaya,
14 eva nosambayaka sampesuvuku bara vega rapaku.
Yaku notungga nantangisi ira,
eva nantangisi tinaku mboto.
15 Tapi tempo yaku nasusa,
nadamba ira,
bo nasiromu nangeva yaku.
Tona ledo nisaniku ledo netaa-taa nombasalai yaku.
16 Ira nompongei-ngeika yaku eva nompongeika tona napunggu,
bo navuu matara nanggita yaku.
17 O PUE,
sampe maipia
Komiu aga mekanoto nggoo?
Pakasalama yaku dako ri pesuura,
pakasalama nyawaku dako nte singa nasingi.
18 Yaku mosukuru nte Komiu,
ri tatanga ntodeaMiu,
bo mombatoiya sangaMiu riara nggasiromura.
19 Nee rapalamba tona madamba bo mompobali yaku ane ledo ria sabana,
nee rapalamba tona movoo bo mompovuu mata yaku ane ledo ria sabana.
20 Tesara nakasara;
Ira nomponia pebagiu
ka tona natuvu natinonto.
21 Ira nongare-ngare ka yaku bo nanguli,
“Kami mboto nompeita nuapa nipoviamu!”
22 O PUE,
NikanotoMiumo;
nemo Komiu aga malino
bo makavao dako nte yaku.
23 Peanggamo salikumo parakaraku,
o Pue Alatala nisombaku,
tulungimo yaku!
24 O PUE,
Alatala nisombaku.
Salikumo yaku apa Komiu nanoa.
Nee rapalamba baliku madamba-damba apa yaku nasusa.
25 Nee rapalamba ira manguli riara ntai,
ivei,
“Nosukuru kita,
apa nipakauputamo nyawana,
najadimo dotata!”
26 Palambakamo tona nasana manggita kandasaku
maingu bo maeya.
Palambakamo tona nasana rarana nanggita kasusaku,
rasayu bo rapakaeya.
27 Palambakamo tona movoo-voo madamba
mompeinta yaku rapakakana
Palambakamo ira mpenggani-nggani manguli ivei,
“Nabelo mpuu TUPU
Ia madota tona nipobatuaNa masalama!”
28 Jadi kana kupatolele kanoaMiu,
bo njumaeo yaku mombatoiya Komiu.