Dade mantoiya kabelo nTUPU
34
Dade i Daud,
Tempo i Daud ri ngayo i Abimelekh,
nitunggaina netibaya,
sampe ia nipopalai.
2 Yaku kana mosukuru nte TUPU,
bo ledo menonto mombatoiya Ia.
3 Yaku mompakaoge TUPU riara nggatuvuku sabana pura-pura anu nipoviaNa.
Kambou anu haitu raepe ntona nipandasa bo ira madamba.
4 Pakaogemo TUPU mosinggani nte yaku,
kamai kita mosinggani-nggani mompakaoge sangaNa.
5 Yaku nerapi nte TUPU,
bo nipoiyoNa,
nipakabiaNa yaku dako ri pura-pura anu nipokaekaku.
6 Tona nipandasa nanjarumaka Ia bo ira nadamba,
ira domo rapakaeya.
7 Tona napakasi nekakai bo nipesanaka nTUPU,
nombakabasaka ia dako ri kasusa.
8 Malaeka nTUPU mombajagai tona natutu nomparasaya,
bo mombakabasaka ira dako ri anu nadaa.
9 Rasai bo peinta mbotomo nabelo mpuu TUPU,
madamba mpuumo tona netalendu nte Ia.
10 Hee komiu todea nTUPU,
peosemo nte Ia,
sabana tona neose nte Ia,
ledo mapepa.
11 Nau singa naroso kana nakura anu rakandena;
tapi tona nombasomba TUPU ledo mapepa anu mabelo riara nggatuvuna.
12 Epemo ngana-ngana,
kupatuduki komiu mombabila TUPU.
13 Ane madota komiu mandoe umuru
bo mombarasai anu nabelo,
14 nee mosovadaka tesa-tesa nadaa,
bo nee mebagiu.
15 Kavaosimo anu nadaa,
povia pokainggu nabelo,
pasimbukumo mangelo posinggabelo sampe mukava.
16 TUPU nomparantaika tona natutu nomparasaya,
nipetalingaiNa ane ira nekitulungi.
17 Tapi tona nokainggu nadaa ledo nipokonoNa;
bo ira masalisa rakalingasi dako ri dunia.
18 Ane topomparasaya nekakai,
nipetalingai nTUPU,
bo nipakasalamaNa ira dako ri pura-pura kasusa.
19 TUPU nomporoa tona naupu rarana,
bo Ia nompakasalama tona nagero pekirina.
20 Nadea mpuu kandasa nirasai ntona nabelo,
tapi TUPU nombakabasaka ia dako ri pura-pura kandasa haitu.
21 Karona batena nijagai nTUPU,
ledo ria sangua bukuna nipakakoto.
22 Tona nadaa kana mamate sabana kadaana,
tona nompovuumata topomparasaya kana rahuku.
23 TUPU nompakasalama batua-batuaNa;
bo pura-pura tona netalendu nte Ia ledo rahuku.