Dade mombatoiya Alatala
33
Hee komiu topomparasaya,
povoo-voomo nte damba rara,
sabana tona nanoa masipato mantoiya
anu nipovia nTUPU.
2 Pakemo kacapi mosukuru nte TUPU,
Podademo ka Ia ante mompake gambusu.
3 Podadekamo dade nabaru ka TUPU,
kovimo kacapi pakabelo-belo ante damba rara!
4 Pura-pura anu niuli nTUPU nakana;
pura-pura nipoviaNa ante rara mpuu-mpuu.
5 Ia nompokono anu nakana bo nanoa,
njumangu isi dunia nombarasai toveNa.
6 TUPU nompajadi langi,
ante tesaNa,
ante tesaNa muni,
mata nu eo,
bula bo betue nipajadiNa.
7 TUPU nompakasangu uve oge najadi tasi,
bo uve oge haitu ledo nombaliunaka pantaana.
8 Dekeikamo njumangu isi dunia maeka bo meose nte TUPU
bo toponturo ri dunia mombabila Ia.
9 Ante tesaNa,
pura-pura anu naria najadi;
Ia nombadekei parenta,
pade pura-pura naria.
10 Nia nu todea-todea ngata ledo nomparasaya TUPU,
ledo nipakadupaNa,
bo ledo nipakajadiNa patuju nia valaa ntodea ngata gahaitu.
11 Tapi Nia nTUPU bate-batena sampe kasae-saena,
niaNa naroso sampe ri kasae-saena.
12 Madamba mpuumo todea nombasomba TUPU Alatala.
Madamba mpuu todea anu nipelisiNa majadi todeaNa!
13 TUPU nompetiro dako ri suruga,
Ia nompeinta pura-pura manusia.
14 Dako ri ponturoNa ri suruga
Ia nangganoto pura-pura toponturo ri dunia.
15 Ia nompajadi pekiri riara ntaira,
bo nisaniNa pura-pura pokainggura.
16 Ledo kadea nu tantarana magau padagi.
Tantarana nasalama ledo sabana karosora mboto.
17 Jara ledo mamala rasarumaka ala padagi riara mposieva,
karoso bo kambasona ledo namala mepakasalama.
18 TUPU nombajagai tona neose nomparasaya
bo nanjarumaka toveNa ledo ria kaupu-upuna.
19 Ia mompakasalama ira dako ri silaka,
bo mombatulungi ira ri tempo nggaara.
20 Kita manjarumaka TUPU,
Iamo topotulungi bo toposaliku kita.
21 Sabana Ia kita madamba
bo momparasaya sangaNa nagasa.
22 O PUE,
perapi doa Komiu batena mompotove kami,
apa kami nanjarumaka Komiu.