Nasana mpuu tona niampungi dosana
32
Dade i Daud.
Dade pepatuduki.
Nasana mpuu tona niampungimo dosana,
bo salana domo nireke.
2 Nasana mpuu tona ledo nipokonona nebagiu,
bo pokaingguna nadaa domo nireke nTUPU.
3 Ane ledo kunoa dosaku,
ledo matinonto katuvuku.
Njumaeo yaku nongau,
4 sabana eo bongi Komiu nompandasa yaku,
roso nggaroku nalipo eva nipovaisi nu eo.
Jedaa
5 Niuliku pura dosaku ri ngayoMiu bo salaku ledoria nitabuniakaku.
Nibotusikumo kunoa ri ngayoMiu bo pura-pura dosaku niampungiMiu.
Jedaa
6 Sabana haitu tona nanoa kana mosambaya
tempo da maria loga radekeiMiu ka ira,
ala ane kasusa mbaso makava,
ledo mambela ira.
7 Komiu petabuniku,
bo Komiu nombakabasaka yaku dako ri kasusa.
Yaku nanggati nte damba sabana Komiu nombajagai bo nompakasalama yaku.
Jedaa
8 TUPU nanguli,
“Yaku mombatuduaka dala muose,
iko Kukeniaka bo Kupatuduki.
9 Nee mpo jara nambongo,
aga nisama bo niumbu nte kaloro pade nadota netuntuni.”
10 Nadea kasusa najadi ri karo ntona nadosa;
tapi tona nanjarumaka TUPU
batena nijagai bo nipotoveNa.
11 He komiu topomparasaya!
Kasana-sanamo bo kadamba-dambamo ka anu nipovia nTUPU.
He pura-pura komiu tona nabelo bo nanoa,
kadamba-dambamo.