Manjarumaka Alatala
31
Dade i Daud nipovia ka pakeni ntopodade.
2 O PUE,
nte Komiu kupekanaluu
nee rapalamba yaku rapakaeya.
Pakasalama yaku sabana Komiu nanoa.
3 Epemo yaku bo kabasaka yaku masalisa.
Lendutimo yaku,
kajadimo Komiu eva bulu vatu nipekanaluuku.
Kajadimo Komiu mpo bente naroso,
ala yaku masalama.
4 Komiu mpo bulu vatu
bo mpo bente naroso ka yaku!
Keniakamo yaku ala sangaMiu ratoiya.
5 Kabasakamo yaku dako ri nia nadaa,
eva dako ri tolia nitaa ka yaku,
sabana Komiumo pekanaluuku.
6 O PUE,
Alatala anu nompakadupa janjina,
riara mpaleMiu kudekei katuvuku;
Komiu nombakabasaka yaku.
7 Tona nombasomba tupu ntanina nipovuu mataMiu;
tapi yaku nomparasaya Komiu.
8 Yaku masana bo madamba
sabana Komiu batena nompotove yaku.
Komiu nompeinta kandasaku
bo nompariara kasusaku.
9 Ledo nipalambaMiu yaku nitavani nu bali,
tapi nipalogaMiu yaku nolipa matinonto.
10 O PUE,
poasimo yaku,
sabana yaku riara nggasusa;
kasusa raraku nompakaporo mataku notumangi,
Katuvu bo karoku domo natumutoa.
11 Kasusa raraku nompakandasa katuvuku
bo pongauku nompakambuku umuruku.
Karosoku nakura sabana dosaku,
bo buku-bukuku nalentemo.
12 Yaku najadi ngiri ka pura-pura baliku,
bo tona nosadoyata nte yaku.
Pura-pura tona niposisaniku natikaja nanggita yaku,
ira nompetalilika yaku ane nosintomu nte yaku ri dala.
13 Yaku nikalingasi mpo tona namate,
bo najadi mpo mbara-mbara domo noguna.
14 Riumba-umba naria kakini rara;
niepeku tesa-tesa nu baliku.
Ira nasintuvu mangeva yaku,
bo nonia mompatesi yaku.
15 O PUE,
yaku aga nanjarumaka Komiu,
sabana Komiumo Alatala nisombaku.
16 Katuvuku riara mpaleMiu,
pakasalama yaku dako ri bali-baliku,
bo dako ri tona nombaraga yaku.
17 Kambou Komiu mompokono yaku batuaMiu;
pakasalama yaku sabana toveMiu ledo ria kaupu-upuna.
18 O PUE,
nee rapalamba yaku rapakaeya,
sabana yaku nekakai nte Komiu.
Dekeikamo tona nadaa rapakaeya,
anu domo notingo nanau ri ponturo malaeka ntomate.
19 Kapusimo sumba ntopodava
ante langa rara ira nantunturaka tona nanoa.
20 Nelabi mpuu kabeloMiu
anu nipasadiaMiu ka tona natutu nangoseaka Komiu!
Nikita ntona pura kabelo nipoviaMiu,
ka tona nanjarumaka Komiu.
21 Komiu nombajagai bo nombalenduti ira ri ngayoMiu
dako ri akala ntona nadaa;
NijagaiMiu ira riara banuaMiu
dako ri perai nu bali.
22 Ratoiyamo TUPU!
ToveNa ledo ria kaupu-upuna nipopakitaNa ka yaku ante kabarakana,
tempo yaku nipatiku bo nisuu.
23 Riara nggaingu raraku
nipekiriku domo nipeili nTUPU yaku.
Tapi niepeNa perapiku
tempo yaku nekakai nte Ia.
24 Hee pura-pura todea,
potovemo TUPU,
Ia mojagai tona natutu neose.
Tapi tona nalanga rarana rahukuNa
ante ledo ria ampu.
25 Pakaroso bo pakaroo raramiu,
pura-pura komiu topanjarumaka TUPU!