Sambaya posukuru
30
Dade i Daud.
Dade posalama Banua nu Alatala.
2 O PUE,
yaku mombatoiya Komiu,
sabana nipakasalamaMiumo yaku
bo ledo nipalambaMiu baliku nompovooka yaku.
3 PUE Alatala nisombaku,
yaku nekakai nekitulungi nte Komiu,
bo nipakabeloMiu yaku.
4 Komiu nombakabasaka yaku dako ri kamatea
bo nompakatuvu yaku dako ri tatanga ntomate.
5 Hee komiu todea nipotove nTUPU,
podadekamo dade petoiya ka Ia,
bo posukurumo ka sangaNa Nagasa.
6 Sabana karau nTUPU aga sampalai,
tapi kabeloNa sampe ri kaupu nggatuvu.
Naupa njambongi-mbongi notumangi,
tapi karavanjakana nariamo kadamba rara.
7 Ri tempo nasana yaku nanguli,
“Yaku ledo radagi sampe kasae-saena!”
8 O PUE,
nipajadiMiu yaku mpo bulu naroso,
sabana kabelo raraMiu nte yaku.
Tapi tempo Komiu nombatubengosi yaku
naviora raraku.
9 O PUE,
yaku mekakai nte Komiu,
bo metiasi nte Komiu:
10 Nuapa gunana ka Komiu ane yaku mamate
bo manau ra dayo?
Naria tomate mantoiya Komiu?
Naria tomate mompatolele toveMiu ledo ria kaupu-upuna?
11 O PUE,
epemo bo potovemo yaku,
tulungimo yaku,
PUE!
12 Tangiku nipajadiMiu dade damba rara,
kabuku raraku nialasiMiu,
bo nisambeiMiu ante kasana.
13 O PUE Alatala nisombaku,
yaku ledo aga malino,
kupodadeka dade petoiya ka Komiu,
bo dade posukuru ka Komiu sampe ri kasae-saena!